الموضوع: ممكن طريقة ظبط الاسبراتير العاده طلب من جهابزه المنتدى

المشاركة الأصلية كتبت بواسطة ahmed_h_g

http://www.nilemotors.net/Nile/86361-a.html

أزيك يا احمد بيه
معلش حصل عند حضرتك التباس وخلط
هو بيسأل عن الأسبراتير وليس الكربراتير
الأسبراتير هو المسؤول عن توقيت الشرارة وليس الكربراتير المسؤول عن خلط الهواء بالبنزين

بص يا باشا
الأسبراتير الأول علشان تظبطه لازم تفهم وظيفته ودي هتسهلك كتير طريقة عمله
اولا بيسموه بالأنجليزي Distributor (موزع) وفعلا هو بيقوم بتوزيع الشرارة (بتاعة البوجيهات) طب ازاي ؟؟؟؟
فكرته بسيطة جدا
عندك عمود الكامات بيلف مع لفات الموتور بانتظام شديد جدا مع بساتم الموتور وسبب الظبطة دي هو سير الكاتينة اللي بيسموه الtiming (المؤقت او التوقيت) ودة علشان يظبط لفة عمود الكامة مع طلعة كل بستم ونزلة الأخر (اول وثالث طالع تاني ورابع نازل)
لحد كدة تمام
بيركب علي الأسبراتير كوباية بلاستيك خارج منها سلوك البوجيهات
تمام ؟
من داخل الكوباية هتلاقي اقطاب نحاسية
تمام؟
ومقابل للأقطاب الشاكوش
تمام؟
راكب علي الشاكوش طرف نحاس
تمام؟
مع لفة الكرنك بيلف الأسبراتير بيلف الشاكوش بيلمس طرف الشاكوش بأقطاب سلوك البوجيهات يقوم موزع الكهرباء بأنتظام شديد علي سلوك البوجيهات
وبردو بنفس الترتيب السابق ذكره (اول - ثالث - تاني - رابع)
علشان يدي كهربة للبوجيه يقوم عامل spark شرر - في نفس توقيت طلعة البستم يقوم الأحتراق الناتج مولد قوة تدفع البستم - وهكذا مع مع كل سلندر (4 بوجيه مقابل 4 سلندر مقابل 4 بستم مقابل 8 صباب - 2 لكل سلندر واحد بنزين والتاني للعادم)

كل دة انت ماظبطش - انت بس بتفهم الدنيا ماشية ازاي

امال اظبط ازاي ؟؟؟

عن طريق اللف (يمين ويسار او قدام وورا) علي حسب ركوبته

لما بتلف الأسبراتير انت بتقدم توقيت الشرر عن طلعة البستم او بتأخرها عن توقيت طلوع البستم
فالظبط في غاية الأهمية - لأنها لو مقدمة (تسبق الطلوع) هتدي شرر قبل البستم وبالتالي حصل احتراق قبل طلوع البستم فتلاقي العربية عالية وبتعمل صفع (بتسك او بتكتك لما تدوس بنزين)
ولو مأخرة (بعد طلوع البستم) هتحس بهدر وفقد في الطاقة والعربية واطية (يعني ار بي ام واطي او قليل) ومش بتسحب معاك

وعليه

هتلاقي انسب ظبطة هي لما الأر بي ام يكون عند عدد اللفات الطبيعية للعربية (بتختلف من عربية للأخري) خلينا نفترض انها 900 لفة في الدقيقة علي السلانسيه
يبقي هتظبط (هتلف) الأسبراتير لحد لما تلاقي الموتور داير مستقر (مش بيتهز) والأر بي ام عند 900
هتطلع تجرب - والله لقيتها مش بتسك (لما تدوس شوية علي الغيار او لو اديتها غيار اعلي بسيط من الغيار اللي محتاجاه وليكن تنقل 3 علي سرعة 30) وكمان لقيتها مش مكتومة او مخنوقة - يبقي انت كدة ظبطتها صح
وفي كل الأحوال - انسب ظبطه لما يكون الأسبراتير في منتصف مشواره بالظبط (علي الأقل في عربيات فولكس)

بالنسبة للأبلاتين والكوندنسر
الكوندنسر لو بسلكه - يبقي هتفك المسمار بتاع الأرضي وتفك مسمار الكوندنسر نفسه وتغيره
وهكذا في الأبلاتين

اسف علي الأطالة
بس كنت عايز اوضحلك فكرة شغله عشان تبقي بتظبط وانت عارف انت بتعمل ايه

تحياتي