المشاركة الأصلية كتبت بواسطة elmtr mohamed
السلام عليكم جميعا وتحية من عند الله مباركة على كل الناس الاوبلاوية المحترمين ... انا بتابع المنتدى هنا من فترة لكن من غير مشاركة وبصراحة استفدت كتير من خبراء الاوبل هنا ومن المعلومات الجميلة اللى عن العربية وقطع الغيار واماكن بيعها والصنايعية الشاطرين وكمان التعبانين .. انا معايا فيكترا 1999 كاملة اوتوماتيك 2000 cc واخترتها بعد صراع مع موديلات كتير واستشارات ومعايا تقريبا بقالها سنتين .. وبصراحة شفت معاها كل اللى ممكن تتخيلوه ايام حلوة رفعت فيها راسى وايام صعبة بهدلتنى فيها بهدلة السنين ..
مش هطول على حضراتكم لكن الموضوع ده فعلا شدنى وقلت هيبقى بداية مشاركاتى فى المنتدى المحترم ده فى الموضوع ده بالذات ..
بصراحة من عشرتى مع الاوبل ومع كل اللى قريته وعرفته هنا او من بره اقدر اقول ان كلام حضراتكم كلكم صح بلا استثناء سواء اللى شكر فى الاوبل او اللى ذم فيها وهى فعلا ممكن تبقى عربية حلوة ومفيش زيها وتريح صاحبها .. وكمان ممكن تبقى عربية زفت وتطلع عين اللى جابوا صاحبها .. ومن الاخر الاوبل اكتشفت ان من الاخر هى فيها حاجتين حاجة متعلقة بالعربية نفسها وحاجة متعلقة باستعمالها .. بالنسبة للعربية نفسها فالاوبل زى البطيخة يااما هتطلع بطيخة محترمة ياما هتطلع قرعة وكلها بذر يعنى الاول هو نصيبك فى العربية اللى هتقع فيها لان فعلا فى عربيات مفيهاش اعطال خالص وفى عربيات تانية بتعطل بدون اى سبب يعنى بالبلدى متعفرته ....... زى عربيتى بالظبط ...... تانى حاجة بقى استعمالك انت يا برنس هو اللى بيخلى البطيخة دى يا تطلع احلى بزيادة يا اما تطلع اصلا مش بطيخة وتبقى بعيد عنك قرع هههههه...
هى عربية محترمة ان لم تكن من افضل العربيات فى العالم فعلا زى ما الناس اللى شكرت فيها قالت .. لكن كمان فيها مشاكل وسوء الاستخدام هو بقى اللى يعقد المشاكل دى او يخليك متحسش بيها او تبقى عادى وكلكم صح فعلا وعلى عينى وراسى وصباح الفل عليكم