الموضوع: سؤال تقدر يطاوعك قلبك وتشترى عربيه من واحده ست ؟؟؟

انا ليا تجربتين في المجال ده لأن العربيتين اللي اشتريتهم في حياتي كانوا من ستات :))))))))))

العربية الأولى (لانوس 99) كان سايقها قبلي شاب اتعلم فيها ( !!!! ) و بعدين راح جاب عربية زيرو , و قبله كانت واحدة ست
و العربية التانية (ميجان 2010) كانت بتاعة واحدة ست برده

العيوب المشتركة :
- اهم عيب مشترك ان العربيتين من برة كان فيهم بعض الخدوش , اكصدامات اللانوس كان الدوكو متبهدل خالص لما جبتها , و العربية اصلا كانت راشة برة كلها و الصنايعي ما كانش قد كده خالص , المهم شوية كده و رشيت الاكصدامين و لمعت العربية و بقت حاجة تانية خالص
- الكاوتش في الاتنين كان في الضياع و غيرته

انا ما اكتشفتش عيوب تاني في الميجان لحداثة الموديل طبعا ,
لكن ممكن اقول في اللانوس

- الصيانة الدورية سيئةةةةةةةةةةةةةة جدا جدا جدا, كأنها ما بتتعملش لدرجة ان العربية كان في الردياتير مياة حنفية , و طبعا غيرتها
- قطع الغيار اللي متغيرة في العربية زي طرمبة البنزين مثلا اغلبها مضروب , طبعا واضح السبب
- غيرت طقم دبرياج (ممكن اكون انا السبب لأني كنت باسوق جديد) , و عفشة بقى مساعدين ببطاجان بكوبايات بصرر ببلي عجل :))) , و العفشة بقت تمام التمام


المميزات في الاتنين :
- حالة الصالون ممتازة , اللانوس كانت معمولة جلد نضيف كانت حالته كويسة جدا و فضل بحالته 3 سنين لحد ما بعتها و حالة التابلوه و الابواب كأنها عربية زيرو , و الميجان كان صالونها كأنها جديدة
- الكيلومتر قليل في الاتنين , كنت شاري اللانوس عمرها 10 سنين و كانت عاملة 73 الف كيلو , و الميجان كانت عاملة 20 الف كيلو في سنتين و شوية عملت قدهم في 8 شهور

فيما عدا اللي ذكرته كانت حالة اللانوس مثلا كانت كويسة جدا و لما جيت ابيعها اكتشفت ان ناس كتير من اللي حواليا كانوا منظرين عليها و كل ما ادخل بيها عند صنايعي يبقى طمعان ياخدها :))