اخوانى الاعزاء
بعد فك الموتور والكشف عليه افاد مهندس وائل بأن الاعاطال الموجودة هى :
1- عمود الكامة
2- التكيهات
3- الكستبانات
كراسى الكامة
وهناك اختيارين للاصلاح
1- تغيير هذه الاجزاء
2- تغيير وش السلندر بالكامل
نرجوا الافادة من الاخوة الخبراء فى هذا المجال
وشكرا لحسن تعاونكم
يوسف عبد الله - اسوان
طيب مش حضرتك لسة فى الضمان ولا خلص خلص
والتكلفة أية بالضبط
انا لسه فى الضمان
الاسعار على حسب مكالمة المركز 2500 تغيير هذه الاشياء
وش السلندر 10.000 جنيه
أية أسباب الاعطال دية كلها سواقة حضرتك هى السبب ولا أية بالضبط - معنى ذلك أن التوكيل قال أن العيوب دية من حضرتك وبالتالى التصليح على حسابك. لو كانت الاختيار الاول المهندس قال أن دة لن يؤثر مستقبلا ولا الاختيار دة علشان تكلفة تغير وش السلندر كبيرة . وهل وش السلندر دة ممكن يتجاب أستيراد ولا لا مش عارف ربنا يكون فى عونك والاخوة يكون عندة افادة لان الختيار صعب فعلا .
وش السلندر لو سعره ده جديد توكل علي الله لان القديم مش هيرجع زي مكان وهيظهر فيه مشاكل بعد كده سخونية المحرك صوت كوستبنات تاكل في عمود الكامة الجديد الاصلي افضل
عايزين نعرف حضرتك هتتحمل أيه كتكلفة سواء تم تغيير هذه الأجزاء أو وش السليندر كامل
المفروض انك في الضمان ازاى هتدفع تمن التصليح !!
العيوب دى ما تظهرش الا من ضعف ضغط الزيت او نقص الزيت او الطلمبة مش حلوة او الفلتر مكتوم لان الكامات فوق دى اخر مشوار الزيت وممكن كمان نوع الزيت مش كويس و ممكن كمان ميعاد تغيير الزيت مر عليك بقالة فترة و انت ما غيرتوش بحكم عملى كخراط محركات اعتقد هى دى الاسباب لاانا بنشوف العيوب دى كتير قوى و كلها بتيجى من ناس ما بتغيرش الزيت فى الميعاد او بتحط زيت ردئ
والله الزيت دايما كان بيتغير فى موعدة وبستخدم موبيل وان يعنى مش با اهمل فى العربية بس اهو نصيب
شكرا اخى tmedhat على تلخيصك الجميل على حسب خبرتك كخراط محركات ولكننى كنت كما قلت سابقا اغير الزيت فى موعده الا اذا كانت الزيوت مغشوشة هيه والفلاتر ... هنعمل ايه نصيب بس حبيت اسالك لو تم علاج العيب بالخراطة فى التوكيل هل ذلك سيصلح من حال السيارة ولا اشترى وش سلندر واخلص