الموضوع: مجرد رائي تفكير بصوت عالي فاسعار الوقود

• · مبدئيا معظم الدول في العالم عندها نظم مختلفه للدعم سواء مالي او عيني او سلعي فا احنا بنتكلم علي حاجه منتشره في العالم كله وليها اسس وانظمه و طرق وكمان معروف ايجابيات و سلبيات كل نظام مسبقا فالمفروض ان النتائج بتبقي متوقعه مدروسه مش مجرد مصادفات.

• (مثلا امريكا عندها نظام اعانات البطاله -ما هو ده برضو نوع من الدعم- النظام ده الدعم بيتغير كل ما عدد ساعات الشغل part time system تزيد بس ليه curve بيوضح ان عند حد معين من ساعات العمل اللي بياخد الاعانه دي احسنلو ان ميشتغلش علشان الساعه الزياده اللي حيشتغلها قيمتها حتيقي اقل من الجزء اللي حتشيله من الاعانه . وهما عارفين كده و الحكومه عارفه كده بس النقطه دي حنتكلم فيها بعدين).

• · لن تستطيع ارضاء كل الناس لذا انظر دائما الي الامام والي المصلحه العامه . فالدعم بالذات عمرك ما حتعرف ترضي كل الناس او توصل لحل مالهوش امكانيه للالتفاف حوله - طب ايه العمل- العمل (طبعا واولا و اخيرا عمل ربنا) ان احنا نحط قواعد تراعي الاغلبيه –كل قرار ليه ضحايا للاسف- بس حنحاول نخدم الشريحه الاكبر ونقلل عدد المتضررين من القرارات الي الحد الادني – بس برضو لازم حيبقي في- طب ايه اكبر غلط ممكن نقع فيه و احنا بنخطط لقرار زي ده هي حاجه اسمها - الناس اللي دارسهaudit اكيد عارفه حاجه زي كده- non–representative sample او العينه الغير معبره .

(مثلا انا عندي 100 ورقه انا حاخد منها 10% عينه يعني 10 ورقات فالمفروض اقسم 100 ورقه ل10 مجموعات و اخد ورقه واحده من كل مجموعه علشان sampling بتاعي يبقي صحيح لكن لو اخدت اول عشر ورقات من ال100 ورقه وخلاص طب ما انا كده التزمت با10% بتاعتي فعلا بس ممكن يكونو اول 10 ورقات دول كان لسه مفيش ضغط شغل او لاي سبب تاني ميكونش في اخطاء بس بعد كده ممكن تلاقي بلاوي بعكس ما اوزع عينتي علي intervals اكتر)

• طب لو حاولنا نطبق ده عمليا و نقسم العربيات في مصر بشكل مبدئي ( مجرد بنفكر بصوت عالي) ممكن نقسم للتالي:

عربيات قديمه .................................. ده مواطن غلبان ....................... غالبا بيحتاج بنزين 80.

عربيات في رينج 100000.................... ده مواطن كادح ....................... غالبا بيحتاج بنزين 92.

عربيات تربو(بس عاديه)....................... ده مواطن متوسط ..................... غالبا بيحتاج بنزبن 95.

عربيات فارهه.................................. ده مواطن ميسور ...................... غالبا بنزين 95 او 92 (مش شرط 95).

عربيات اجانب و هيئات....................... ده مش مواطن اصلا ................... يحتاج اللي يحتاجه اصلا حرام نديلوا.

• نلاحظ ان تقريبا بنزين 90 ملهوش اهميه كبيره اوي او خصوصيه فممكن نعتبر 92 بديل كافي سواء ان يبقي 91 او 92 بس.

• (طبعا دي مش كل حاجه بس مجرد فكره مبدئيه و بردو مينفعش نحاول نفكر في حلول الا لما ناخد في الاعتبار النقطه الجايه).

• · كل حدث اقتصاديا ليه تاثيرين الاولاني income effect او تاثير الدخل و التاني و الاهم substitution effect او التاثير البديل يعني مثلا معايا 100000 جنيه وعايز اشتري عربيه فالاسعار ارتفعت فحيبقي عند تاثير دخل مثلا اني ازود شويه علشان اجيب نفس العربيه اللي غليت (طبعا هو في حاجات تانيه ممكن تحصل بس خلينا في حاله بسيطه) طب وايه التاثير البديل اني بدل ما كنت حجيب اسكودا مثلا فبمستوي الاسعار دلوقتي حجيب كيا .........دي نقطه نقطه تانيه معلش علشان نشوف الموضوع بصوره اكبر و اوضح.

في مفهومين ملهومش علاقه اوي بالموضوع بس مهمين علشان نفهم التاثير البديل او بمعني اصح نتخيل الوضع عامل ازاي

• · فالضرايب عندنا مصطلحين واحد يودي السجن والتاني يكسب فلوس- طب ايه هما:

• · الاولاني tax evasion يعني تهرب ضريبي و- العياذ بالله – وده طبعا يودي في السجن زي مثلا انك تزور في دفاترك الضريبيه

مثلا لو عندنا تشريع بان العربيات اللي فوق 2500 سي سي ملهاش دعم بنزين – مجرد مثال – فا انت رحت زورت رخصه عربيتك و كتبت انها 1600 بس علشان تاخد الدعم (نتخيل ان ده المثال).

• · المفهوم التاني tax avoidance او التجنب الضريبي و ده مشروع و متاح زي ما تدخل شريك معاك فبكده تاخد اعفاء ضريبي او tax exemption ليك وللشريك التاني او تعمل تبرع علشان تنزل ل TAX BASE او وعاء ضريبي اقل و عموما الامريكان هم اكتر شعب بيعرف يستفيد بالحاجات دي طب ولو طبقنا المثال بتاعنا يبقي مثلا انك تروح تسقط موتور 1600 سي سي لعربيتك ال 2500 دي او انك تبيعها اصلا وتشتري عربيه بموتور صغير ده مش تهرب ده تجنب للضريبه وده مشروع و قانوني 100%

• · .لازم لما نحب نطبق اي معايير جديده لتوزيع الدعم نفكر ان الناس حيحصل ايه لدخلهم و يا تري ايه البدايل المتاحه ليهم و ايه طرق التهرب والتجنب للقواعد او السياسه الجديده للدعم و اكيد حنلاقي كل الحاجات دي بس لازم نفكر و نعمل دراسه اصلا لكل ده و نختار الطريقه اللي ليها اثار جانبيه اقل من الطرق التانيه.

عندنا مثال علي كده قاعده الجمارك للعربيات 1600 سي سي فكان النتيجه ان احنا بنستورد عربيات بمواتير اصغر من المواتيير اللي العربيات بتنزل بيها بره مثلا او اننا نستبدل المواتير الكيبره بمواتير صغيره بس تربو و هكذا.

• · بصراحه اسعار البنزين في مصر بصراحه اسعار غير عادله و انها ممكن تزيد شويه او تتقنن بشكل او باخر ايا كان الشكل ده ايه,النقطه دي حاجه قابله للدراسه فمثلا هل نظام الكوبونات هو الافضل ولا ان احنا نغلي المنتج بنسبه بسيطه و ايه الحلول اللي نحاول نطبقها في الحالات المختلفه زي العربيات القديمه اللي سعات مواتيرها كبيره او العربيات التربو او العربيات اللي سعرها غالي و سعات موتورها صغيره هو مبدئيا علشان ناخد قرار اقرب للصحه لازم يبقي مبني علي objective data او معلومات فعليه او احصائيه مش مجرد subjective decision او قرارات شخصيه بتتدخل فيها وجهات النظر او الحكم و التقديرات الخاصه بالافرد , لا احنا عايزين قرار يكون فيه ارقام علشان الارقام مش حتكذب فلما نقول احنا عملنا كده علشان نقلل الضرر علي قدر الامكان و بالارقام ان القرار ده عدد المتضررين منه كذا و عدد المستفيدين منه كذا فده ممكن يخفف شويه من رد الفعل المتوقع.

• · يتبقي توضيح نقطه الضرائب و الجمارك والرسوم و مدي امكانيه تعديلها مثلا علشان يبقي في تكامل مع النظم الجديده لتسعير المنتجات علي اساس ما انت تبقي دافع جمارك خرافيه و ضرايب كبيره و كمان البنزين يبقي بسعر اعلي فا ازاي نوفق بين التلاته مع ان التلاته تقنيا و اصطلاحيا ملهومش علاقه ببعض بس النقطه دي موضوع لوحده.
• واخيرا اسف جدا لان الموضوع طويل جدا جدا
  

أنا شايف ان المشكله زى ما انت قلت النظم دي متجربه فى كل حته واحنا عارفين مميزات كل نظام وعيوبه (يعني احنا مش جاهلين) بس مشكلتنا اننا بنطبق لنظام اللي فيه مصلحه كام رجل أعمال الحكومه بتستفيد من وراهم مش بندور على النظام اللى تستفيد بيه الشريحه الكبرى من الشعب للأسف.

المشاركة الأصلية كتبت بواسطة ahmed_adham

أنا شايف ان المشكله زى ما انت قلت النظم دي متجربه فى كل حته واحنا عارفين مميزات كل نظام وعيوبه (يعني احنا مش جاهلين) بس مشكلتنا اننا بنطبق لنظام اللي فيه مصلحه كام رجل أعمال الحكومه بتستفيد من وراهم مش بندور على النظام اللى تستفيد بيه الشريحه الكبرى من الشعب للأسف.

اولا شكرا لمرورك
صدقني الاثار المترتبه علي كل قرار حاجه معروفه و واضحه و مش محتاجه عبقريه فعلا
المفروض فعلا ان المصلحه العامه و الارقام بس هي اللي تقول ايه النظام اللي يطبق مش مصلحه اي فرد علشان كده انا عايز قرارات مبني معلومات موضوعيه مش اراء شخصيه.

بصراحة وجهة نظر تحترم ..

المشاركة الأصلية كتبت بواسطة S O P H O S

بصراحة وجهة نظر تحترم ..

شكرا يافندم

المشاركة الأصلية كتبت بواسطة moh19227

موضوع اكثر من رائع ياباشا
بس حضرتك سبت النهايه مفتوحه :)
يعني المفروض دلوقتي او رايك ايه اللي يحصل ؟!
يلغي الدعم علي ال 95 بس ولا نظام الكبونات اللي هيخرب الدنيا ده ولا ايه ؟

اولا العفوشكرا لمشاركه حضرتك
ثانيا بلاش موضوع حضرتك
ثالثا انا مسبتش النهايه مفتوحه ولا حاجه بس لان النهايه مش معايا و بصراحه حسيت ان الموضوع طول شويتين مني طبعا كان المفروض اقول اقتراحات حتي(ان شاء الله اعمل كده) بس انا مش عندي معلومات احصائيه عن اعداد العربيات علشان احقق الجزء الobjective من القرار بس اذن الله احاول اطرح حتي افكار للنقاش لان اساس فكره الموضوع هو تفكير بصوت عالي بس فيه شويه منطقيه مش مجرد ان نفكر ان نعدل سعر حاجه نقول لا لان في الاخر الدعم لو اتوزع بشكل مش سليم مفيش حد غيرنا اللي حيحاسب علي الكلام ده

المشاركة الأصلية كتبت بواسطة blazer

انا رأى ان كل عربية يبقى ليها عدد ليترات معين بعدها يدفع بالسعر العالمى

انا ضد اننا نقول ان الاغنيائ يدفعوا ,, لان هما كدا كد دافعين ضرايب زينا زيهم

بس النظم دى متطبقه فى دول كتير متقدمة زى المخالفات مثلا
الغنى بيدفع تمن المخالفة بناء على حجم ثروتة

اولا شكرا لمرورك
طبعا الفكره دي مطروحه فيها كتير من المنطق وكمان هيا ديما بتبقي الاختيار الافضل للحكومات-حبقي اقولك ليه- بعدين
موضوع الاغنيا يدفعوا دي حاجه موجوده في كل العالم ويمكن نظام ال flat tax rate ده اكبر دليل ان احنا في مصر بش دايما بنقول ان الغني يدفع
بالنسبه لنقطه مهم كده كده بيدفعوا ضرايب من الاخر الضرايب هو اموال تدفع قصرا للحكومه بغير مقابل خدمه او مردود معين و هي جزء من فرض الدوله لسيطرتها و هيبتها و دائما بتكون تحت معيار القدره علي الدفع
موضوع المخالفات ده انا بصراحه مكنتش عندي فكره عنه فمبدئيا شكرا علي المعلومه بس لسه علشان نقدر نقول راي فيه لازم يتبص ليه من منظور العداله الاجتماعيه و هل من العدل ان ادفع علي نفس المخالفه مبلغ اكبر لمجرد اني غني و بعدين مش ده ممكن يكون ليه تاثير بديل ان اننا نلاقي مخالفات اكتر في الطبقات الاقل و غير كده ان ده اعتقد حيبقي تقليل من الشق المجتمعي من المخالفه يعني حيدي احساس للناس ان المخالفات دي مجرد سبوبه و الناس بتوع المرور يصطادو العربيات الغاليه ده غير ان ده ضد مبدائك اصلا ان الاغنيا يدفعوا و لا ايه؟؟