الموضوع: فكرة مجنونة بس لو موجودة ياريت تفيدوني

هى الفكره جريئة بس للأسف متنفعش فى مصر و لا فى اى دولة تانى لان ببساطه شديده زى الانسان ما بيتعرف من اسمه و رقم بطاقتة العربيه بتتعرف من رقم الموتور و رقم الشاسية فمينفعش حضرتك تصنع شاسية (حتى لو عندك الامكانيات و المكن و المهندسين و امكانيه اختبارات الامان و حاجات كثير قوى قوى مطلوبة) لانك مش هتقدر تديلة رقم لانك مش مصنع سيارات معتمد ...

المشكله لو عندك فى الصاج (رفارف - ابواب - كبوت - شنطة - صدر العربيه) ممكن جدا جدا تلاقى الحاجات دى استيراد الخارج فى كذا مكان (عزبه شلبى - وكالة البلح - المريوطية - بورسعيد - ...) فيه مليون واحد بيبيع حاجات استيراد ممكن تشترى الصاج كله بسعر مايكملش 3-4 الاف جنيه و تركبه و تسمكره لو فيه مشاكل و تدهنه و بكده بقت عندك عربيه جديده تماماً بس بشرط الشاسية يكون سليم (مش مللوح او ملحوم او فيه زرجينات استعدال بوظت الزوايا و الاتزان)

الفكره البديلة الناجحه هى بيع السيارة بأى ثمن متاح لو كان الشاسية فيه مشكله و ربنا يعوض عليك فى الخساره لانك فى كل الاحوال هتصرف على العربيه و فى الاخر مش هتبقى آمنة و هتفتح منك تانى فى مصاريف فدلوقتى المبلغ اللى هييجى من البيع على المبلغ اللى كنت هتصرفه عليها ممكن يجيبلك عربيه تانى بحاله كويسه او على الاقل بحاله احسن من عربيتك الحالية .. و ربنا يوفقك لما فيه الخير