الموضوع: سؤال للمزداويه

المشاركة الأصلية كتبت بواسطة mohamed456

باشا انتا معاك مازدا الجديده ولا القديمه ؟
اصل انا عندى مازدا هاى لين2010 فيها كمبيوتر المهم انا عندى بيكتب معدل الاستهلاك لكل 100 كم هو 11.00 عايز بقا اتأكد ان ال بيكتبوا الكمبيوتر دا صحيح و لا غلط و معلش حكتب لك مثلا بالارقام عشان عايز ااكد معاك
ال انا فهموا ان مثلا قراءه العداد عامل 280 كم بعد انتهاء التفويل الاول
كميه بنزين /للتر 38 لتر التفول الثانى
280/38=7.37 معدل الاستهلاك
انتا بقا بتقارن معدل الاستهلاك المحسوب مع معدل الاستهلاك الكمبيوتر وعلى اساسه بتقول ان محطه البنزين كويسه ولا لا كدا صح

أنا معايا 2011 هاي لاين يا باشا.... هي هي نفس الشاشة.

أيوة أنا بقارن معدل الاستهلاك اللي العربية بتقوله مع معدل الاستهلاك اللي ممكن تحسبه لما تمون.. خلي بالك بس من وحدة القياس عشان تقارن الأرقام صح... العربية بتقيس عدد لترات مستهلكة لكل 100 كيلومتر.. يبقى عشان تقارن الرقم ده (اللي هو 11 في المثال بتاعك) مع معدل الاستهلاك اللي انت بتحسبه لما بتمون محتاج تقسم عدد اللترات اللي انت مونتها على عدد الكيلومترات اللي انت مشيتها وبعدين تضرب الرقم اللي حيطلع لك في 100 (عشان نوصل لنفس وحدة القياس اللي العربية بتطلعها)... في حالة المثال بتاعك الأرقام حتكون كدة:

38 ÷ 280 = 0.1357
وبعدين 0.1357 × 100 = 13.57 .... هو ده الرقم اللي تقارنه بالرقم اللي طالع ع الشاشة (اللي هو 11)

لو حساباتك مظبوطة (حقول لك تظبطها إزاي تحت) يبقى ده معناه إن البنزينة اللي انت بتمون منها بتسرق في البنزين... لأن الاستهلاك اللي حسبناه فوق بناءا على كمية البنزين اللي بتمونها فعليا أكبر بكتير من الاستهلاك اللي العربية حسبته (ده 13.57 وده 11)

بس الصراحة الفرق جامد قوي... صعب البنزينة تبقى تسرق كل ده.. لازم تتأكد من اللي جاي الأول....
1. إنك بتصفر شاشة متوسط الاستهلاك وعداد الكيلو عند التفويلة الأولى.. ما تنساش تصفر شاشة الاستهلاك مش عداد الكيلو بس.
2. إنك تعمل الحسابات دي كلها عند التفويلة الثانية باستخدام التلات أرقام اللي حيبقوا معاك ساعتها: متوسط الاستهلاك اللي العربية حسبته من ساعة ما صفرت شاشة الاستهلاك في التفويلة اللي فاتت، المسافة اللي انت مشيتها من ساعة ما صفرت عداد الكيلومتر في التفويلة اللي فاتت، كمية البنزين اللي انت فولتها في التفويلة التانية....... تاخد التلات أرقاد دول يا معلم وتحسب الحسبة اللي فوق (كمية البنزين اللي فولتها تقسمها على المسافة اللي مشيتها وبعدين تضرب الناتج في 100.... وبعدين تقارن الرقم اللي طلع بالرقم اللي الشاشة مطلعاه)

جرب كدة وقل لي... ونحسبها تاني إذا حبيت

المشاركة الأصلية كتبت بواسطة mohamed456

تمام يا باشا و ان شاء الله حمون النهاردا و ح ججرب و اقولك
قولى انتا عربيتك لونها ايه و ساكن فين
انا ساكن فى مصر الجديده
ولون عربيتى سيلفر وعندى حاجه عماله لي صداع فى مخى
اولا العربيه ناقصه لها سيسونر باركنج
ثانيا عندى خدوش بالهبل فى الاكصدام ( كاعاده كل اكصدمات البلد بتلاقيها بتقشر و يبان لون اسود )
هل انتا جبت سنسور و لا ايه ؟
و اعمل ايه فى الخدوش

أنا في مدينة نصر... معايا اللون الرمادي (الفيراني)...
عايز الحق هي العربية ناقصها باركنج سنسور وبلوتوث كار كيت وجي بي إس ومفتاح بصمة... غير كدة بقية الحاجات ممكن التغاضى عنها.. يعني مثلا أنا متواضع ومش مصمم إن الكراسي يكون فيها تدفئة.

بص يا باشا أنا سمعت مرة حكمة بتقول إن العربية في مصر بتتقسم جزئين... الجزء الأول هو الصالون الداخلي.. وده بيكون بتاع صاحب العربية وملكه... الجزء التاني بأة اللي هو البادي الخارجي دة لازم تكون عارف إنه ملكية عامة للشعب المصري... ههههه.... يعني عادي مثلا إن واحد من أفراد الشعب يمسك مسمار وينزل يرسم لك على عربيتك شوية رسوم فنية سيريالية.. وعادي إن شوية شباب يقعدوا على شنطة عربيتك ويمسحوا جزمهم في الاكصدام بتاعك... حتى دة لو حيطبق الشنطة أو يعمل خدوش في الاكصدام ... طول ما هو ما دخلش جوة عربيتك متقدرش تكلمه.. ده حقه اللي بيكفله ليه الدستور المصري :)

الصراحة أنا كنت كل شوية بجيب البوليش ماركة Sonax وأدهن العربية بس خلاص أنا فعلا فقدت الأمل في إني أركب عربية مافيهاش خدش من برة... وللأسف فيه خدوش كتير البوليش مش بيعملها حاجة

المشاركة الأصلية كتبت بواسطة mohamed456

ههههههههههههههههههههههه
تمام يا باشا كلامك مضبوط
بالنسبه للبنزين بقا
انا العداد عمل عندى 369.1 كم و 40.01 لتر بنزين
40.01/369.1*100= 11
نفس ال مكتوب عندى فى الكمبيوتر و متشكرين يا زعيم
اه صح بالنسبه للكمبويتر انا حصلت عندى حاجه غريبه جدا لما بركن العربيه فى الشمس لمده طويله فى الحر كان عندى الشاشه بتتأثر عامل ذى كدا لما تكون دايس بيدك جامد على الشاشه ( تعمل بقعه غامقه ) بس بعد كدا بتروح بعد شويه ......... كلمت رزق هناك قالى طبعا مستحيل و مينفعش و عاش فى قصه وقالى هيا لو باظت مكنتش اشتغلت معاك تانى و بيقولى عادى الموضوع نورمال جدا المهم عندك اخدت بالك فى الموضوع دا ................ و كمان صوت احتكاك الكوتش فى بعض الطرق مزعج شويه لان انا بحب ساعات امشى من غير كاست عشان اسمع الاصوات بس بصراحه صوت المتور تحفه و كمان النقل متحسش بيها
و عايز اشترى سنسور ويرليس و يسلام يتظبط على شاشه الكمبيوتر طبعا انا عارف ال اناال بقوله دا فى الاحلام !!!!!!!!!!!!!!!!!!!!!!!

أنا كمان كان بيحصل عندي موضوع الشاشة دة في الصيف... عند درجة حرارة 40 وانت طالع.. بس بترجع عادي بعد ما أمشي بالعربية شوية وأشغل التكييف... مش عارف إذا كان الموضوع ده له أثر سيء طويل المدى على الشاشة ولا لأ.

بخصوص احتكاك الكاوتش... الصراحة محستش أوي بالموضوع ده.. مش واخد بالي انت قصدك على إيه... الفتيس بأة حتحس بقيمته لو سقت الإلانترا الجديدة .. الفتيس بتاعها بينتش جامد جدا...
الكماليات دي غالبا حتلاقيها صيني.. وحتحتاج تلعب في الضفيرة وتفك التابلوة... الصراحة أنا بقلق من الحاجات دي... بس أنا لو لقيت النافيجيشن سيستم بتاعها الأصلي ممكن أشتريه

المشاركة الأصلية كتبت بواسطة mohamed456

تمام الله ينور عليك عند 40 و اشغل التكسفين بعد شويه تروح و المصيبه رزق بيقول عادى و انا خايف ان الموضوع مش عادى خالص و هبا الضمان يخلص و الشاشه تتعطل و نكون لبسنا فى الحيطه

قصدى الكوتش بيعمل صوت فى بعض الطرق طبعا مش كلها على حسب الاسفلت عارف بالظبط ح شيهالك بى ايه ؟ عارف لما تكون ماشى على كوتش قديم 40000 كم و عايز يتغر هوا نفس الصوت ...... بس الغريبه ان الصوت بس بيظهر فى الاسفلت فيها يكون محبب مش ناعم ( مع العلم الكاوتش نوع غريب مش بريدجستون زى البيس لين انتا عندك نوعه ايه )
انا بقول ان دا عيب فى تقفيل العربيه من ناحيه الكاوتش انتا مش بتحس بحاجه بس بتسمع عندى فى الهوندا 82 مش بسمع صوت دا
فى حاجه كمان ديقتنى تخيل خلف الفانوس الامامى مفيش اى صاج ولا حاجه يعنى لو لقدر الله حادثه و دخلت من ناحيه الفنوس على الماتور عدل لان كان في عربيه بتتصلح فى الحرفين و شوفتوا خالاع الفانوس الامامى و من وارء ابيض
و بالنسبه للكاست ممكن تطلبه اونلين و يجلك عن طريق موقع ادفعلى انا شوفتوا و عجبنى

أصل مادام المشكلة عندي وعندك يبقى غالبا حتى لو غبور وافق وغيره لك حيكون برضه فيه نفس المشكلة.. خلي بالك إن الشاشة ال LCD دي لها عمر افتراضي... أعتقد إنه ممكن يصل لـ 10 سنين.. وغالبا درجة الحرارة بتقلل من العمر الافتراضي للشاشة... بس ما أعتقدش إنها حتأثر جامد إن شاء الله.

الكاوتش اللي عندي ماركة Toyo ياباني... وفهمت قصدك بخصوص الصوت.. مش عارف الصراحة إذا كان ده عيب في الكاوتش ولا لأ.

مشكلة فعلا موضوع الفراغ اللي ورا الفانوس دة.. بس خلي بالك أنا متهيألي دة ممكن يكون بسبب عوامل الأمان في العربية اللي لازم تلتزم بيها عشان العربية تخش أوروبا (زي تحديد السرعة بـ 180)... والمازدا اللي معانا أعتقد إنها مواصفات أوروبي (عشان مفيش مواصفات خاصة بالشرق الأوسط)... هي واخدة جايزة في عوامل الأمان في أوروبا... ومن ضمن عوامل الأمان شكل العربية الأمامي اللي لازم يقلل من حجم الإصابة اللي ممكن تحصل للمشاة إذا العربية خبطت فيهم لا قدر الله.. جايز والله أعلم يكون دة السبب