محدش يعرف مدراسة سواقة كويسة فى الاسكندرية تطلع الرخصة تابعة للمرور

**M o H a M e D** · 09-10-2012 04:08 AM

محدش يعرف مدراسة سواقة كويسة فى الاسكندرية تطلع الرخصة تابعة للمرور
واحد صاحبى مبتدىء سواقة وهو ساكن فى جناكليس تبع قسم الرمل يبقى هو تابع لمرور ابيس صح
عشان مش عايز يطلع الرخصة عن طريق الواسطة او الرشوة
ولا يدى لاى حد فلوس مش بخل والله بس دة الصح
وايه الاجراءات اللى المفروض يعملها وبكام والرخصة بتطلع فى نفس اليوم
وشكرا ..

**د. علاء ابراهيم** · 09-10-2012 05:03 AM

ماتزعلش منى
لكن طالما مش عايز واسطة ولا رشوة
يبقى الحل الوحيد انه يتعلم كويس
يبحث عن مدرسة او حد يعلمه كويس مش انه يساعده على تطليع الرخصة (اصلا مافيش حد بيساعد فى تطليع الرخصة من المدارس دى الا لو اخد فلوس عشام يجيبهالك و بكده تبقى رشوة بردك)
و بعدين يتدرب كويس على العربية اللى حيمتحن بيها ( ركنات و ملفات و خلافه) لحد ما يتقن السيطرة عليها و يحفظ ابعادها كويس
ساعتها يمتحن طبيعى و حينجح
لكن لو طلع رخصة و هوا ما بيعرفش يعمل ده كله يبقى مالهاش لازمة ( الهدف انه اصلا يعرف يسوق كويس لان دى حياة ناس)

**shaddadfalcon1** · 09-10-2012 08:33 AM

يتعلم مع نفسه ويروح المدرسه اللي عند كوبري الجواهر او الأبراهيميه في كشك هناك كده جنب بتاع الفاكهه وبتدفع تمن بونات سواقه حوالي 400 او 500 جنيه تقريبا مش عارف بقت اغلي ولا لا

انا طلعت رخصتني عن طريقها بعد مافشلت في كل المحاولات اني اطلعها من غير واسطه وكل مره كانو بيسقطوني يافي السواقه او في الكمبيوتر (الموظفه كانت بتحاول تشرحلي علي اساس اني مش مهندس كميبوتر وبعدين تخنار غلط وتقولي كمل يلا)

ميزة المدرسة دي انك بتروح يوم خميس مخصص للمدرسة ومفيش واحد بيسقط لان ببساطه اللي بيمتحن هو الراجل العجوز اللي راكب جنبك في العربيه وانت مجرد بتوجه العربيه زي مابيقولك وخلاص وبتاخد رخصتك في نفس اليوم والف مبروك مقدما

**رمسيس** · 07-05-2015 08:35 PM

تجربتى الشخصيه بتعلم القياده بمركز تالون بالاسكندريه

انا اردت تعلم القياده زى اى واحد من الصفر. اتصلت بمراكز تعليم القياده بالاسكندريه وقررت فى النهايه تالون واليكم

ايجابياته وسلبياته من خلال تجربتى الشخصيه

ايجابياته

سهل الوصول الى موقع المركز فى طريق الحريه عند محطه قطار سيدى جابر يعنى ممكن تركب القطار او الميكروباص او الاتوبيس.كله بيوصلك امام المركز

بالنسبه للسعر كان سعر الكورس كويس ٣٠٠ جنيها لكورس المبتدئين ٦ ساعات عملى و ٢ ساعتين نظرى يعنى ٤ حصص كل حصه ساعتين

بالنسبه للحجز ممكن تحجز فى اى وقت من الساعه تسعه ص حتى سابعه م

بالنسبه للدفع ممكن تقسط المبلغ فى خلال مده الكورس

لو دفعت المبلغ وحبيت تلغى الكورس لا يمكن استرداد المبلغ ولكن يمكن اهدائه كحصص تعليم القياده لاى شخص اخر

وقت ويوم التدريب انت اللى بتحدده من الساعه تسعه ص حتى سابعه وطبعا بالاتفاق مع المركز

سلبياته

سياره درجه تالته يعنى الكشافات مكسوره وبالتالى مفيش اشارات واجزاء السياره متغيره من الداخل وحاله السياره تشبه الخرده وديه كانت بدايه مبشره

بالنسبه لوقت التدريب المفروض ساعتين للحصه بتبدأ من جلوسك فى السياره

ليس لهم مكان تدريب خاص بهم. مكان التدريب هو مكان به مدرسه بنات يعنى انت وحظك ممكن يبقى فاضى وممكن يبقى زحمه يبعد عن المركز بربع ساعه.

يتم احضارك من مركز تالون حتى مكان التدريب وارجاعك اليه فى نهايه الحصه

يعنى ربع ساعه رايح وربع ساعه جاى وده وقت ضايع من الساعتين.

حسب التعليمات يجب وقف السياره ٥ دقائق كل نص ساعه لتهدئه الموتور يعنى ٢٠ دقيقه ضايعه من وقتك والمدرب كمان محتاج فتره راحه للتدخين. يعنى الخلاصه انت بتدرب ساعه واحده بس من الساعتين.

لو بنزين السياره نفذ يعتبر الوقت فى محطه البنزين مخصوم من وقتك

انا اعترضت على الوقت الضايع واردت تعويضه والرد كان, ان هما مرتبطين بمواعيد بعدى ولا يجوز التأخير على المواعيد الاخرى

المفروض ان انت بتاخد ٣حصص عملى وحصه نظرى فى نهايه الكورس. بس للاسف الحصه النظرى كانت حصه وهميه يعنى بيقولو ان مفيش عدد مشتركين كاف لاجراء حصه نظرى وهنتصل بيك بمجرد اكتمال العدد وطبعا العدد لن يكتمل ابدا بالنسبه لهم

انا حاولت استبدلها بحصه عملى لكن للاسف لا يمكن استبدال الحصه النظرى بحصه عملى لانها حصه مجانيه

لو انت بتقود السياره فى الطريق وقامت لجنه او كمين بايقافك لن تعترف بك الشرطه كمتدرب بتتعلم القياده ومركز تالون بيخلى مسؤليته منك يعنى وقعت فى عقوبه قياده سياره بدون رخصه. ده عكس مدرسه المرور بتقوم باستخراج رخصه مؤقته لتعلم القياده لعدم الوقوع فى اى عقوبه قانونيه

الخلاصه ان الوقت مش مظبوط معاهم اطلاقا وكانت فتره قصيره جدا لتعلم القياده للمبتدأ والجزء النظرى وهو اهم جزء لم يتم تدريسه ومكان التدريب غير لائق بمدرسه قياده وقانونيا به مخاطره