Drag race لكل هواة الشد بس رسمي

**sanhory** · 09-10-2012 03:22 PM

السلام عليكم

القصة و ما فيها يا اخوانا ان واحد صاحبي شغال في شركة دعاية و اعلان حاجة كدا زي عالمية اللي مسؤلة عن الاوتوكروس كلمني و انا و كام واحد من اصحابنا بيقولي ان الشركة عنده عايزة تعمل حاجة جديدة زي
تعمل بيها سيط لاسم الشركة

و قالي ايه رائيك نعمل حاجة زي الاتوكروس و يكون فيها شو و بتاع
انا بصراحة حاسس ان الاوتوكروس اصلا مبقاش ليه جمهور زي الاول و كمان فكرة قديمة و ايه اللي يميزه عن الاوتوكروس

المهم قولتله بقولك ايه ايه رائيك لو عملتوا دراج ريس زي اللي بنشوفه برا عربتين بيجوا جمب بعض و طريق استريت 500 متر و يطلعوا مع بعض لحاد نقطة محددة و يكون قانوني و ليه تصريح و مكان مخصص

واللي عايز يجرب عربيته يدفع الرسوم الرمزيه اللي حاتبقى شامله ضرايب الدولة و خلافه و ينزل يجرب

او لو ناس زينا كدا سخنوا مع بعض و قفشت معاهم العربية دي تطلع ولا دي تطلع يبقى ننزل عالمكان المخصص ده و نجرب

و يبقى event اسبوعي و اهو الشد يبقى قانوني و تحت تعليمات معينة .

ايه رائيكم في الكلام ده ؟!

**Fadi Ezzat** · 09-10-2012 03:39 PM

انا موافق جدا

**mohammedabdallh** · 09-10-2012 04:06 PM

وانا هاجى اتفرج
ههههههههههههه

**Evo** · 09-10-2012 04:38 PM

المكان فين ؟

حتى لو هتقفل شارع هيبقى صعب تقفل شارع 600 م !

وحتى لو لقيت الشارع هتحط الجمهور فين ؟ لازم على الاقل 10 م يمين وشمال بعيد عن التراك علشان لو حصل حادثة ميدخلش في الجمهور .

ولازم مكان للخدمات جوه التراك مش بره زي مطافي وإسعاف

على العموم دي حاجة مرغوبه وأتمنى تتعمل في يوم من الايام

**bassol2000** · 09-10-2012 04:40 PM

وانا موافق .. هاجى بموتوسيكلي‎ SuZuKi Gsx-R ‎1100‎ CC ‎

**sanhory** · 09-10-2012 04:55 PM

يا جماعة احنا لسه متكلمناش على مكان معين احنا لسه بنعرض الفكرة نفسها و لو في قبول من الناس و في جدوي منها نبتدي نشوف اليات التطبيق و الاستاذ كريم منير كلمني و هو داعم جدا للفكرة بس طبعا هو مهتم جدا بسلامة المتواجدين سواء متفرجين او مشتركين و انا اديتله رقم حد من شركة الاعلانات دي و هو حيتواصل معاهم لتنفيذ الفكرة

ربنا يوفق ان شاء الله و الفكرة تتنفذ طبعا مش حيقى في قفل طريق ولا غيره حيبقى مكان مخصص للموضوع ده بس و حيبقى فيه كل العناصر و العوامل الامنية و الخ

**Hamdy Masria** · 09-10-2012 05:02 PM

المشاركة الأصلية كتبت بواسطة evo

المكان فين ؟

حتى لو هتقفل شارع هيبقى صعب تقفل شارع 600 م !

وحتى لو لقيت الشارع هتحط الجمهور فين ؟ لازم على الاقل 10 م يمين وشمال بعيد عن التراك علشان لو حصل حادثة ميدخلش في الجمهور .

ولازم مكان للخدمات جوه التراك مش بره زي مطافي وإسعاف

على العموم دي حاجة مرغوبه وأتمنى تتعمل في يوم من الايام

فى مكان عندنا على اتوستراد حلوان ... يخص وزارة السياحة ومجهز وكل حاجة ومعمول فى الأصل عشان تدريب سواقين السياحة ... لو تعرفوا حد هناك او فى وزارة السياحة يبقى فل قوى المكان كبير جدا على فكرة ومليان اماكن انتظار عربيات كمان