وحصل اللي كنت خايف منه في المانيوال وهغير طقم دبرياج

**Elsebily** · 10-10-2012 12:48 AM

[rmade]http://2.bp.blogspot.com/_sfhTz2tOsIA/TOSGX7MHnAI/AAAAAAAAAKo/egPdcNvIxsw/s1600/000.jpg[/rmade]

النهارده بعد اما خرجت في امان الله ورايح الكليه المهم الطريق كان واقف حبتين كالعاده المهم بعد اما الطريق فتح بعد العبور العربيه فضلت ماشيه زي الفل لحد الشروق وفجأه لقيت الار بي ام بيخرف وصوت الموتور بيعلي وكأني فيه حاجه فوتت والعربيه سحبها ضعف جدا المهم قلت اكمل كده للكليه وخلاص وخلصت يومي ورجعت وبردو السحب زي الزفت وكلاكسات حواليا من كل مكان بتستعجلني لاني العربيه كانت بتطلع ببطء المهم عديت ورجعت بعد عناء ووديت العربيه لميكانيكي ثقه وقالي طقم الدبرياج محتاج يتغير (ديسك-بلي-أسطوانه) وطبعا قلتله غير هيتكلف كام وبصراحه كنت فاكر انها حاجه في الحنين لقيته بيقولي الاصلي ب800 من التوفيقيه وبصراحه كنت عاوز اروح اغيره في التوكيل بس بعد اما فكرت في السعر قلت اكيد في التوكيل هيبقي الضعف ده غير المصنعيه المهم انا عاوز اعرف دلوقتي السعر ده كويس ولا؟؟ ده غير اني فيه ناس كتير قالتلي طقم الدبرياج لو مكنش اصلي هيبوز تاني بسرعه وده اللي خلاني اتصل بالميكانيكي وأكد عليه وقالي انه هيجيب الاصلي واقل حاجه هيقعد معايا سنتين وان جراله حاجه في الفتره دي هرجعهولو وإن شاء الله هيجيبو بكره وهيركبو وأتفقت معاه اني هكون جنبه وهو بيركب طقم الدبرياج وهحاول افهم وإن شاء الله انقل التجربه للمنتدي بالتفاصيل

**egyptiandiver** · 10-10-2012 01:07 AM

تعيش و تدوب يا دكتور... بس يا رت تقلنا حضرتك عمل كام ألف بالعربية و طريقة سوقتك اه عواجيز ولا رياضي و كدة.

**Elsebily** · 10-10-2012 01:24 AM

بالظبط دلوقتي العربيه عامله 46 ألف وبالنسبه لطريقة السواقه فاعتقد اني طقم الدبرياج ده اتعامل مع الطريقتين العواجيزي والرياضي لاني كان المالك الاول كبير في السن وانا بصراحه الاسبوع اللي فات شديت بيها مع عربيه نوبيرا وسيفيك وانا شخصيا متوقع انها باز لسببين اول حاجه الشد وثانيا بما اني الطريق بتاعي زحمه وبقف فيه كتير فكنت ساعات كتير مبمورش وبدوس دبرياج وخلاص اما بالنسبه لموضوع ترييح الرجل عالدبرياج فالموضوع ده مكنتش بعمله لاني كنت عارف انه بيبوز طقم الدبرياج

**ahmed88** · 10-10-2012 01:28 AM

يعني أظن أنه مش عيب في العربيات المانيوال اللي حصل ده ..
ماهو ممكن يحصل في الاوتوماتك ان الفتيس كله يتغير وشوف ساعتها مش هتتكلم في 800 جنيه ولكن هتضربها يمكن في 3 مرات ...
و ربنا يكرمك بكل خير ..

**saint2011** · 10-10-2012 01:30 AM

شوف حضرتك متخليش الميكانيكى يشتريه أشتريه أنت بنفسك من التوفيقية او من التوكيل المهم يكون الأصلى وبعدين تقعد على أيد الميكانيكى وهو بيغيره ويركب الجديد وتتأكد انه ركب الجديد أللى انت جايبه

**masterzmind** · 10-10-2012 03:23 AM

شوف حضرتك متخليش الميكانيكى يشتريه أشتريه أنت بنفسك من التوفيقية او من التوكيل المهم يكون الأصلى وبعدين تقعد على أيد الميكانيكى وهو بيغيره ويركب الجديد وتتأكد انه ركب الجديد أللى انت جايبه

+111

**أبو صلاح** · 10-10-2012 03:45 AM

المشاركة الأصلية كتبت بواسطة saint2011

شوف حضرتك متخليش الميكانيكى يشتريه أشتريه أنت بنفسك من التوفيقية او من التوكيل المهم يكون الأصلى وبعدين تقعد على أيد الميكانيكى وهو بيغيره ويركب الجديد وتتأكد انه ركب الجديد أللى انت جايبه

كنت هرد عليك نفس الرد ده بالظبط

**WalidAdel** · 10-10-2012 03:55 AM

انا بقي هارد عليك رد مختلف خاااااااااااالص
روح ركبه في التوكيل سعره في توكيل السبع من سنتين و كام شهر كان ب 900 و مصنعية التركيب 300 جنيه و مش خساره فيهم بصراحه لانه بيرفع العربيه و يفك من تحت بسهول و يغير الطقم و يركب تاني مش هاياحد ساعه ولا حاجه و اضمن من اي صنيعي بره لانه هايضطر يفك الجنب بتاع الفتيس او هايقلوك بص بقي ياباشا احنا نطلع الموتور بره علشان نبقي في السليم و قصص طويله عريضه انا عندي لما جم يركبوا الاسطوانه كنت شايفهم (مافكوش العجله حتي)
و كمان لو معاك استيكر المنتدي هايبقي ليك خصم ظريف 30% تقريبا زي ماهو موجود في البانر فوق في اول الصفحه و هاتبقي قاعد في مكان ظريف مش تعبان من القعده عند الميكانيكي في الشمس ولا حاجه و الصاله مكيفه و عندك نت لو معاك لاب ولا حاجه و فرق الفلوس والله بسيط و عن تجربه و ده غير ان الدبرياج هايرجع فابريييييييييكه تاني و ناعم و حلو ... و لك حرية الاختيار

**s0144862631** · 10-10-2012 12:38 PM

في توكيل السبع اخر الاسعار من اسبوعين تقريبا طقم دبرياج كامل + بلي ب 1000 ج و مصنعية 400 ج وممكن يعملوا خصم لحضرتك و نصيحه اعمله في التوكيل و ريح دماغك