الموضوع: مراكز الخدمة و الورش الغير معتمدة

المشاركة الأصلية كتبت بواسطة se_coralsea

الاخوة و الاخوات الكرام / نجوم هيونداي

أسعد الله يومكم بكل الخير ....

ياريت ياجماعة اللي بيتعامل مع مركز خدمة غير معتمد أو ورشة ميكانيكا او عفشة أو كهرباء أو حتي شكمانات أو سمكري و يكون كويس و محترم و سعره كويس يكتب لنا في الموضوع ده بياناته كالتالي :

- الأسم
- التخصص
- العنوان
- رقم التليفون

علشان ناويين نعمل موضوع منفصل لمراكز الخدمة و الورش الغير معتمدة علشان تكون دليل للأعضاء اللي محتاجين خدمات صيانة و أصلاح بعيدا عن التوكيل و مراكز الخدمة المعتمدة

موضوع جيد جداااا ... ومفيد جدااا

انا ها بتدي ... بمركز سبيد سيرفيس Speed Service.. المهندس هاني ..
حد يزود

الموضوع ده معمول لتجميع أسماء و بيانات الورش و المراكز الغير معتمدة و بعد كده هانعمل بيها قائمة يتم تثبيتها في فهرس القسم لتكون دليل للأعضاء

أما القائمة السوداء فهي فكرة جيدة و ممكن عمل موضوع منفصل بها

الأخوة و الاخوات الكرام / نجوم هيونداي

ياريت حضراتكم لو بتتعاملوا مع مراكز خدمة او ورش غير معتمدة تتفضلوا و تكتبوا عناوينها و أرقام تليفوناتها هنا لأننا عايزين نقدم خدمة جديدة للاعضاء في كافة أنحاء الجمهورية بتقديم مراكز الخدمة الجيدة و ده أيضا هايشمل :
- مراكز وورش الميكانيكا
- مراكز السمكرة و الدهانات
- الكهرباء
- التعديلات
- الكاوتش
- الكار كير
- الأكسسوارات و قطع الغيار
- العفشة و ظبط الزوايا

الموضوع في غاية الاهمية و فائدته ستعم علي الجميع فياريت اللي يعرف أي مركز أو ورشة كويس يقول لنا عليه

- مراكز وورش الميكانيكا :مركز العالميه بيستوعب أكثر من خمس عربيات في وقت واحد شغل ثقيل (تسقيط و تعميروصيانة فتيس و عفشه) عنده كشف كمبيوتر
و الكوري و الياباني بالنسبه لهم سهل و بسيط و شغالين أوبل و فولكس فاجن ... بيشتغلو هيونداي و كيا صيانه دوره ممتازين و حضرتك أكثر من مره تسقيط و تعمير مواتير و فتايس و صيانات ديبرياج و فرامل
مكانهم في شارع المطبعه هرم
- مراكز السمكرة و الدهانات :ربنا يبعدنا عنهم و يبعد شغلهم عننا :) لكن علي العموم هو واحد بس اللي أقتنعت بشغله لكن غالي و لا أنصح به بسبب أسعاره و ورشته في الطالبيه هرم
- الكهرباء : معرفش
- التعديلات : معرفش
- الكاوتش : بريدجستون فرع شارع مراد بالجيزه ممتازين
- الكار كير : لو إحتجت بغسل فرش فقط بمحطة بنزين شل الهرم (إتجاه الجيزه) الغسيل عندهم جيد أما التلميع و إزالة الخدوش فأنا بعمله بنفسي في الجراج
- الأكسسوارات و قطع الغيار :إبراهيم البنا و الدقاق شارع ذكي التوفيقيه , المنتير شارع فيصل بالهرم , تارجت مركز معتمد كيا (قطع كتير بتمشي بين السيراتو الإلنترا بتبقي هي هي ) و لو إكسسوار فوانيس و خلافه بلجأ للإستيراد بستريح له أكثر من الجديد
- العفشة و ظبط الزوايا : بريدجستون الفرع السابق ذكره

أي حد محتاج تفاصيل أنا في الخدمه

برجاء المزيد من المشاركات و ياريت من الاخوة من خارج القاهرة يشاركوا حتي يكون لدينا حصر لكافة انواع الورش بالقاهرة و المحافظات