مشكله جديده من مشاكل اللادا

السلام عليكم

النهارده الصبح و العربيه واقفه في امان الله واحد ابن حلال خبطها من عند الرفرف الامامي جنب الاشاره طبعا دي اصعب منطقه السمكري يشتغل فيها

المهم رحت للسمكري يعملها طبعا فك العجل و الكارتيره لما خلص وجه يركب العجل مسمارين فوتوا و هو بيركب العجل الموقف ده حصل قبل كده مرتين لما اروح اغير الكاوتش لو كان مخروم فبروح لواحد يخرط الخرم بحاجه كده زي المسمار و اجيب مسمار جديد اكبر فرحت لواحد بتاع مسامير و حكيتله حكايه المسامير اللي كل شويه بتفوت قالي انت تركب حاجه كده انا مش فاكر اسمها ايه هي عباره عن مسمار بصاموله بيتركب في الصنبوره و تبقي العجله لما اركبها هربط صاموله مش مسمار

فكنت عاوز استفسر منكم حصل معاكوا قبل كده حكايه تفويت المسامير دي و لأ
وكنت عاوز رأيكم اعمل الموضوع ده و لا اخليهم زي ما هما و قاللي هيكلفين عشان اغير الاربع طنابير في حدود 150 جنيه بالمصنعيه و المساميرلا و التركيب

وشكرا

طيب ماتعمل موضوع الصواميل ده في الفرده اللي بتفوت دي بس !!

جوايت ده الحل الاحسن عشان تحل مشكلة تفويت المسامير او الحل التانى تشترى صره جديدة

موضوع الجوايت دة بيتعمل عادى جدا و مش بيأثر على حاجة ممكن تعملة فى الطنبورة اللى بتفوت بس و تخلى الباقى زى ماهم
ودى مش مشكلة فى اللادا بس دى معظم العربيات الفيات بتحصل عادى

اعمل دوايط للععجله دى بس

الفيات و اللادا بتحصل فيهم كتير
الحل اما تعمل مسمار بصامولة مكان كل مسمار مفوت وعادة يبقى زى الشيفروليه الدبابة
او تروح تشترى صرة جديدة 65ج وتركب المسامير الاصليه عليها

شكرا لكم جميعا انا فعلا اشتريت صره استعمال ب 60 جبيه و ركبت عليهم مسامير جديده و الميكانيكي اخد 30 جنيه مصنعيه و قالي موضوع الجوايد ده غلط قالي متعدلش علي الخواجه اللي عمل العربيه و انا مقتنع بالكلام ده

شوف انا بجدا احترمت الميكانيكى بتاعك بتاع متعدلش على الخواجة
ولكن فى كل سيارة وماركة ميزة وعيب وطلما الاضافة مش هتسبب مشكلة
يبقى اية المشكلة - على راى احمد مكى ( طلما ان بابلك ومفيش فيلينج يبقى عادى)
عموما لو عملت معاك كدة تانى - فك الصرة واطلع على المخرطة واعمل جوديد ( مسمار يبانى طالع من الصرة وانت تربط علية الصمولة)
بعد ما سوسن طلعت تيت اهلى فى موضوع المسماير الى بتفوت - جودت وريحت دماغى وكنت مرتاح جدا بعد التجويد
يا راجل دا مرة سوسن بعد مكنت مدبس فى حوالى 50 لحلوح وركبت اربع مسماير اكبر من المقاس وانا مروح اخر اليل ليقت نفسى على مسمار واحد قولت الحمد للة انى ما تقلبتش - ودى شوفتها ادام عينى فى عربية 128
ربنا يحفظكم جميعا

متابع

انا برضه حصلى الموضوع ده

يعنى اتوكل على الله واغيرهم لصواميل