موضوع غريب اوي -ارجو المشاركة وابداء الرأي
أمبارح كنت عند الكهربائي وهو والشهادة لله رجل محترم جدا وبيراعي ضميره وفاهم اوي عن تجربة في حاجات كتير (العربية فابيا 2002 )
المهم
العربية عندي بتبقي ماشية زي الفل وابطل وادور في اي وقت مفيش مشكلة بس في مرة من المرات بطلت ودورت مش عايزة تدور اسيبها نص ساعة كده وادور تاني تدور علطول
وحصل الموضوع ده كذا مرة علي فترات بعيدة المهم الراجل بص وشاف وكشف وقالي دي البوابة وراح مطلع البوجيهات اللي انا لسة مركبها قريب وورهالي كان فيها زي هباب اسود كده فقالي وده الدليل اهو
أحلي حاجة بقي انه قالي ان الموضوع ده ليه حلين :-
الاول : اني اغير البوابة واجيب واحده تانية ويفضل تكون استعمال
الثاني: اني اعمل بالعربية سفرية او مشوار محترم كده لحد القاهرة او بورسعيد او طنطا واقرص علي العربية شوية (اعلي نقلاتي في RPM) هو عارف ان سواقتي هادية وبنقل علي 3 بالكتير
فكان كلامه بالنص ياهندسة دوس علي العربية شوية اعمل بيها مشوار عفي كده واقرص عليها علي قد متقدر ومتخفش وصدقني حتفوق معاك جامد وموضوع البوابة ده احتمال كبير اوي يتحل
فانا رديت عليه وقلتله فيما معناه يعني اني خايف علي الموتور لحسن يجراله حاجة من القرص مثلا او يفوت او اي حاجة زي كده
راح الراجل منزلني من العربية وداس بنزين علي الاخر وسمعني تفصيلة الموتور وانه اول مبيوصل للريد زون الموتور بيفصل يعني مهما قرصت مش حيديك اكتر من قوته ومش حيفوت ابدا وان العربيات الالماني بالذات بتحتاج كل فترة سفرية وطريق مفتوح وتجيب اخرها زي مبيقولوا او تقرص عليها علي حد تعبيره عشان تبقي فايقة معاك وفي احسن حالتها
فبصراحة انا استغربت الموضوع اوي وحبيت احكيلكوا القصة دي وندردش مع بعض ونعرف ونتأكد من الكلام اللي انا اول مرة اسمعه ده ؟ لان انا فعلا من النوع اللي بيخاف يقرص علي العربية بحس اني لو دوست بنزين جامد الموتور حيصوت :grinder: وعمري ماجبت اخر الدواسة اصلا:B4_048:
فهل الكلام ده صح ولا ايه يا شباب ؟
