بعد عشرة 5 سنين مش قادر اسيب الفولكس

**mohd7380** · 13-10-2012 01:00 AM

السلام عليكم و رحمة الله و بركاته تحياتي لكل اعضاء المنتدى المحترمين
ارجو من اخواني مساعدتي فى اخذ قرار تغيير سيارتي او شدها
الحكاية باختصار معاي بولو 2001 1000 سي سي اشترتها سنة 2008 عاملة 85000 كم و دلوقت و احنا فى 2012 عاملة 215000 كم طبعا مش عايز اقولكوا قد اية العربية دي حببتني فى شركة فولكس لاسباب كتيرة اكيد ال ركب العربيات دي عارفها متانة و ثبات و اقتصادية و استحمال و اصالة احلى ايام قضيتها مع العربية دي و دلوقت جه الوقت ال يدوب اعمل حاجة يا ابيع يا اشد و انا بتكلم على الاختيارين للتغيير لاني بدات ازهق ياريت النصيحة بشان تركيب موتور و عفشة 1400 او البيع و لو البيع ممكن حد يساعدني الاقي بولو 1400 سي سي اي موديل فوق 2001 او 2001 بحد اقصى 50000 الف جنيه بشرط تكون نازلة 1400 مش متسقطلها موتور و مش سيدان
اسف على الاطالة و ياريت المساعدة

**haissam24h** · 13-10-2012 02:06 AM

لو عربيتك اساسها نظيف ومش فيها اى خبطات فى الاساسيات و الصالون تمام والفرش كويس والكاوتش كويس

ومش فارق معاك سنه الموديل

يبقى شد العربيه وسقط الماتور وركب التانى وظبط العفشه
بدل ما تجيب عربيه غيرها ويطلع معكوك فيها وتقرفك وتكرهك فى الدنيا خصوصا الايام ديه الى بيبع عربيه لا بيبقى فيها مخلص عليها لائما هى خلصت عليه مصاريف هههه

والى نعرفه يا كبير احسن من الى منعرفوش لان طالما بقت عشره معاك يبقى انته اكيد عارف كل مسمار اتغير واتركب فين
وان شاء الله ربنا يهيدك للخيار الصحيح

**mohd7380** · 13-10-2012 02:33 AM

العربية الحمد لله اساسها سليم 100 % و مفيهاش اي حاجة غير ان المكنة خفت شوية فانا نفسي اغير المكنة بس بردة مقتنع ان مفيش تسقيط مواتير سليم فى مصر خصوصا ان 1400 محتاجة عفشتها و فتسها و ضفيرتها يا كدة يا اما متسواش بصلة و المصاريف دي كلها ممكن تجيب 1400 على ابوها بس نفسي الاقيها
شكرا على المرور

**atvi1000** · 13-10-2012 08:15 PM

انا كنت عاوز اعرف من حضرتك طالما انت خبره كبيره مع البولو 2001 ايه مميزات العربيه ديه وكمان الموديل الي قبلها ال 99 لاني بفكر اجيب وحده وسمعت كتير ودورت وسالت وعرفت انها عربيه محترمه جدا فاحب اخد من خبره حضرتك وخصوصا الموتور ال 1000 ده ضعيف مع التكييف ولا ايه وكمان في السحب والسفر وانت محمل معاك ناس وكده وكمان بخصوص استهلاكها في البنزين بتعمل كم داخل البلد وكم خارج البلد واسعار قطع الغيار
وشكرا

**eemmoo** · 13-10-2012 10:42 PM

من رأيى انك تبيعها عشان حتى لو سقطت مكنه هتقابلك مشاكل
بس خليك مع عائله الفولكس
ممكن تجيب بولو الموديل اللى بعد بتاعتك اللى بيسموها بولو عيون او جولف 4

**mohd7380** · 14-10-2012 02:51 PM

المشاركة الأصلية كتبت بواسطة atvi1000

انا كنت عاوز اعرف من حضرتك طالما انت خبره كبيره مع البولو 2001 ايه مميزات العربيه ديه وكمان الموديل الي قبلها ال 99 لاني بفكر اجيب وحده وسمعت كتير ودورت وسالت وعرفت انها عربيه محترمه جدا فاحب اخد من خبره حضرتك وخصوصا الموتور ال 1000 ده ضعيف مع التكييف ولا ايه وكمان في السحب والسفر وانت محمل معاك ناس وكده وكمان بخصوص استهلاكها في البنزين بتعمل كم داخل البلد وكم خارج البلد واسعار قطع الغيار
وشكرا

شوف ياباشا العربية كلها مميزات بالنسبة لسعرها و و امكانيتها البسيطة الاسهل نذكر عيوبها و هي صغيرة من ورا (الكنبة الخلفية) و مبتعديش 160 كم و نقلة الاول و التاني بتوعها ضعيف بحكم انها 1000 سي سي و بس غير كدة خد عندك ثبات حديدي على الطريق توفير فى البنزين داخل البلد 45 لتر يعملوا 550 كم و فى السفر يعملوا 700 كم ارتفعها عن الارض مثالي مع الاحمال كرسيها مريح جدا بالنسبة لاي عربية ياباني او كوري (عن تجربة) لانسر تويوتا اي نوع فلو بتفكر تشتريها انصحك بيها مش هاتندم بس لو عائلة حضرتك كبيرة هاتضيقك

**mohd7380** · 14-10-2012 02:56 PM

المشاركة الأصلية كتبت بواسطة eemmoo

من رأيى انك تبيعها عشان حتى لو سقطت مكنه هتقابلك مشاكل
بس خليك مع عائله الفولكس
ممكن تجيب بولو الموديل اللى بعد بتاعتك اللى بيسموها بولو عيون او جولف 4

ممكن حضرتك توسع صدرك معايا شوية
انا مشكلتي اني بشتغل من سنة تقريبا sales و بعربيتي بسافر كتيير من بورسعيد للقاهرة و اسماعيلية و الشرقية و هكذا فانا العربية مناسبة جدا للظرف دة بس محتار اغير و اجيب عربية جديدة ابهدلها معايا و لا اصرف على عربيتي و اهي كدة كدة قدمت و مبقاش ليها عندي زهوة الحفاظ عليها و دة على فكرة مريح نفسيا
ياريت حضرتك تقولي الماشكل ال هاتقبلني لو غير ت الموتور مشاكل عادية و لا كبيرة
الف شكر على الاهتمام

**thunder155** · 14-10-2012 03:05 PM

شوف صنايعي شاطر يعملك الشغل اللى انت عايز تعمله فى الموتور , بس بلاش تغيير الموتور , عشان انت مش عارف اللى انت حتجيبه حتكون حالته ايه و ممكن تلاقى نفسك عايز تصرف عليه برضو , و القرار فى الاخر ليك انت

**egyptiandiver** · 14-10-2012 03:08 PM

الى نعرفه احسن من الى منعرفوش

**SYD** · 14-10-2012 06:08 PM

يا جماعة مين قال ان التسقيط فكرة فاشلة او بيعيب العربية
طالما اشريت صح وجربت وطلع الموتور كويس يبقي ان شاء الله مفيش مشكلة
التسقيط عايز ميكانيكي فولكس وكهربائي فولكس
لكن تروح تعك عند ميكانيكي اي كلام يبقي لا تلومن الا نفسك
وعلي فكرة وانت بتشتري مفيش حاجة اسمها الميكانيكي ينقي مكنة حلوة - المكنة بطيخة - لازم تركب وتتجرب وبعدها تقول حلوة او وحشة
ولكن في دلائل - يعني لو هتفكها من نص - يستحسن تشوف النص عامل كام كيلومتر وانت تقدر تخمن حالة المكنة

انا نصيحتي - خليك في عربيتك وسقط مكنة 1400 وتوكل علي الله - واعمل فرش جديد ودخلها سمكرة وبوية - هتحبها اكتر - وروشها جنوط وكاسيت - هتحس انها بقت عربية تانية

ربنا يباركلك في عربيتك ومالك

والله المستعان
،
،