سؤال عن اللى حصل بعد حجز لوجان 2013

**ahmedjemy** · 13-10-2012 01:17 PM

الحمد لله حجزت لوجان 2013 فول اوبشن من التوكيل قسط اسلامى بعد ما خلصت كل الاوراق واتقبلت بفضل الله ولما كنت بقدم الاوراق بلغنى الاستاذ المختص فى التوكيل بان العربية قدامها شهرين علشان اقدر استلمها قلتلة مفيش مشاكل وخصوصا انه فهمنى ان الشحنة هتوصل فى خلال شهرين والعربية مش موجودة بعد التعاقد بيومين لقيت نفس الاستاذ اللى حجزت معاه فى التوكيل بيتصل علية ويبلغنى ان العربية موجودة فى معرض من المعارض بمبلغ 73.500 يعني اوفر برايس الف جنية ومش نفس اللون اللون اللى اخترتو كان بترولى واللى موجودة فضى قلتلة لا انا طالبها بترولى قالى دي مش موجودة خالص انا دورتلك عليها ومش موجودة قلتلة مش مشكلة هستنا لما الشحنة الجديدة تيجي بعدها بحوالى ساعتين رجع واتصل بيا تاني وقالى لقيت نفس اللون وباوفر برايس الف جنية قلتلة يا استاذنا انا عايز العربية بنفس اللون وبنفس السعر وهستنى التوكيل لما تجيلة الشحنة الجديدة قالى طيب خلاص مفيش مشكلة حضرتك تشرفنا وتدفع جزء من المقدم عشر الاف جنية علشان تستلمها فى شهرين ونص !!!! مع انى فى الاول سالتة هو انا هدفع جزء من المقدم قالى لا لما تستلم العربية تدفع المقدم كامل والشهرين خلاهم شهرين ونص !!!! والاغرب ازاي التوكيل يساعد المعارض تبيع باوفر برايس انا اول مرة اشتري عربية واول مرة اتعامل مع توكيل فهل ده عادي ولا ابعت شكوى على رينو فرنسا ولة اية رايكم انصحوني يا رجالة اللوجان واسف على الاطالة .

**بوب ميجو** · 13-10-2012 03:06 PM

اولا : حضرتك حجزت فى اى فرع
ثانيا : كلام مسئول المبيعات ده حاجة طبعا مش طبيعية بس انت متبعدش الشكوى لرينو فرنسا دلوقتى بس الافضل دلوقتى انك تتصل بخدمة العملاء 16202 وشوف هيقولوا ليك ايه وبالتوفيق ان شاء الله

**gebreel** · 13-10-2012 04:01 PM

لو انا فاهم صح و ان المندوب ده من التوكيل مش من موزع معتمد او معرض و عاوز يبعلك باوفر برايس تتصل ب16202 و تعمل شكوى في المندوب ده بالاسم و الفرع اللي شغال فيه

**ahmedjemy** · 13-10-2012 05:28 PM

العربية اللى حجزتها لوجان مانيوال فول اوبشن 2013 من التوكيل فرع المهندسين امام سور نادى الزمالك
انا هعمل بنصيحتكم وهتصل بخدمة العملاء واشوف ردهم اية وهرجع ان شاء الله ابلغكم باللى حصل بس حاسس والله اعلم انه مش هيقدم ولا ياخر بس هجرب لان اسهل حاجة ان الموظف ينكر وان التوكيل يغطي علية بما ان مفيش دليل مادي .

**بوب ميجو** · 13-10-2012 06:15 PM

اعمل اللى عليك وشوف هيقولوا ليك ايه ورد علينا وبالتوفيق ان شاء الله

**ahmedjemy** · 13-10-2012 08:47 PM

اتصلت فعلا بخدمة العملاء على رقم 16202 ورد علية استاذ عمر وبعد ما حكيتلة اللى حصل قالى ان همة ملهمش تحكم ولا سلطة على المعارض وبالتالى كل معرض ممكن يبيع باي سعر يعجبة ولما قلتلة يعني المفروض ان التوكيل يساعد المعارض على رفع سعر العربية عن السعر الاساسي !!!! رد وقالى لا طبعا والمشكلة دى مش هيتفع خدمة العملاء تحكم فيها فقالى اتصل بكرة بخدمة العملاء تاني واسال عن استاذ رفيق ودة على ما اتذكر مدير توكيل رينو مصر وهيكون متواجد من الساعه 10 الى الساعه 6 , بكرة ان شاء الله هتصل بية وارد عليكم باللى حصل , ومتشكر لكل واحد بيساعدني او شارك فى الموضوع ولو حد عنده سؤال عايز يسالة لاستاذ رفيق انا جاهز اوصلة واجيب لة الرد
شكرا واسف للاطالة

**بوب ميجو** · 14-10-2012 12:48 AM

ربنا يوفقك وطالما هما قالوك تكلم مدير توكيل رينو أ/ رفيق يبقه اكيد هيشوف حل للموضوع ده ان شاء الله وتستلم العربية قريب وعلى خيررررررر

**ahmedjemy** · 14-10-2012 03:15 PM

للاسف اتصلت بالتوكيل وكلمت الاستاذ المحترم رفيق اللى بكل هدوء وببساطة ما اعترضش على اي حاجة وشايف بالعكس ان المندوب بتاعهم بيحاول يساعدني ويقصر علية فترة الانتظار ولا شايف ان الاسلوب غلط ولا انه كدة بيساعد على رفع سعر العربية من قبل المعارض مدام التوكيل بيساعدهم ولا فى اى مشكلة من اني اشتري باوفر برايس والاجمل اقولة هياخد منى فلوس زياده ومش هتتضاف على المقدم ولا على السعر الاجمالى يعني الفلوس زيادة والورق بنفس سعر العربية الاصلى وبرضو معندوش اى مشكلة بجد زعلان . انا اتكلمت معاه فى حجات تانية زى ان المندوب بتاعه بقى سمسار للمعارض بشكل غير قانونى وان المفروض التوكيل يحرص على العميل مش يبيعه وفى الاخر ختمها بان العربية مش هتوصل قبل تلات شهور مش شهرين زى ما المندوب قالى (حسبي الله ونعم الوكيل ) مش عارف اعمل معاهم اية العربية كويسة بس الاسلوب بجد مستفز .

**mohamed.fouad** · 14-10-2012 04:55 PM

عايز اقول لحضرتك إن فى مهزلة بتحصل فى الموضوع ده ..... انا لسة مستلم عربيتى من اسبوعين من موزع برة بأوفر برايس 5و73 زى ما قال لحضرتك والعربية مش موجودة فى التوكيل خالص لكنها( مرطرطة) وانا اسف فى اللفظ برة بس للى يدفع ....... انا اقترح اننا نبعت شكوى جماعية لرينو نفسها عشان اللى بيحصل ده تهريج بكل المقاييس .