الموضوع: عايز رأيكم من الأخر في نيسان صني 2013 ، و مانيوال ولا أوتوماتيك ؟

يا جماعة الخير أنا هتجنن من الحيرة فكرت في كذا عربية و المشكلة إني محدود في 100 ألف فأقل .. و فكرت في افيو و m11 و تيجو و كلهم بأمانة ربنا ميتدفعش فيهم 40 ألف جنيه و ابقي جاي علي نفسي كمان !
و في نفس الوقت مش هروح اجيب اكسنت base line ولا ريو الاوبشن اللي فيهم تكييف و سنتر بس ، يعني كاني بشتري العلامة و ده تهريج ، انا عايز عربية تريحني و اهو كل واحد علي قد فلوسه..
المهم انا كان عاجبني جدا و مقتنع بنيسان الشكل القديم مفيش كلام ، بس الجديدة زي ما انتم عارفين عليها كلام كتير اوي و انا شخصيا عارف إن معظم اللي بيتكلموا بيتكلموا و خلاص و تقريبا مشافوش العربية غير علي النت بس !
المهم .. انا دلوقتي مفيش قدامي غير الصني علي قد الفلوس ، مهما كان شركة و اسم و عربية شيك و واسعة و اوبشنات مريحة و وسائل امان ، بس كام صاحب معرض قلقني من موضوع القطع الصيني اللي متقفل بيها العربية من جوة .. هل دي حاجة تخوف ؟ و ايه معني "صيني" اذا كان في عربيات كاملة صيني و بتعيش عادي جدا مش قطع بس !
انا عايز آرائكم من الاخر هل اخلص فيها ولا ايه ؟ مع العلم إني عايز عربية تعيش معايا كام سنة و مش كل شوية تطلب تصليح و وجع قلب ، و انا اساسا هكون بطولي و حنين في السواقة و مبهينش العربيات ...
تفتكروا الصني مناسبة ولا فيها عيوب منتشرة ؟ و لو فيها ايه هي ؟ و العيوب دي بسيطة ولا هتتعبني ؟ و ايه مشكلة المساعدين دي بيقولوا ملهاش حل ، و كمان ناس شايفة 1500 سي سي علي جسم العربية عيب .. ايه رايكم في الكلام ده ؟
و كمان لو جبتها اجيبها مانيوال ولا أوتوماتيك و ليه ؟ و هل صحيح الاوتوماتيك فيه عيوب ؟
سامحوني طولت بس نفسي اخلص و الله من الموال ده .. و الف شكر مقدماً :)

المشاركة الأصلية كتبت بواسطة dodyam

انا بأكد على كلام حضرتك بصفتى مالك للسيارة من شهر تقريبا
واحب أزود ان العربية 1500 سى سى و كأداء جيد جدا الا إذا حضرتك بتاع شد و جرى دايما و فى تقرير لأعضاء جابوا بيها 180 و انا شخصيا جبت بيها 130 عادى جدا
مشكلة المساعدين كانت فى بعض العربيات فى الدفعات الأولى و كانت كاوتشة المساعدين مقلوبة و المشكلة اتحلت خلاص و خدوا بالهم منها
وأنصح حضرتك بالمانيوال الفرق 5 آلاف جنيه بس غير انه محترم و مش بتحس فيه بالنقلة و ناعم
وعمرى ما سمعت عن مشكلة فى فتيس يابانى
ده احنا بنجيب العربيات اليابانى علشان عربيات معمرة

أنا آسف جدا
أنا كل كلامى كان على الأتوماتيك بس كتبت غلط وأنا معايا اوتوماتيك
مش عارف إزاى غلطت مع انى دايما باراجع مشاركاتى جل من لا يسهو
بس كنت مصدع شوية و عاوز أخش أنام لانى نزلت الصبح بأدور على شوية حاجات للعربية و كنت بأحجز عند بتاع فرش العربيات
على العموم هأكتب الكلام صح تانى

وأنصح حضرتك بالفتيس الاتوماتيك الفرق 5 آلاف جنيه بس و هيبقى معاك اوتوماتيك غير انه محترم و مش بتحس فيه بالنقلة نهائى و ناعم و مستمتع بيه فى القيادة فى الزحمة لانى قبل كده كان معايا مانيوال و اول مرة اركب اوتوماتيك فرق كبير بصراحة و خلى بالك من حاجة عند إعادة البيع الاتوماتيك اسهل فى البيع كله فى المستعمل بيسأل على الاوتوماتيك
وعمرى ما سمعت عن مشكلة فى فتيس يابانى فإزاى حد قالك فيه مشكلة
ده احنا بنجيب العربيات اليابانى علشان عربيات معمرة

و لو احتجت مساعدة أنا موجود هنا دايما و فى غيرى هنا أعضاء هيفيدوك أكتر من أى حته تانية و اكتر منى بمراحل أنا بأخش على المنتدى التانى بس علشان فيه قسم مخصص للاسكندرانية ياريت لو يتعمل هنا كمان