الموضوع: بلى الألتو الأمامى

المشاركة الأصلية كتبت بواسطة tarekzein

السلام عليكم ياشباب السوزوكى

فينك ياعم إكسيل :)

واحده قريبتى إشتريت لها ألتو 2008 هندى 800 سى سى فابريكه جوه ومعفره حزام فقط

المهم العجل الأمامى دلوقتى عامل صوت خشونه والبلى شكله هيتغير

البلى مقاساته إيه ومنين وإيه أحسن نوع

وبكام لو أمكن

هيا ساكنه فى مدينه نصر

ولو ممكن ميكانيكى شاطر هناك يبقى كتر خيركم

كفايه كده دلوقتى أحسن تضربونى :)

انا اهو انا اهو هههههههه

غريبة شوية موضوع بلي العجل لأن البلي عمره الافتراضي ما شاء الله كبيير هي العربية عاملة كام الف ؟؟
و موضوع مقاسات او كام مقدرش افيدك فيها لأن الألتو 2008-2009 لسه جديدة و محدش دخل فيها في اعطال جامدة و لسه 2013 نازلة طازة نفس شكل 2008-2009

بس ايه الأعراض بالظبط اللي أكدت لك انها بلي عجل يعني مثلا صوت نحر او احتكاك معدن و هي ماشية و بيزيد كل ما تزيد السرعة و لا صوت من او لالطلعة لحد ما توصل لسرعة 20 و بعدين يختفي و لا ايه بالظبط

و ممكن تكشف عليها عند حد او تجرب بنفسك يعني ترفع العربية بكوريك و تلف العجلة اليمين ثم الشمال مثلا و تشوف فيه صوت نحر او العجلة تقيلة في الدوارة و كأنك الفرامل قافشة و العجل تحس فيها بوش و مش ماسكة نفسها في مكانها
و تجرب تسمع و العربية ماشية الصوت بيزيد كل ما السرعة تزيد

بالنسبة مكان الشراء عليك و ع اكرم حمدي في شارع دمشق مصر الجديدة اينعم هو غالي و حراق شوية لكن تضمن انك جايب حاجة نضيفة فعلا و بيطلعلك فاتورة باسم المحل و الختم و اي حاجة ترجعله
لو ملقتش عند اكرم حمدي هقولك اللي بعده بالرغم اني مجربتوش بس ناس كتيير بتشكر فيه و هو شركة ليدرز في شارع ايران الدقي ( أ\محمد رفعت )
ثم بعده سوزوكي سنتر في التوفيقية فوق اسماك ابو غالي
لكن ان شاء الله تلاقي عند اكرم حمدي

بخصوص التركيب بقي اوعي ثم اوعي ثم اوعي ثم احذر ثم احذر ثم احذر ان الميكانيكي يركب بلي العجل بالمطرقة و الدق ده يبهدلها الدنيا البلي يركب عند خراط كبس شغلانة بتاع حوالي 30-50 ج للخراط
و تجيب علبة شحم او تقول الميكانيكي يتوصي بالشحم في البلي عشان تنسي اي صوت خشونة
و ممكن تغير اولسيه بلي بالمرة لو محتاج يتغير


اما بالنسبة للميكانيكي للأسف اللي اعرفه و بتعامل معاه في المطرية ايوة في المطرية و بنزله من القاهرة الجديدة :) لو عايز عنوانه قولي ابعتهولك