الموضوع: كلاكيت : بلية دبرياج اوبل استرا تالت مرررره

السلام عليكم و رحمة الله و بركاته .. الموضوع للتحذير و ليس للولوله و لا حاجه


سبق من شهر و انى اشتريت اسطوانه و ديسك و بلية دبرياج و قاعدة فيتيس المانى ماركة لوك بحوالى 2000 جنيه و بلية الدبرياج ام 900 جنيه ضربت و فرطت و بقت 3 حتت من الميكانيكى الحمار (حسبى الله و نعم الوكيل فيه ) و لما ضربت منه راح اشترى بليه تانيه من نفس تاجر قطع الغيار الحرامى ايمن الصعيدى (شارع جمال عبد الناصر سيدى بشر شارع محمد نجيب) بشهادة عميد محلات الصعيدى فى الاسكندريه ..
المهم لما روحت لميكانيكى فاهم (على أوبل) شيك على العربيه و ضبط شوية حاجات و قال لى انه مافتحش الفتيس و غير لى اويل سيل فى بليه الدبرياج بس ..
مشيت بلعربيه اسبوع بس و لقيت الدبرياج على الارض.. روحت له بيها و كشف و قال لى البليه ضربت !!

تاااااااااااانى !!؟؟ ... أه ... اصلها صينى و مضروبه ... (ايمن الصعيدى قال لى انها ساكس!!)

روحت اشترى واحده تالته

شوفت العجب فاليو المانى 950 جنيه من غير الماسوره والماسوره استعمال فقط بـ100 جنيه !!
فاليو اسبانى 850 جنيه !
فاليو كورى600 جنيه !!!
فاليو صينى 450 جنيه !!

مفيش لوك ولا ساكس و طبعا لو عايز GM يبقى فى الاحلام

روحت لشاب فى صلاح الدين محترم جدا .. قال لى ان كلهم حراميه لان مفيش حاجه اسمها فاليو المانى لانها أصلا فرنساوى و ممكن تلاقى اسبانى و كورى منها بس و الصينى بير سلم و كبيره اسبوع شغل(زى اللى شربتها اللى كانت رقم 2)
حلفنى و قال لى ما اجيب غير استعمال و تكون GM , و محلوله من فتيس . و قد كان روحت لواحد فى صلاح الدين اسمه احمد على جاب لى بليه محلوله من فتيس و بعد فصال و حكايات اعطاها لى بـ 650 بالماسوره و ركبتها و ربنا يكرم و تكمل على خير .. الخلاصه قطع الغيار مضروبه يا جماعه ولا اخلاق و لا ضمير .