الموضوع: ليه المصريين بيزعقوا دايما سواء غلطانين ولا مجنى عليهم ؟

المشاركة الأصلية كتبت بواسطة noga28

امبارح كنت راكنة فى شارع فيصل يمين وجيت اطلع اديت اشاره شمال يعنى انا طالعة وكنت طبعا ببص فى المراية جنبى واشوف الطريق المهم وانا لسة بطلع لقيت موتسيكل خبطنى مش عارفة بصراحة هو اتخبط من ورا ولا دخل فى من قدام ( يعنى معرفش هو اتخبط من ورا ولا هو خبطنى من قدام بعجلته الاولانية لانه اتخبط فى العجلة القدام عندى ) المهم الراجل نط بالموتوسيكل قدام كان معاه راجل تانى راكب وراه قاموا الاتنين كل ده انا قاعدة فى العربية ببص وساكتة متخيلة طبعا ان هو اللى خبطنى ومتخيلاه جاى يعتذر لى وقلت فى بالى يابت فكك وكبرى طالما عربيتك سليمة لانى سامعة صوت خبطته فى طاسة العجلة عندى مش فى جسم العربية وقام وقف جه على انا منزلتش من عربيتى اصلا ومش عارفة مين الغلطان فينا او نقدر نقول انى وقتها كنت متاكدة ان هو اللى غلطان ولما روحت البيت فكرت قلت يمكن اكون انا اللى خبطته من ورا ورجعت قلت طيب هو شايفنى مدية اشاره وطالعة مفروض يبص ويحاول يبعد عنى خصوصا الشارع مكنش زحمة والحركة شغاله مش الشارع واقف

من أساسيات قواني المرور أختي نوجا .
ان اللي راكن ملوش أي حق في الخروج من ركنته إلى لما الطريق يكون فاضي تماما

أحنا في مصر دايما نقول ما أنا مدي أشارة

الاشارة معناه التنبيه على تغيير السير فقط و ليس معناه الحق في التغيير في الوقت اللي أنت تقرريه أو أنا أقرره .

لازم صاحب الحارة الأصلي (اللي ماشي فيها ) يكون مديكي اذن تعدي قدامه (واحشاني يا أنجلترا )
أو المسافة كبيرة تسمحلك تعدي من غير ما هو يضطر يدوس فرامل .

و الكلام ده بينطبق على كمان على الطرق الفرعية و الطرق الرئيسية .
يعني أنا خارج من طريق فرعي و داخل طريق رئيسي .... حتما لازم أستنى لما الطريق يكون يسمح بالدخول فيه .

أي حادث يحصل من واحد راكن ... أو واحد خارج من طريق فرعي لطريق رئيسي ....
دائما هو اللي غلطان طبقا لقانون المرور في البلاد المحترمة اللي فيها قانون أصلا .

إنما أحنا عندنا بزرميط ... سمك لبن تمر هندي ........ كنافة على جلاش على بسبوسة .... صينية مُعتبرة .


نيجي بقى لموضوع الزعيق و تعلية الصوت .

طبعا قلة أدب .... و ده ناتج أن مفيش قانون .
لو فيه قانون و هو عارف أنك ما تقدريش تتركي مكان الحادث (زي الدول المحترمة ) ترك مكان الحادث جريمة في حد ذاته .

مكنش زعق و مكنش على صوته

بس للآسف بما أن الأخلاق متدنية أصلا .......... و مفيش قوانين بالاضافة للجهل المروري ل 99 % من سواقين مصر .... هانفضل كدا على طول .

أنا لسة مخبوط من واحدة برضه و أنا راكن في حالي .... مش عارفة تخرج من مكانها ... نزلت لقيت مفيش حاجة عندي ... خبطة بسيطة خالص مش باينة بس ساعتها كنت متعصب على الآخر علشان البويه بتاعة عربيتها طلعت عندي و شكل الخبطة كان وحش .

نزلت قالت كلمتين نرفزوني أكتر .......... دورت و طلعت و سبتها و مشيت .... علشان ما أتعصبش عليها و هي واحدة ست .... عايزة تطلع نفسها مش غلطانة
مع أني واقف و الموتور مبطل و هي اللي مش عارفة تخرج من الركنة بضهرها !!!

كل ده نتيجة التراخيص الكوسة و البلوظة اللي في مصر ... و ثقافة الهروب من المسئولية .