أرجـو الإفـادة من المنتدى الغالى .. صـوت صـادر من العجلـة ورا يميـن

معى لانوس 2007 .. قمت بالأمس بمس الطنابير الأمامية وتغيير تيل الفرامل لانى كنت بحس برجة فى العربية مع السرعة والضغط على دواسة الفرامل...
وقمت أيضا بمس الطنابير الخلفية لان الراجل قلى فيه شفة زيادة مش مخلى التيل يقفش صح ورجلش الفرامل الخلفية .. وفرامل اليد...
المهم بعد لما الراجل ما خلص .. مشيت بالعربية شوية .. ولقيت صوت جاى من العجلة اللى ورا يمين زى حاجة بتحك فى حاجة... رحت رجعت تانى للراجل وخدته معايا عشان أسمعه الصوت .. راح بعد كده فك العجلة اللى ورا وقلى أنه ريح التيل شوية وبعد كده طلعت مشيت بيها تانى بس الصوت زى ما هو...
رجعت تانى للراجل راح فك العجلة تانى ومسك الطنبورة بايديه ولفها عشان يسمع الصوت جاى منين .. فلم يجد صوت صادر .. راح مركب العجلة ولفها تانى .. ملقاش حاجة.. راح ركب المسامير بتاعة العجلة .. فسمع الصوت وظهر تانى .. فقالى المسامير بتاعة العجلة بتحك فى الطنبورة فجلخها شوية وركب تانى .. ومشيت بعد كده رحت مشوار بس لقيت الصوت برده موجود ...
معلش انا طولت عليكم .. بس عايز أطمن ربنا يبارك لهذا المنتدى..
هل فعلاً الصوت ده ممكن يكون من احتكاك مسامير العجل مع الطنبورة ولا ايه...
عشان انا من امبارح متعكنن مش عارف الراجل ضحك عليا ولا ايه ..
ولو الصوت فعلا نتيجة المسامير اعمل ايه ... اجلخها تانى ولا اغير المسامير ولا ابدل مكان العجل..
ارجو الرد من خبراء المنتدى الغالى .. وشكرااااا

غالبا الميكانيكي عملك رجلاش ع الشعرة

هل بتحس بسخونة جاية من ورا بعد مشوار ؟؟ و الصوت عامل ازاي ؟؟؟

خللية ياكل شوية تانى من مسامير العجل عشان متحكش فى سوستة التيل

MMamdouh

الصوت عامل زى ما يكون صوت احتكاك طاسة بتلف مع حاجة تانية وللتقريب ...
زى صوت سن السكينة على الماكنة بتاعة السن اللى بنشوفها مع الراجل اللى بيعدى فى الشارع...

والله ياباشا الموضوع دة كان حصل معايا فعلا الصوت دة وأكتشفت فعلاأنة من المسامير هى الى بتحك فعلا وقمت بتجليخها والصوت فعلا راح بعد تعب زيك بالظبط بس هقولك على حاجة تعرف
بيها . ريح المسامير بتوع الجلة شوية وأرفع العجلة على الكوريك ولفها وأسمع الصوت لو موجود بعد التريح يبقى مش من المسامير خلى الميكانيكى يقلل الرجلاش شوية طيب مفيش صوت والعجلة مرفوعة قرط على المسامير عادى جدا ولفها لو سمعت الصوت عليك وتجليخهم شوية الاربع مسامير لان بوز المسمار كدة هو الى بيحك فى السست ول مكنتش جلختهم كنت هتشوف أثر الاحتكاك على المسمار وفعلا أنا لما الميكانيكى كان قلى جلخهم قلت دة مش فاهم حاجة بس فعلا العيب كان منهم وربنا يوفقك

شكراا للأخ العزيز مؤمن ... بس هو ليه حصل كده معايا بعد الرجلاش ..
يعن قبل كده مكنش فى صوت ..
ولو سبت العربية على كده بالصوت ده شوية هل فى خطورة ... شكراااا لكا من رد وفى الانتظار..

أنا حصلت معايا بسبب أن بتوع الكاوتش بيقرطو جامد على المسامير والمسمار حك فى السست
بس حضرتك لو الصوت من الرجلاش أقل خسائر هياكل فى التيل أو التنابير ولو المسامير هى السبب هيبوز السست بتاعة التيل وبالتالى الفرامل هتكون على 3 عجلات فقط فأحسن تضبطها علشان ميحصلش خسائر وخصوصا المشكلة صغيرة وحلها بسيط جدا

هو الراجل امبارح لما فك العجل وخلى الطنبورة بس ولفها مفيش صوت ... وبعد كده ركب العجلة ولفها من غير مسامير مفيش صوت .. بعد كده ركب المسامير ظهر الصوت .. يعنى لو المشكلة فعلا فى المسامير .. اروح واجلخها لحد ما الصوت يروح... طيب وبعد كده لو المسامير اجلخت فى تأثير على مستوى رباط العجلة ...
وشكراااا ليك ياغالى

سؤال بس..يعنى ايه تتجلخ؟؟

تتجلخ يعنى تروح عند الخراط ويشيل جزء من المسمار على المكنة عنده واللى هو بيحك .. اى شيل الزيادات..

هي المسامير يا باشا
و خليه يعملك الرجلاش ع 3 تكات في الهاند مش أقل

نفس الموضوع كان معايا وغلبنى وعملنا المسامير وعملنا كل ما تم ذكره ويروح ويرجع بعد ما امشى من عند الميكانيكى لغاية ما اتعودت عليه وراح لوحده بس بردو ساعات بيجى لوحده