الموضوع: تقرير تركيب إزاز لباب الماروتى

حصلت معايا خبطة بسيطة نتج عنها كسر فى إزاز الباب الشمال وتطبيق فى الباب والسنتر لوك علق ومش بيقفل وسبق وكتبت التفاصيل بس أكسيل طلب رفع تقرير بالتركيب لتعم الفائدة .
والخبطة كانت يوم الجمعة حوالى الساعة 10 وطبعاً الدنيا أجازة وأضطريت إنى أبيت العربية من غير إزاز وممكن تتفتح وتتقلب بسهولة وتتاخد خالص كمان بس الحمد لله الإنذار كان شغال محلصش ليه حاجة وغطيت العربية وكأن مفيش أى حاجة والعربية تحت شباك وبلكونة شقتى بالظبط وسهرت شوية لحد الفجر وعدت على خير الحمد لله .
المهم تانى يوم رحت الأول لسمكرى عشان أشوف التطبيق اللى فى الباب والصراحة كان سمكرى شاطر خالص وقاعد يعافر مع باب العربية لحد ما ظبطه ومفيش أى خدش عمله فى الدهان غير الخدوش اللى حصلت من الخبطة نفسها وكنت منبهر بالشغل اللى عملها لأن الخبطة كانت واخدة الباب كله من فوق لتحت المهم طلب 30 جنيه أديته 20 ( مش خسارة فيه عمل شغل نضيف )
وأنا مش من القاهرة فلما رحت أسال على الإزاز ملقتش وقالى بالحجز وحيجي كمان يومين ( يومين من غير إزاز ومن غير نوم سيبته ورحت لواحد تانى قالى موجود المصرى ولونه أخضر مش أبيض بس 110 جنيه أخدته ب 100 جنيه بالعافية على الرغم إن سألت ميدو اللى فى أحمد حلمى على الفيس بوك عن السعر وقالى الأصلى ب 65 جنيه وكان أحد أعضاء المنتدى ( من القاهرة ) قالى إنه داخ قبل كده على الإزاز لحد ما لقاه عشان كده رضيت بالأمر الواقع وأشتريت الإزاز وأتكدت إنه سليم مفيش فيه شرخ وكسور وبعدها رحت لواحد قريبى عشان يدلنى على واحد بتاع أبواب وفعلاً راح معايا عند واحد نضف الباب كويس من بقايا الإزاز وركب الجديد وظبط السنتر وفر عليا مشوار وغرامة عند الكهربائى وزيت مفصلات الباب وكله تمام وجربت الباب والإزاز كله تمام . حسابك كام يا عم قالى عشان خاطر فلان ( قريبى اللى راح معايا ) 30 جنيه أنا اللى أستهال إن أخدته معايا مقدرتش أفتح بقى معاه ولا أفاصل . بس أتعلمت إنى ما أخدش حد معايا عند صنايعى عشان أقدر أخبط معاه فى الحساب . يعنى الموضوع كله أتكلف 150 جنيه بس لو حضرتك من القاهرة ورحت لميدو وخبطت شوية فى الحساب مع الصنايعية ممكن يتكلف فى حدود 110 جنيه .
وكمان أتعلمت إنى أمشى براحتى ومليش دعوة بشغل الفهلوة اللى بيعمله غيرى لإنى سبب الخبطة هى محاولة للفهلوة عشان أعدى بسرعة .
ودى صورة للباب بعد الإصلاح