اخيرا غييرت رشاشات النوبيرا بنفسى Injectors
نزلنا يوم الجمعه انا و ا/احمد للحرفيين و جبنا طقمين رشاشات بى ام
و انا بصراحة مكانش عندى وقت اركبهم و كنت فاكر ان الموضوع صعب و خطر
و الشكر للاستاذ احمد لتعريفه بالمهندس سعيد ظبطلى الكاتينه
و فى يوم قررت ان افك الرشاشات و اتفرج عليهم و لو لقيت انى ممكن افكهم و اركب اللى جبتهم يبقى تمام
نزلت الظهر و فتحت كابوت العربية و قعدت الف حوالين الموتور
جهزت العدة (لقمة 13 و مفك صليبة و مفك عادة و فوطة و شوية بنزين و فرشاة اسنان قديمة )
و ابتديت افك غطاء الفلتر
و المسمارين بتوع المسطرة
و خرطوم دخول البنزين و فيش الرشاشات
و فكيت شوية خراطيم كانوا مضايقنى (هههههههه)
و خلصت المسطرة من وش السلندر
و شفت الرشاشات بتوع النوبيرا لاول مرة فى التاريخ
و طبعا كلهم هباب و سواد
الجوانات كانت سليمة (فى 2 او رينج كاوتش على كل رشاش)
و شديت كل رشاش على حدا و ركبت بتوع البى ام بعد تنظيفهم بالبنزين و فرشاة بس على خفيف
و رجعت كل حاجة لمكانها مع تنظيف كل جزء خرجته
حتى المسامير
و هبا دورت العربية دارت من اول تكه
الحمد لله العملية ماكنتش صعبة
الموضوع سهل جدااااا و مش محتاج فتىَ الميكانيكية و اللى يقولك مش حينفع
الموضوع اخد منى 45 دقيقة علشان دى اول مرة اغيير رشاشات
و حا عملها لحد قريبى فى عربيته نوبيرا برضه بعد ما ركب معايا و شاف اداء العربية
السحب بقى ممتاز
بدء الدوارة صباحا سريعه
انا اعتقد ان الفك و التركيب من قبل صاحب السيارة مفيد
و على الاقل بتحافظ على حاجات تانية كتير غير اللى انت بتصلحه
شكرا للاستاذ ممدوح على تعريفه لنا بالرشاشات بتاعه البى ام