الموضوع: جين 2 راكبها ميت عفريت وتعبت معاها جداا .. اغيثونى

بسم الله الرحمن الرحيم
العربية جين 2 موديل 2008 مانيوال
العربية كانت طبيعية جدا خلال الاربع سنين ونص اللى فاتوا ومشاكلها كلها اللى قابلتنى الى حد ما مبررة اذا كانت خبطة فيوز علق بطارية نامت وهكذا

لحد ماجه اليوم المشئوم ( ولكن الحمدالله على كل حال ) العربية بطلتها وطلعت البيت 5 دقايق نزلت ادورها مش راضية تدور مع العلم انى مغيرلها البطارية والانوار والكهرباء شغالين عادى جدا والدينامو والبطارية مشحونين والمارش مفهوش مشكلة قولت ندى العربية ذقة كده مش نافع

المهم جبتلها كهربائى بص عليها وكشف على الفيوزات والكهرباء فى العربية وكل حاجة متظبطة ومعرفش يوصل لحل ولا عرف يدورها بالطرق العلمية ولكن المفاجأة العربية تدور فجأة ودون مالراجل يعمل حاجة معينة تدورها

المهم بطلتها 5 او 6 مرات وشغلتها كانت بتدور وسافرت بيها مسافة 100 كيلو تقريبا مع العلم ان كان فى حاجة غريبة لمبة التشيك انجين فضلت منورة هى والهاند بريك معئن الهاند مش مرفوعة قولت اخلص مشوارى واشوف قصتها المهم بطلت العربية ونزلت اجيب حاجة وجيت ادور وانا على الطريق العربية مش راضية تدور

المهم شافها كونسلتو كهربائية وميكانيكية عشان اتحرك بيها من على الطريق بس ولكن بلا فائدة وفى النهاية كهربائى عمل وصلة كهرباء فى العربية من البطارية لكابل كده واصل بالموتور بكابل كهرباء فيه كهرباء العربية دارت بس الموتور شغال بالعافية وقالى الكهربائى دى حاجة مؤقتة تتحرك بيها بس الموتور مش واخد كهربته كلها عشان كده شغال بفردتين بس وبيرتعش لان المفروض الكمبيوتر والكتاوت مسئولين عن توزيع الكهرباء والاوامر للعربية كلها

المهم روحت البيت وهى على الحالة دى ووديتها لكهربائى تالت المفترض انه الاشطر مع العلم انى من برة القاهرة الراجل فضل يفحص العربية من وانا جنبه من الساعة 1 الظهر لحد 3 الفجر والله تخيلوا بقى ومعاه اجهزة كمبيوتر كده مش كبيرة اوى فى حجم psp والاجهزة دى بتعملوا كوكنكشن فيلد

المهم الخلاصة لانى طولت عليكو السبب فى دا كله ان لمبة التشيك انجين الصفراء مش راضية تنور اساسا اول لما تفتح الكونتاكت معئن الطبيعى انها تشتغل وتطفى فى ثوانى اما لما بنعمل الوصلة الخارجية دى بتاع الكهرباء من برة بتشتغل اللمبة دى وتطفى فى ثوانى فالعربية بتدور اما لو من المفتاح من غير التوصيلة دى اللمبة عمرها ماتنور ابدا (لمبة التشيك انجين )

الراجل تتبع كل كابلات الكهرباء والفيوزات والكمبيوتر ولا حاجة نافعة ولا حاجة بايظة بالقياسات

ولحد دلوقتى انا راكنها تحت الببت واللمبة دى فشل فيها كنسولتو كهربائية انها تنور عشان العربية تدور

ومش عارف امشى بالتوصيلة دى لحد التوكيل ولا ايه معئن الموتور مش واخد كهربته كلها وشغال بيرتعش اللى فهمته ان الموتور اربع فرد اتنين بس بيشتغلوا دا اللى الكابل يقدر يشغلهم
فهل دا فيه خطر امشى بيها 100 كيلوا


ملاحظة على الماشى (اللمبة دى اول لما بتفصل تلاقى عداد البنزين اللى يقولك فاضل قد ايه كيلومترات على البنزين ويخلص يصفر كأنك على الاحتياطى معئن عداد البنزين يبقى لحد النص ) وايضا ( لازم تلاقى مؤشر حرارة الموتور نزل على الصفر معئن فى نفس الدقيقة لو بالوصلة تلاقى المؤشر تحت التسعين فى الوضع الطبيعى)


اعمل ايه والمشكلة دى مشكلة ايه واروح فين وهل ينفع امشى عليها بالوضع الحالى وبصراحة انا صرفت عليها كتير ومتصلحتش عن الكهربائية مع العلم ان الناس دى موثوق فيهم جدا وشاطرين جدا ومش مستعد اصرف تانى دم قلبى وفى الاخ اروح معملتش حاجة

الموضوع دا تاعبنى جدا بجد ارجو المساعدة

في وكيل في مدينه نصر في مكرم عبيد شارع اسمه ابو داوود الظاهري ناصيه صيدليه افريقيا في مكرم اسمه مركز امير وجوزيف