الموضوع: استيبدال السيارات المستعملة بسيارات مستعملة في الخارج

السلام عليكم

يا جماعة هذا ليس خبر ولكنها فكرة نفسي رئيس الوزراء يعملها ويا ريت تقولولنا إيه مميزاتها وعيوبها



ليه الحكومة ما تسمحش باستبدال " فقط استبدال " السيارات العتيقة بأخرى حديثة مستعملة

يعني اللي معاه سيارة موديل التسعينات أو الثمانينات فما تحت يسلمها للحكومة وتديله مبلغ محدد ( مثلا عشرة آلاف جنيه ) وتسمحله إنه يستورد سيارة من بره مستعمله ويدفع فرق الجمرك وبشرط إن يكون موتورها نفس سعة أو أصغر من موتور سيارته القديمة وبحد أقصى 1600 سي سي

ويتم احتساب جمرك سيارته الحالية كأنه هو مشتريها في سنة الوكالة وعاوز يجيبها السنة دي
وبنفس الطريقة يتم احتساب جمرك السيارة التانية
وهو يتكرم ويدفع الفرق واللي أعتقد إنه هيدور في حوالي العشرين ألف جنيه

نتخيل كده لو على خمس سنين تم استبدال خمسة مليون سيارة من السيارات القديمة بأخرى أوروبية وآسيوية زي الكرولا ولا حتى المرسيدس





1- أولا الحكومة هتتخلص من السيارات القديمة ببلاويها وتعطيلها وحوادثها ببنزين تمانين اللي ماشيه عليه

2- هنوفر كمية الحديد - ملايين الأطنان - واللي هتساهم في نهضتنا سواء في المباني أو الصناعة

3- هتوفر استهلاك البنزين المرعب في السيارت القديمة وبكده هنخفف من فاتورة الدعم

4- هترفع من رفاهية الشعب المسكين اللي بيركب عربيات تعتبر تراثية بالنسبة للدول الأخرى

5- هتدخل مليارات من الدولارات لميزانية الحكومة سواء كجمارك أو كرسوم ترخيص

6- هتفتح فرص عمل جديدة في مجالات مختلفة بداية من التخليص الجمركي ونهاية بتخريد السيارات القديمة

7- وأخيرا الحكومة هتوفر جزء كبير من الدولارات اللي بتطلع بره ثمن العربيات الجديدة لأن الفرق بين سعر الجديد والمستعمل في الخارج يصل لثمانين بالمائة وأكثر


تحياتي للجميع

طيب لو الفكرة حلوة ما حدش يقدر يضيفها للأفكار المطروحة على حزب الحرية والعدالة أو يوصلها لحد من الحكومة يمكن تكون مفيدة