الموضوع: مشكلة في فتيس الصني الاتوماتيك

مساء الفل على صقور نيسان

هاحكيلكو كل حاجة بالترتيب :

1- حجزت صيانة في السبع للكشف على السيارة وفعلا روحتلهم وقابلت المهندس الخلوق أحمد ناجي وركب معايا العربية وجربها وبعدين كشف على زيت الفتيس من المقياس اللي في الكبوت وخد نفس طويل وبعدين ............ الفتيس عاوز يتعمر .
قولتله يعنى ايه ؟ قاللي يعني اسيب العربية والفتيس يتفك ويتعمله عمرة ويرجع جديد والكلام ده يتكلف على الاقل 7000 جنيه بس أعمل حسابي على أكتر طبعا الكلام ده شفوي بدون أي أجهزة فقولتله ايه السبب. قاللي التروس اتاكلت وعاوزة تتغير فقولتله دي عاملة 117000 وياباني مش فيات قاللي دي حظوظ وسالته على الفتيس الجديد قاللي ب17000 جنيه فطبعا معجبنيش الكلام وقولتله هفكر وارد عليك وبصراحة الراجل مخدش ولا مليم على الكشف وله طبعا كل شكر واحترام.

2- حجزت عند أتوايجيبت وروحت قابلت المهندس محمد جلال وبعدين قابلني مهندس مصطفى من الورشة وطلع جرب معايا العربية وقاللي هندخلها الورشة يتكشف عليها بالجهاز ونقولك ايه الأخبار وطبعا عملولي امر شغل بقيمة 150 جنيه كشف فقولت لمهندس الاستقبال ده السبع مش بياخد كشف على العربية قاللي مش ممكن قولتله طيب في خصم 30% على المصنعية زى السبع قاللي مفيش الكلام ده قولتله ماشي ومضيت على امر الشغل .
وقعدت في الاستراحة من 11.30 صباحا الى 3.5 مساءاً ثم جاللي مهندس محمد جلال وقاللي الحساسات كلها سليمة ومفيش مشكلة الكترونية وعشان كده هنفك الفتيس ونكشف عليه ونشوف محتاج ايه بس عامة هيتكلف 4000 بادي فالف وده متوفر وطقم كلاتشات 1200 جنيه وجوانات 130 و زيت فتيس ب 300 جنيه ومصنعية 900 جنيه وكل ده + الضريبة لكن في مشكلة صغيرة وهي ان الحاجات ديه كلها مش متوفرة وهنشوفها في المصنع ولو موجودة هتيجي بعد 5 أيام وفك وتركيب 3 أيام لكن لو مش موجودة في المصنع هنبعت نجيبها من اليابان وتاخد حوالي 4 شهور فقولتله يعني العربية هتتفك وترجع تتقفل تاني لغاية قطع الغيار متيجي من برة قاللي لا هتسيبها عندنا 4 شهور لاني مقدرش اقفلها تاني وهي بايظة فسالته علة الفتيس الجديد قاللي 25000 جنيه قولتله شكرا انا هفكر وارد عليك والراجل مشكور حسب لي الكشف ب 75جنيه بدل 150 جنيه وخدت العربية ومشيت.

3- روحت مركز أولاد صبحى سند في شارع جوزيف تيتو وهو متخصص في الفتيس الاتوماتيك والعمرات وكشف على السيارة بالجهاز وركب العربية وجربها ورجع رد علي وقاللي الجهاز قاري oil fault وده معناه في حاجة في الكلاتشات بالداخل والنقلة التانية محروقة واسيبله العربية يفك الفتيس ويشوف هو محتاج ايه بالظبط ويغيره وقطع الغيار متوفرة والمصنعية 1000 جنيه وزيت من 300 الى 400 جنيه حسب الكيلو وطقم الاصلاح ب 2200 جنيه فقولتله طيب والفتيس الاستعمال قاللي موجود ب4000 جنيه بس منصحكش لان الفتيس الاصلي لو اتصلح يبقى احسن لان العربية مش عاملة غير 117000 وسالته عن السبب اللي بوظ الفتيس قاللي التاخير في تغيير الزيت لان الزيت مفروض يتغير كل 25000 كم فقولتله التوكيل بيقول 40000كم قاللي الصح والأضمن كل 25000كم وانا بصراحة غيرته اول مرة على 40000كم والتانية على 107000 يعني عمل 67000 كم وبصراحة مكنتش اعرف انه لازم يتغير كنت فاكره زى المانوال بس اهو النصيب بقى فبصراحة سيبتها عنده وابتدى يشتغل فيها عشان الحق اخدها قبل اجازة العيد كل سنة وانتم طيبين وربنا يسهل وتبقى كويسة وان شاء الله هوافيكم بالجديد لما استلمها ونصيحة متتأخروش في تغيير زيت الاتوماتيك وربنا يسترها على الكل ومعلش طولت عليكم بس قولت اقولكم على كل حاجة بالتفصيل.