وعادت رادارات المحور للحياة !
السلام عليكم ورحمة الله وبركاته
بداية من النهاردة, بدأت الاحظ ان رادارات المحور عادت للحياة مرة أخرى :chirol_neuneu:, بعد ماكان بعض مجرمي القيادة كسروا العدسات ورشوا سبراي أسود على الفلاش .... وده أدى لازدياد السرعات عليه بشكل كبير وزيادة الحوادث المميتة بسبب التهور والجنون, لأن المحور طريق محدود وعليه كثافات مرورية عالية, وبيجمع بين مركبات نقل جماعي وعربيات ملاكي, مع تفاوت السرعات, بالإضافة لتجرؤ العديد من ضعيفي :babyroll: / ضعيفات :makeup: القيادة على المشي عليه بسرعات بطيئة في الحارة الشمال والوسطى, مما يؤدي لكوارث مرورية شفت منها كتير
المهم, نبدأ بأول رادار اشتغل, وهو للقادم من مدينة 6 أكتوبر في اتجاه ميدان لبنان,
موقعه بالظبط: بعد نزلة الطريق الصحراوي بحوالي 2 ونص كيلومتر, بعد انتهاء المنزل الكبير اللي بيخلي أي عربية مهما كانت تجري وعيارها يفلت, الرادار قبل ماتنزل النفق الصغير , ومتثبت في وسط الحاجز الخرساني في الجزيرة الوسطى
شكله: مربع رمادي كبير, على عمود 1 ونص متر (شرطة المرور متعمدة تخليه ظاهر لقائدي السيارات علشان يتعظوا , لكن هاتقول لمين...هايتعظوا فعلاً لما ييجوا يدفعوا المخالفات !! )
الجديد: بيضرب فلاش بالليل وبالنهار, سرعة الفلاش عالية جداً لدرجة انه أخد 4 عربيات على 4 فلاشات في ثانيتين !!
تركيزه: بيركز على الحارات : اليسرى (التخطي) , الثالثة (السريع), الوسطى(متوسط السرعة), وبيضرب فلاش حتى لو على الحارة اليمنى لكن أشك في تصويره للحارة اليمنى , وهي أصلاً خطيرة جداً في المكان ده
حد السرعة القانوني: 90 , فوق الـ 90 هاتتلقط :nosmile:
أفضل أنماط القيادة: على قمة المنحدر قبل مايبدأ الطريق في الانحدار, خليك على 100, ارفع رجلك من على دواسة البنزين, سيب العربية تنساب بسلاسة على الطريق, تجنب الضغط على البنزين والتخطي, تجنب تماماً الضغط على الفرامل (اللي وراك جاي سريع) , على آخر المنحدر هاتكون سرعتك وصلت 90 لو عربيتك تقيلة ومعاك ركاب, وهاتكون 95 لو عربيتك خفيفة أو راكب لوحدك, لمسة بسيطة للفرامل مع أنوار الطوارئ علشان اللي وراك مايلبسش فيك ويفوق هو كمان ان فيه رادار وتوصل للـ 90 بأمان بإذن الله, يستحسن تكون على الحارة اليسرى (التخطي) أو الثالثة (السريع) , مش علشان تتفادى الرادار, لأ ... علشان لو على اليمين المكان ده - في الغالب وكالعادة - بتلاقيه فيه عربية راكنة أو عطلانة أو واقفة وخلاص !!! وممكن تعمل كارثة لو حاولت تفاديها بانك تكسر شمال في المكان ده
أرجو من الله انه يسلم طرقنا ويحفظنا ويجنبنا شر الحوادث ومسببيها, وأتمنى منكم مراعاة القيادة الآمنة لأن ده حق الطريق اللي النبي صلى الله عليه وسلم أوصانا بيه , ونمشي بما يرضي الله نوصل كلنا بأمان بإذن الله
دمتم بخير ...سلام عليكم