سبورت درايف الى هو نظام القياده الرياضيه
و بيخلى العربيه تحرق على كل غيار جامد فى الأوتوماتيك
بيخلى العربيه تجميع و سحب ممتاز
عرض للطباعة
الله يبارك فيك
كويس انك مجبتش الاسود بيبهت و بيبقي شكله عار
شفت واحدة سودا كان بيركن قدامي وكان هيخبطني بس ربنا ستر
انا عملت حوالي ٣ الاف كم
اللي اعرفه ان العربيات ف الاول بتاكل بنزين شوية وانهوبيظبط بعد اول غيار زيت
انا رحت عملت صيانة ال ٢٥٠٠ كم مخدتش نص ساعة ف غمرة
قالوا انهم راجعوا المستويات و ربطوا العفشة وطبعا مخدوش فلوس وختموا لي الضمان
بس معلش اللي يشتري العربية مياخدش ضمان بيجو بتاع ال ٣ سنين او ال ١٠٠٠٠٠ كم بس لان هيا ليها وثبقة ضمان
باسمها (٤٠٨) و تتختم والا هيبقي ضمانها ٣ سنين زي كل عربيات بيجو
بسم الله ما شاء الله
عربيه رائعه ربنا يبارك لحضرتك فيها ويديك خيرها ويكفيك شرها
معلش النقطه بتاعت الضمان ديه مهمه لأن كتيب الضمان الى معايا هو الى مكتوب عليه 3 سنوات أو 100,000
و لما رحت التوكيل سألتهم ليه مش كاتبين 5 سنين
قالى هتلاقى الموزع معندوش غير الكتيب القديم فمتقلقش هو متسجل على السيتسم تاريخ الشراء و مدة الضمان 5 سنوات
و ختملى جوه الضمان بعد الكشف
أنت معاك كتيب ضمان لل 408 غير الى معايا ؟
لا يا باشا كتيب الضمان واحد
بس فيه ملحق كده مكتوب فيه شكرا لاختيارك بيجو ٤٠٨ و مكتوب فيه ان الضمان ٥ سنين
انا سالت قبل ماشتري العربية ف مركز غمرة مهندس حبيبي علي موضوع ضمان ال ٥ سنين قالي لا هما ٣ بس واصر علي كده
وانا بشتري العربية لقيتهم بيدوني الضمان ال ٣ بس فرفضت استلم العربية علي بعضها و عملت مشكلة( انا اشتريت من توكيل بيجو cdc اللي ف وادي النيل اللي ف المهندسين ) وقلتلهم ادوني اي حاجة تثبت ان الضمان ٥ سنين مش ٣
احنا ف مصر بنتعامل بالورق ولو حصل اي مشكلة لاقدر الله مش هتنفعوني واحتمال تبيعوني وبعدين انا معايا ٢٠٦ شاريها من ٢٠٠٢ من نفس الفرع و حصل بيني وبينهم مشاكل جامدة جدا وبالتالي انا معنديش ثقة فيهم بصراحة( ومحدش يقول ايه اللي وداك ليهم تاني انا بيجوهاوي قديييييييم و مبركبش غير بيجو ٥٠٤، ٢٠٦، ٤٠٨وانتو عارفين الكيف بيذل :) )
المهم اني ماستلمتش الا اما وعدوني انهم هيسلموني ال ملحق بتاع الخمس سنين ده
واستلمتو فعلا بعد العربية بحوالي ١٠ ايام
فياريت يبقي معاك لان احنا السيستم كله ف مصر مش سليم فمجتش عليهم يعني
اول مرة اشوف هذا الموديل ؟ لم اره في فرنسا هل هو مصمم للسوق المصري؟؟؟
عندي احساس انها مشتقة عن ال206 سيدان اربعة أبواب
العربية عموما هائلة
ملاحظاتي:
بتتقل مع التكييف زي ماقلتلك قبل كده
بحسها بتتقل بشكل ملحوظ كل اما يزيد عدد الركاب
الحاجات الايجابية:
الثبات ممتاز. وعن تجربة فيه تريلا خبطتني من ورا علي مصر اسكندرية الزراعي وكنت ماشي علي ٩٠ والحمد لله ربنا ستر
والعربية معمومتش مني ( بغض النظر ان الرفرف اتعجن) بس انا مبقيتش مصدق نفسي ربنا كبير.
استهلاك البنزين خرافي علي الطرق المفتوحة يعني مثلا أفول من القاهرة يكتبلي انها هتمشي ٤٥٠ كم- وده اللي بتكتبه مع كل تفويلة- واروح اسكندرية من الزراعي و معايا ٤ ركاب و الطريق مش مفتوح وف يه مطبات كتير اوصل اسكندرية الاقيها كاتبة انها هتمشي ٦٥٠ كم ومتنساش ال٢٠٠ كم من القاهرة اسكندرية يعني ده معناه ان استهلاك البنزين بيقل النص علي الطرق
تاني حاجة لو الطريق زحمة و حبيت تجري او تغرز بصراح ال s - mode ممتاز وبيغير سحب العربية تماما وبينجز بشكل كبير
انا لسه بصراحة مغيرتش زيت قدامي شهر او شهر ونص كده ان شاء الله
كنت عايز اسالك حاسس بموضوع التقفيل الصيني ده ف حاجة ؟
الحمد لله و جت سليمه
غيرت الرفرف و لا لسه؟
و فعلا هى فى الطرق المفتوحه استهلاكها ممتاز
موضوع فرق التقفيل ده غير موجود تماما
قارنت بينها و بين ال 508 و ال 308
كل الفرق الى لاقيته فى الشنطة من ورا لما بتفتحها فى حته كده فى الاول فيبر بعديها فى فرق بسيط بيبين الارض يعنى حته مفتوحه بعرض الشنطه
دى مش موجوده فى العربيات التانيه خالص
بالنسبة لقطع الغيار ده العيب الوحيد
الفانوس الامامى ب 1350 يعنى اغلى من فانوس ال 508
المرايه العاديه (مش ضم) بـ 1210 و مراية ال 508 الضم عامله 1100
تيل العربيه عامل 730 و بتاع ال 307 عامل 340
قطع غيارها اغلى من الـ508 و الـ3008
لما سألت ليه
قالى فى توكيل صلاح سالم عشان بيطلب من الصين و بيروح فرنسا و بيجى من فرنسا لمصر
حاجه غريبه و قالى لو جمعتوا بعض و اشتكيتو على اساس ان اسعار قطع غيارها اغلى من اسعار قطع غيار عربيه اغلى منه بـ 100 الف هيستجيبو لطلبكو ؟؟
انا كنت فى التوكيل يوم السبت وغيرت زيت وفلتر و اتكلفت 730 جنيه
الحمد لله جت سليمة
ومغيرتش الرفرف
هو ممكن يترد ع البارد بس انا ماليش نفس
دي بلد طرقها تسد النفس و فيها شوية ........ سايقين
افهم من كده ان اول طلعة صيانة ( اللي هيا زيت وفلتر) ٧٣٠ جنيه
والا غيروا الفلاتر كلها البنزين والهوا والا انت عملت حاجة زيادة؟
بالنسبة لموضوع نجمع نفسنا ده اظن هيبقي صعب
لان تقريبا انا وانت بس اللي معانا العربية دي هنا ف المنتدي
لو تقدر توصل لناس تانية انا معنديش اي مانع
هي تكلفة تغيير زيت و فلتر زيت بس
الزيت 341 ج و الفلتر 46 ج
المصنعية 251 ج تقريبا
و ثمن الفوم الى بيغسل بيه الموتور فى حدود 26 ج
بالضريبه يبقى 730 :)
تغيير الفلاتر التانيه فى صيانة ال20000 مع تغيير التيل و الزيت
و ممكن نستنى شوية يمكن العدد يزيد و نبقى نعمل حاجه
هههههههه
ياولاد الايه يا لذينا
تصدق حاجة تحرق الدم
مصنعية ٢٥٠ جنيه!!!!!!!!!!!
ليييييييييه
انا ايام اما كنت بعمل صيانة ال ٢٠٦ وهي لسه بشوكها كنت بغير الزيت والفلتر
كان كيلو الزيت ال ١٠٠٠٠ ب ٦٤ جنيه وكانت بتاخد ٤ كيلو يبقي ٢٥٦ و الفلتر ب ٦٠ جنيه وحط عليهم الضريبةوالمصنعية يبقي كلو حوالي ٤٤٠
وده من ٢٠٠٢ لحد ٢٠٠٨
والمفروض ان هما اسعارهم نزلت والا هو استعباط
وبعدين المصنعية عندهم بتتحسب بالساعة والموضوع ده ياخد ساعة والا ساعة ونص بالكتير والساعة ب ١٠٠ جنيه بعد اما غليت
يعني المفروض تقف علي ١٥٠ جنيه
ده ايه النصب ده
السلام عليكم أنتو ليه موجودين ولا خرجتو أني معايا نفس عربيتكم ونفسي اقولكم ع شويه اخبار
انا دلوقتي ماشي بيها ٣٥ الف وعندي بعض المشاكل. ١-استهلاك البنزين اكتر من اي عربيه تاني ودي مشكله كبيره وخصوصا الايام اللي جايه. ٢-اسعار قطع الغيار للموتور هية نفس ال ٣٠٧ بس ف التوكيل بيغلوها عشان هتتركب ف ٤٠٨ (اشتغاله). ٣-المراية نزلت ف مره لقيتها مكسوره وغيرتها ف التوكيل عارفين بكام ب١٥٠٠جنيه غير المصنعيه. ٣- الكاوتش هانكوك بس صيني ومع الحفر اللي ماليه البلد دلوقتي عمل بلونه بس كنت ماشي بالعربيه وقتها ٢٥الف وسئلت واحد صاحبي ف التوكيل قاللي ان كان ف واحد حصل معاه نفس الموضوع دا وراح توكيل هانكوك وغيرهوملو بهانكوك كوري ولما رحت وعملت مشكله غيرلي فردة وحدة ب١٨٠جنيه وادني خصم ع التانيه. ٤-العربيه سعات بتهيس شويه وبترجع تتزبظ لوحدها تاني ودي حصلت معايا مرة وحدة. كل دا عادي ومعرض يحصل ف اي عربيه وانا شايف انها عربيه مش وحشه وفيها مميزات تاني كتير وانا شخصيا حبيتها. الطامه الكبري ان لما سئلت صديق ليا شغال ف بيجو ليه العربية دي منزلش منها ٢٠١٣ رد و قاللي انها مش نلزلة مصر تااااااااااااني لان فرق الدولار رفع سعرها ولان هتبقي ٢٠٠٠سي سي وهتتباع في اسيا لان مشكلة البنزين ف مصر قضت ع كل عربيه فوق ال١٦٠٠ انا أسف ع الخبر دا بس دي الحقيقه
ع فكرة ف ميزة وعيبين ف موضوع عدم وجود موديلات منها تاني المزه ان إحنا ١٥٠٠ تقربا ودا عدد العربيات ال٤٠٨ ف مصر هنكون مميزين اما العيوب ١- اسعار قطع الغيار هتولع لان المستوردين مش هيجيبو حجتها ودا انا اكتشفته لما الزجاج بتاع الباب الأمامي انكسر ودورت علية ف مصانع الزجاج كله رد عليا بانها مش منتشره عشان يعملولوها اسطمبه واشتريتو من التوكيل زي الباشا ب٤٨٠ جنيه وركبتو بره ٢- ف حاله اي واحد يفكر ف انه يبيع ربنا معاه ومعانا.
ممكن افيدكو بشويه معلومات عن قطع الغيلر. المتور ٣٠٧ ماعدا طلمبه البور والبنزين وسار الدينامو فلاتر كلها ٣٠٧ ونفس الكلام بالنسبة للتيل ورأ وقدام مساحات المطر ٣٠٨ بالظبط بس لو هيركبو ف ال٤٠٨ هاتخدهم أغلي ١٥٠جنبه تقريبا والله اعلم الفتيس مش بتاع ال٣٠٧ لان كان فيه مشاكل كتير وغيره ف ال٤٠٨ والله اعلم دي المعلومات اللي وصلتها بعد السؤال ودي للمساعده لو حد ليفكر يسيب التوكيل لان أسعاره فوق الرخيصة موووووووووووووووووووت
بص ي باشا
من خبرتي القليلة معاها ف اول ١٠٠٠٠ كم بالنسبةللبنزين واستهلاكه
العربية حساسة جدا جدا لطريقة السواقة
يعني لو هسوق بالراحة و محرقش عليها واغرز حتي لو جوا البلد الاقي معدل الاستهلاك اللي بيظهر ع الشاشة بيقل جدا وكاني ماشي علي طريق مفتوح
بس اول اما اقل عقلي وابتدي اغرز واجري الاقي الهبل بتاع البنزين اشتغل
بالنسبة لقطع الغيار فهو ده العادي بتاع بيجو
اما بالنسبة للمشاكل فهي ضمانها ٥ سنين ولو عامسونا ف حاجة ف التوكيل
جهاز حماية المستهلك من الحاجات المحترمة القليلة اللي فاضلة ف البلد دي
وربنا يسترها
يا باشا تسلم بالنسبة لانها مش نازلة مصر تاني ا رأيك ؟. الموضوع دا مقلقني جداً بس المشكلة لو فكرت أبيع هاخسر كتير وع فكرة انا حبيت العربيه دي جداً وتسلم عالرد السريع وربما يباركلك فيها
العفو يا با باشا
بص انا النهارده كنت ف الحرفيين بغير بلية العجل بتاع ال ٢٠٦ فبسأل واحد من بتوع قطع غيار البيجو عن ال ٤٠٨
فقالي ان العربية دي محدش هيجيبها من بتوع قطع الغيار لانها صيني والصين مبتقطعش عربيات !!!!!!
فقلتله العربية غالبتها ٣٠٧ و ٣٠٨ فقالي المشكلة ف البودي الخارجي مش هتلاقيه الا ف التوكيل
فقلتله ربنا يكفينا شر الحوادث:shyy:
اما بالنسبة لموضوع البيع فمعروف ان re - sell value بتاع البيجو وحش وبتخسر كتير وملهوش دعوة هيا بتنزل والا لا
يعني من الاخر اللي بيشتري بيجو بيشتريها بمبدأ الغاوي ينقط بطقيته:120105~352:
فمتشيلش هم ياباشا سيبها علي الله :)
متشكرين يا باشا على المعلومات و متفكرش تبيع
لان الى بيجيب بيجو عموما بيجيبها للمدد الطويله
ربنا يسترها معاك و معانا
انا من كام يوم برضو مرايتى الشمال اتكسرت و سألت عليها فى التوكيل قالى 1280 تقريباً
بس هحاول اصلحها عشان هى كلها سليمه بس فى فبره ما بين القاعده و المرايه اتقطمت
هحاول اشوف حد يعملها
السلام عليكم حاول تلحمها بره لان ف التوكيل بالمصنعيه هتوصل١٥٠٠ ومش بيبيعو ألف بره دي لوحدها ودربنا يستر طريقك ويسلمك
مشكوووووور والله يعطيك الف عافيه
السلام عليكم ورحمة الله وبركاته
من أسبوع كان عدى على العربيه سنه و يوم بالظبط كان يوم 28-8
وقفت فى مكان و رجعت بعد نصف ساعه ادور العربيه قعدت تعمل اصوات تكتكات كده و المساحات تشتغل لوحدها
و رسائل أيرور على الشاشه
حسيت ان فى فيروس :)
المهم نزلت بصيت معرفتش أعمل حاجه جبت كهربائى قالى البطاريه انتهت يا بيه :)
وفعلا غيرتها و كله بقى تمام
بس فى حد يعرف البطاريه ليها ضمان فى التوكيل و لا لأ (للعلم فقط) لأنى غيرتها وخلاص