الموضوع: استفسار لملاك السبورتاج

المشاركة الأصلية كتبت بواسطة Mohyeldin1974

انا جربتهم هنا الاتنين بنفس المواصفات المصريه
القشقاى 1600 مانيوال وسبورتاج 1600 مانيوال (الاتنين اتوماتيك فى مصر)
اولا احنا مش مختلفين على الصانع و التوكيل فى مصر فى صالح القشقاى بس بصراحه القشقاى قديمه اوى من جوه يعنى التصميم الداخلى فقير جدا وحتى الخارجى واصغر كمان حتى فتيس المانيوال لا يقارن بمانيوال السبورتاج حتى السحب والعفشه بخلاف بقه الكماليات اللى مبتفرقش معايا قوى انا عايز اركب عربيه محترمه وتحافظ عليا واحافظ عليها ، حسيت بالهيبه وانا فى السبورتاج اكتر من القشقاى. ربنا يسهل ان شاء الله انا نازل فى ابريل 2013 اتمنى يكون فى شكل جديد للقشقاى يحسم الموضوع ويريحنى.
اخر مازهق ولا فكر فى دى ولا فى دى وهرجع امشى جنب الحيط واجيب كورولا تانى او اشوف الاوكتافيا

اتفق معاك ان تصميم القاشقاى كلاسيكى وقديم عن السبورتاج خاصة فى الداخل زى ما حضرتك ذكرت
ولكن دى اذواق ومسالة نسبية .. مع الاخذ فى الاعتبار ان ثقل الابواب وجودة بلاستيك التابلوه والكونصول وفرش الابواب وازرار الابواب والزجاج كلها تصب لمصلحة القاشقاى
وعلى فكرة دى اول ملاحظة اخدت بالى منها اول ما استلمت العربية وقبل ما ادورها حتى !!!

بالنسبة للمواتير ال1600 .. ما تنساش حضرتك ان السبورتاج بتنزل بموتور GDI ليس THETA3 زى اللى معايا فى 2.0 و2.4 لتر يعنى فرق تقنية واحساس بالسحب والاستجابة هايكون فى مصلحة الاول بغض النظر عن السعة اللترية

للاسف مفيش شكل جديد هاينزل للقاشقاى قبل آخر 2014 اول 2015 حيث سيتم طرح الجيل الثانى منها .. وسيكون التعديل فقط فى الكماليات المزودة بها السيارة وليس تغيير جذرى فى الشكل الداخلى او الخارجى

نصيحتى لحضرتك ما تشتريش اى عربية الا وانت مقتنع بيها 100% حتى لو نظريا او بناءا على اراء الناس احسن عربية فى الوجود لأن الموضوع نسبى وراحة نفسية واحساس بالامان والثقة وانت سايقها

المشاركة الأصلية كتبت بواسطة mmbadroo

دكتور يوسف
خالص تحياتى لمعاليك .
واسمح لى ان اختلف معك أى معايير حضرتك جآت بها لتجعل هذا التفوق المبالغ فيه يصب فى كافة نيسان مع كامل احترامى لشخصك الكريم
وحضرتك اوضحت انك (مش متحامل على كيا ولا باحابى لنيسان) طيب جميع مداخلات معاليك تأتى بالعكس تماما اسمح لى يا صديقى العزيز ان اكون صريح معك إلى ابعد حد
وتعالى من الناحية العملية وبما انك جربت السيارتين اطلب منك الشهاده امام الله فى نقطتين فقد لاغير
1- قوة الموتور وبالتالى التسارع يحسب لأى من السيارتين
2-العفشة والثبات تحسب لأى من السيارتين
وارجو من شخصك الكريم تحملى
واشكرك على سعة صدرك

ازيك يا استاذ محمد ؟
اختلف براحتك خالص ولا يهمك من اى حاجة باقولها
اقسم بالله العظيم ان ما يلى هو بناءا على رأيى الشخصى واحساسى عند سواقتى لكل سيارة على حده مع الاخذ فى الاعتبار ان السبورتاج 2.4 لتر دفع رباعى والقاشقاى 2 لتر دفع رباعى

1. قوة الموتور بالارقام:
- السبورتاج 176 حصان عند 6000 لفة فى الدقيقة و 228 نيوتن متر عزم / 4000 لفة فى الدقيقة وزمن تسارع (0-100) فى 9.8 ثانية وسرعة قصوى 193 كم/س
- القاشقاى 141 حصان عند 6000 لفة فى الدقيقة و196 نيوتن متر عزم / 4800 لفة فى الدقيقة وزمن تسارع (0-100) فى 11.3 ثانية وسرعة قصوى 181 كم/س
- الاحساس بالفارق ال1.2 ثانية فى التسارع بين الاتنين مش ملحوظ على ارض الواقع لأنه فى النهاية احنا سايقين على طرق عادية وليس حلبة سباق .. ولكن وجود الفتيس الCVT المتواصل فى القاشقاى بيعطى احساس للسائق انه أخذ وقت كبير لحد اما وصل لسرعة 60 كم/س فما فوق عكس فتيس السبورتاج ال6 سرعات المتتالى وكل نقلة بتحس بيها بتضيفلك شعور بالتسارع (ده تفسيرى)

الخلاصة الاداء بالارقام فى مصلحة السبورتاج لفرق السعة اللترية لكن بالتجربة العملية هنلاقى القاشقاى مش بطة ع الطريق ولا السبورتاج فيرارى يعنى بتطير اول ما تدوس بنزين لأن فيه عوامل ثانية منها السائق ووزن السيارة ومقاومة الهواء وانسيابية التصميم الخارجى والارتفاع عن الارض و..... الخ !!!

2. العفشة والثبات:
- بدون مبالغة عفشة وثبات ورشاقة القاشقاى على الطريق وفى الملفات رغم ان الباور كهرباء وعرض الكاوتش اقل 1 سم افضل بشكل ملحوظ لخبراء العربيات عن السبورتاج .
- ثبات السبورتاج كويس اوى فى الخطوط او الطوالى (سرعة + خط مستقيم) حتى 160 كم/س لكن فى الملفات آخرك 50 كم/س (اقصد هنا كمثال للملفات طلعة ونزلة الدائرى على اى محور) ولو اكتر من كده هاتحس بUNDER STEERING كبير وملحوظ عكس ثبات القاشقاى كتلة واحدة ومسمار فى الاسفلت مش عارف ليه ولا ازاى ؟!!!

3. الفرامل والامان:
دى نقطة مهمة جداااااااااااا - اسمحلى اضيفها - تصب فى مصلحة القاشقاى طبعا ويكفى 3 مرات باختبار قيادتها لما فرملت طوارىء على 60 كم/س (مرة واحدة مش باكارك) وكان جنبى مراتى كمان كانت هاتلبس فى التابلوه والعربية ماشاء الله لا سمعتلها صفارة تيل مع طنابير ولا زحفت على الارض ولا دربكة الABS اللى باحس بيها مع السيمفونية فى السبورتاج وفوق ده كله العربية ما حدفتش يمين او شمال ولا مللى حتى !!! بالرغم من انى ما كنتش مكلبش فى الدركسيون .. كنت ماسكه بالراحة خالص او سانده ببطن ايدى مش اكتر من كده
ده غير القاشقاى اللى بتنزل ب2 اير باج فى كل الفئات استاندارد عكس السبورتاج اللى بتنزل ب2 فى اعلى فئة فقط ..

بصراحة بعد المرة الثالثة لما اتكيفت من الاداء ومستوى الفرامل ده اللى عامل زى مخدات ريش النعام .. ما مسكتش نفسى انى اوطى وابوس الطارة ومراتى فطسانة من الضحك ..