الموضوع: غيرت من إبيزا 94 لـــ سيفيا 99 وأتمنى مساعداتكم

المشاركة الأصلية كتبت بواسطة i_am_legend

ياباشا لو علي الثبات والصاج والفرامل..فكل دة موجود في الابيزا...وتعالي اتغرج عندي علي الثبات والفرامل بجد..واتفرج علي التسارع..واتفرج عاملي خامات عربيتي اللانشيا ديدرا...عربية سنة 93 كانت اسطورة...تخيل عربية سنة 93 وفيها تكييف تاتش وتكييف خلفي وكمبيوتر اعطال...انا عموما حافظ الكيا سيفيا كويس جداااااا...وركبتها كتيير ..مع ماكس زيرو مؤسس رابطة السيفيا...وعارف السيفيا كويس...والحاجة اللي يمكن حضرتك ماعترفهاش..اني مش بهاجم العربية خااالص ولا بهاجم سيادتك..انا بس بضايق جدا لما حد يقارن الاوروبي بالكوري لانة مانينفعش اصلا...وغير كدة..معلومة لسيادتك انا اصلا شغال في شركة عربيات..موزع معتمد لكيا ورينو!!...يعني انا في المجال اصلا وبتكلم عن خبرة وثقة...فعلا بعد الركوبة الاوروبي مافيييييييش...تعالي اركب عربيتي اللانشيا..وخد بيها غرزتين ضيقين علي 150 مثلا ..واتفرج علي الثبات...والخامات.ورشاقة العربية والنعومة والطعم الاوروبي اللي مالوش اي مثيل...الاوروبي طعم تاني خاااااالص...زي بالظبط اما تتجوز واحدة بتحبها...وتتجوز واحدة علشان تخدمك وخلاص...!!. هي العربيات كدة...

بصراحة انا ماركبتش اوروبي قبل كدة فامقدرش احكم و انا عارف ان حضرتك مش بتهاجم العربية بس اصل معظم الناس ظالمين العربية دي اوي و بيكرهوها من السمع زيي كدة قبل ماشتريها سمعت كلام يخليك ماتفكرش حتة تشفها بس لما اشتريت للاسف كل و احد قالي كلمة طلع كالعادة بيقلف او بيحكي عالسمع ارجو انك تكون فهمتني

اية يا جماعة داخلين هتمسكو في بعض كدة يا جماعة العربيات ازواق ولو مش ازواق كان زمان مصر كلها راكبة نوع واحد اللي خالي الصيني بيبتاع وعموم الف مبروك يا باشا علي العربية وهية عربية كويسة فعلا ولو حضرتك عايز تعمل سيرقيس للعربية مش هيكلفك كتير حوالي 500 دة لو هتغير سير كاتية وبلي وكل السيوير والفلاتر والبوجيهات وكل دة هتلقية عند حلمي سليمان في التوفيقية اسعار كويسة واصلي او ممكن عند الجندي مصر الجديدة واحنا هنا في رابطة السيفيا كلة بيساعد ومبروك عليك يا باشا

استاذ ضمراني...مع احترامي لسيادتك..السيفيا فعلا من افضل العربيات الكوري مقارنة بالكوري...يعني مثلا هي افضل من الاكسنت..وافضل من اللانوس وافضل من الاكسيل...لكن مش افضل من السيفيك ولا اللانشيا.ولا السيات ابيزا او البولو..الكوري بعيد كل البعد عن الاوروبي..الكوري يقارن بالكوري او الياباني..

المشاركة الأصلية كتبت بواسطة m_adeleid

تابعت مشاركات حضرتك كلها و معاك فيها جدا
الا حته مش افضل من الابيزا والبولو
خلي بالك هوا نازل من ابيزا 94 و في رأيي انها متتقارنش بالسيفيا اصلا (لصالح السيفيا)
لكن انت لو قصدك موديل عالي يبقي طبعا انت صح
ولو اني عمري ما شفت عربيه بسعر الكيا سيفيا ولا حتي في فئه سعريه اعلي قليلا و بتمشي 180 بالتكييف لمده 2 ساعه و من غير توقف والباقي 160 (طريق شرم الشيخ ماعدا الملفات طبعا) وكلي ثقه الحمد لله انها مش حتقصر معايا
غير الوسع في الصالون و الشنطه والكراسي المريحه نسبيا
الاحساس ده هوا اللي مخلي الناس اللي راكباها شايفه السيفيا عربيه مختلفه

متفق مع حضرتك تماما

يا جماعة انا سوقت عربيات الماني كتير هوة الالماني اداء عالي طبعا وعلي من السيفيا بس السيفيا كعربية كوري بالاداء دة انا شايفها هية والسونتا افضل عربيتين سفيا وعلي فكرة انا راكب كيا شوما هية هية السيفيا وعلي طريق سفر بشد مع اي عربية وعمري ما قلقت من ملف مهما شديت مع بي ام او اي حاجة وكلة بيتحط علية وبشغلة المساحة اللي ورا ههههههههههههه يا جماعة قولو للراجل مبروك وساعدوة وانسو الالماني والكوري دلوقتي

طبعا السيفيا ..مميزة بثباتها القوي...بفضل قاعدة العجلات الطويلة..وسبب ان موتورها كويس في الجري..ان موتورها 2 كامة وهو موتور مازدا 323 فاميلي..ودة موتور كويس جدا في الجري...بس مهما كان ..السيفيا ولا النوبيرا..ولا الكريستالة..بياكلوا عيش مع عربيتي اللانشيا ديدرا...عربية من الجحييييييم...لانشيا عربية مش هايتعمل زيها تاني خلاص في الفئة دى...ودة بشهادة فيات ولانشيا...عربية كانت زيرو سنة 93 ب120 الف..تخيل!! يعني كانت بتمن 3 عربيات اكسيل مثلا...انا كنت ممكن اشتري سيفيا ولا اكسيل ولا حتي سويفت...بس اعذرني..انا ركيب اوروبي..وماعرفش احط رجلي في العربيات دي..لاني ممكن اقلبها ..او ممكن تعررض من في في غرزة..لان سواقتي رياضية معظم الوقت...وسواقتي كلها طرق سريعة ودائري..ومعظم المشي 140 ل170 وبخاف اجيب اكتر من كدة برغم الثبات الممتاز والباور التحفة...بس بردوا...علشان الحق المها مهما كان...لان بلدنا مافيهاش قواعد للمرور...