الموضوع: العربيه بحس انها هتولع ؟؟؟ اعمل ايه:(

السلام عليكم
الحمد لله ربنا وفقنا واشترينا اوبل فيكترا موديل 97 اتوماتيك 2000 cc عامله حوالي 215000 كيلو
جبناها علي 45000 جنيه
العربيه ما شاء الله حلوه وعاجباني (خصوصا الشكل) بس عندي كذا مشكله اهمها :

درجة الحراره : بتوصل فوق التسعين واكون لسه مشغل العربيه مفيش بتاع 15 او 20 دقيقه
وبحس بالصهد من قبل اما اجي افتح الكبوت (بخاف اقربلها والله ) والعجيب ان مؤشر درجة الحراره بيبدا من 80 يعني العمليه كلها 10 درجات وتوصل 90 والراجل قايلي ان المروحه بتشتغل بعد التسعين
وكمان قايلي ان العربيه لما بتبقي ماشي هادي بالعربيه درجه الحراره بتبقي عاليه انما لو ماشي علي السريع درجه الحراره بتقل جدا (مش فاهم بصراحه الموضوع ده )عموما هو قالي ان المروحه ممكن نغير الدرجه اللي تشتغل عندها مثلا 60 بس قايلي الالمان عملنها كده علشان هما فاهمين العربيه كويس ( اكيد مش هنفهم اكتر من الالمان ) بس درجة الحراره برضه مش مريحاني
الراجل كان بيحط للعربيه بنزين 80 بس انا بقيت احط 92 هل ده هيفرق معايا في صوت الموتور بالاضافه لسحبة العربيه معايا مش بحس اني سايق الماني او راكب 2000 cc
فهل ده ممكن يكون من البنزين ولا لان العربيه طلع عينها (215000كيلو:( مش عارف )
احنا لسه جايبين العربيه امبارح وانا مبتدئ في العربيات والسواقه (خبره خفيفه علي قدنا كده )
ولسه مفيش ميكانيكي شافها (لان اللي بايعهالنا واحد قريبنا (صنايعي) وفيه ثقه وكده بس انا بصراحه مش واثق ) هو قعد يقول لوالدي ده انا تربيتك يا باشمهندس والحكايه والروايه المهم عملنا البحر طحينه )
ماعلينا من كل ده
لو انا عايز اكشف كمبيوتر علي العربيه اروح لمين ؟؟؟ انا من المنوفيه علي فكره (سمعتك يلي بتشتم علي فكره المنايفه غلابه بس منهم لله اللي بوظو السمعه)
اه صحيح هو العربيه اعرف منين انها a او b وايه الفرق وهو نوع الموتور بتاعها الايكوتك ده ولا ايه ؟؟ انا مش عارف اي حاجه في العربيات
معلش اخر حاجه وهسكت والله عارف اني رغاي بس ده اول مره نجيب عربيه معلش استحملوني
الاشاره الشمال مش شغاله ورا وقدام لا وايه كنت واقف ومش راكب العربيه لاقيت الاشاره اشتغلت لوحدها وبعدين سكتت بتشتغلني الهانم وكمان الانتظار مفيش ولا لمبه تنور توحد ربنا(انا شاكك ان الراجل اللي بايعهالنا انه لما غسلها لان عنده مغسله بوظ الكهربا بتاعة العربيه بناءا علي تجربه واحد صاحبي برضه اما غسلها عنده (لانسر 2005 ) بهدله الكهربا في العربيه
جزاكم الله كل خير
ومستني خبراتكم يا اهل الاوبل

ربنا يوفقك و يكرمك بالعربيه الجديده و يبارك لك فيها ,
انا أتعلمت كتيييييير من المنتدي حاول تتابع المواضيع القديمه وحده وحده ح تخليك تكون فكره كويسه عن العربيه و الناس هنا محترمييين
بالنسبه للحراره في مواضيع ممتازة في الموضوع ده مثلا
http://www.nilemotors.net/Nile/25627-a.html

و كمان شوف مواضيع تنضيف دائرة التبريد و المياه المقطرة