ميكروباص سوزوكي كسر عليا ودخل في الاكصدام ، وجبت منه حقي !!

السلام عليكم يااصدقائي

انا هحكي اللي حصل ولو كنت غلطان قولولي بصراحة ،

انا ماشي في امان الله في شارع النحاس بطنطا ، عديت اشارة ولاقيت سواق ميكروباص سوزوكي بيزعق ويقول اييييييييييييه انت هدخلني في الرصيف ..
طنشت ومشيت في طريقي ، الاقي البية جاي من ورايا وقايد النور العالي في وشي وطنشت لاقيت راح جاي من علي اليمين وميل بالعربية عليا و حك عربيته في اكصدام عربيتي من قدام.
انا قولت كدا بقي استهبال رسمي روحت جريت وراه ووقفت في نص الشارع ، والناس اتلمت ..
قولتله اية اللي انت هببته دا بالكرتونه بتاعتك دي
رد قالي مانت اللي كنت عايز تدخلني في الرصيف والكرتونه دي ب 100 الف بتاعتك اخرها 60 الف
قولتله ميت زفت عليك وهو انت دخلت في رصيف علشان تدخل فيا بالطريقة دي
لاقيته بيرد بغباوة وعشان متعملش كدا تاني وتمشي في طريقك
قولتله انا مش هسيبك يا.... برضة قالي لفظ مش هقدر اقوله
المهم ركبت عربيتي وسيبته يعديني وطرت وراه وجبت الشومة بتاعتي من تحت الكرسي
وفضل يزنق عليا بهبل وروحت دايس بنزين و طالع من جمبة اليمين وروحت جايبلة المراية اليمين بالقاعدة في الشارع بالشومة اللي كانت في ايدي وازازها حتي دخل عربيتي شوية منه
وطرت بالعربية و حاول يجبني بس معرفش
هل انا كدا غلطان مع ابن التييييت دا و لا جبت حقي
وعالفكرة هو شكلة شبورة يعني لا كان هينفع معاه محاضر ولا اقسام والكلام دا
لما روحت البيت بصيت علي العربية لاقيته حك الاكصدام اللي قدام وشال البوية بتاعتة من الجمب ودخل لجوا شويه.

لاء انتا كدة مش غلطان مع العالم دى يبقى مش غلطان

والنبي انت برنس. ويا سلام لو كان معاك واحد جمبك بقي ولا لو معاك طبنجه وفرتكتله الاربع كاوتشات ياااااااه

اقتباس:

---

المشاركة الأصلية كتبت بواسطة ibn_seena

والنبي انت برنس. ويا سلام لو كان معاك واحد جمبك بقي ولا لو معاك طبنجه وفرتكتله الاربع كاوتشات ياااااااه

---

انا مطولتش معاه لان معظم السواقين دلوقتي شايلين فرد خرطوش وبهايم يضربوا علي اى حد
واللي انت بتقول عليه دا صعب اوي انا ضميري ميخلنيش اضربلة فرد كوتش العربية كلها عشان حكة ولو انه يستاهل اقلبله العربية وهو فيها بقله ادبه اللي شوفتها منه :angry26::angry26:

لا طبعا ..

شكلي كده هشتري البيبر سبراي حمدلله علي سلامتك ياباشا

كلمة واحدة أنت برنس و الله نفسي نعمل كلنا كدة مع سواقين المكروباص دول

مش غلطان .... بالعكس

كله بيبلطج

أحسن برضه
ياريت كمان تبلغ فيه وتعمله محضر عالم ميعرفوش ربنا

عملت الصح ياباشا و مش مشكلة اللي حصل في الاكصدام بس بتوع السوزوكي بيتعلم عليهم كتير جدا مرة واحد صاحبي فعلا لبس واحد في رصيف مفرق كان بيعمل زي ماعمل معاك كدة و معلش 100 الف ايه الجربان
بس برافو برافو برافو

والله انت راجل جدع..ايوا كدا علمت عليه برنس بصراحة :018A1D~146:

بس بصراحة هو يستاهل يعني لو كان خبطه بدون قصد ونزل اعتذر مثلا اعتقد ان رد فعل صاحب الموضوع كان اختلف..لكن هو خبطو قاصد وكمان نازل يبجح ويقل في أدبو راجل تيـــــــــت لا مؤاخذة.

:Bravo:

انت جدع ...

حمد الله على السلامه ........................................

مش قادر اقولك برافوا عليك ... وبردو متعاطف معاك ومش قادر ألومك واقولك انت غلطان على رد فعلك العنيف
من اللى بنشوفه من ولاد اللذين دول ومن اللى حصل معاك

بس هقولك حمد الله على السلامة وقدر الله وماشاء فعل والحمد لله ان الموضوع لم يتطور الى اكتر من كده
وربنا يسترها معانا ومعاك فى الغابة اللى احنا عايشين فيها ديه

للأسف انتوا الإتنين خسرانين والمستفيدين هما بتوع قطع الغيار والسمكرى

كان نفسى تاخد حقك بالقانون زى المشكلة اللى حصلتلك المرة اللى فاتت فى شارع سعد الدين لما ضرب الكاوتش المطواه .. إن لم تخنى الذاكرة مش انت بردو المحامى صاحب القصة ديه ؟

واحدة بواحدة و البادى أظلم
برافوعليك

انا مقرتش كلامك لسة .. بس انا متأكد انك 100 في المية صح لانهم كلهم اشكال وسخة عايزة الدبح

غلطان طبعا لان مفيش غلط بيتصلح بغلط

السواق غلط وانت غلطت غلطة كبيرة لانه لو كان لحقك ووقف بمكيروباصه بالعرض ونزل بشومه وانت بشومه لا قدر الله العواقب مش هتكون سليمة
انا مع انك اول اما نزلت كنت تاخد حقك لكن حوار hit and run مش بحبه ابدا

اهىء اهىء انت كده فل الفل بس لو سواق السوزوكى ده شافك تانى مش هيعتقك خصوصا لو هو ماشى وراك وانت مش واخد بالك منه ممكن يحدف عليك طوبه يكسرلك الازاز الخلفى ويجرى وانت مش هتشوفو خد بالك بقا وانا حذرتك

أشكركم جميعاً علي ردودكم

اقتباس:

---

المشاركة الأصلية كتبت بواسطة khaled lanos

والله انت راجل جدع..ايوا كدا علمت عليه برنس بصراحة :018a1d~146:

بس بصراحة هو يستاهل يعني لو كان خبطه بدون قصد ونزل اعتذر مثلا اعتقد ان رد فعل صاحب الموضوع كان اختلف..لكن هو خبطو قاصد وكمان نازل يبجح ويقل في أدبو راجل تيـــــــــت لا مؤاخذة.

---

بالظبط لو كان اعتذر او قال كلمة حلوة ، مكنتش فكرت اني اخسره زي ماخسرني
دا بيكلمني ومنشكح وسعيد انه خسرني وأذاني في العربية ومشي اكنه معملش حاجة

اقتباس:

---

المشاركة الأصلية كتبت بواسطة elawany13

مش قادر اقولك برافوا عليك ... وبردو متعاطف معاك ومش قادر ألومك واقولك انت غلطان على رد فعلك العنيف
من اللى بنشوفه من ولاد اللذين دول ومن اللى حصل معاك

بس هقولك حمد الله على السلامة وقدر الله وماشاء فعل والحمد لله ان الموضوع لم يتطور الى اكتر من كده
وربنا يسترها معانا ومعاك فى الغابة اللى احنا عايشين فيها ديه

للأسف انتوا الإتنين خسرانين والمستفيدين هما بتوع قطع الغيار والسمكرى

كان نفسى تاخد حقك بالقانون زى المشكلة اللى حصلتلك المرة اللى فاتت فى شارع سعد الدين لما ضرب الكاوتش المطواه .. إن لم تخنى الذاكرة مش انت بردو المحامى صاحب القصة ديه ؟

---

الله يسلمك وانت عندك حق وانا كنت ناوي علي محضر بس رجعت وقولت مش هطول حاجة منهم ولاد التييت دول وبعدين كل واحد وليه اسلوب للتعامل معاه
يعني يوم المحضر دا كان محل وليه سجل تجاري ويخاف من المحاضر وعلي أبنه
انما سواق ميكروباص زي اللي انا قابلته دا شكلة مسجل خطر يعني القسم عنده والمحاضر دي ولا يفرق معاه.
الحمد لله عدت علي خير وزي مانت قولت احنا الاتنين خسرانين ودا احسن ماامشي انا الخسران وبكرة يكرر اللي عمله مع واحد غيري

اقتباس:

---

المشاركة الأصلية كتبت بواسطة saiedccs

واحدة بواحدة و البادى أظلم
برافوعليك

---

الله ينور / البادي أظلم

اقتباس:

---

المشاركة الأصلية كتبت بواسطة eng f3lix

انا مقرتش كلامك لسة .. بس انا متأكد انك 100 في المية صح لانهم كلهم اشكال وسخة عايزة الدبح

---

اشكال مش وسخة وبس وبلطجة وقله ادب كمان

اقتباس:

---

المشاركة الأصلية كتبت بواسطة semi

غلطان طبعا لان مفيش غلط بيتصلح بغلط

---

عندك حق مش هقدر اقول كلامك مش صح

اقتباس:

---

المشاركة الأصلية كتبت بواسطة ninevision

السواق غلط وانت غلطت غلطة كبيرة لانه لو كان لحقك ووقف بمكيروباصه بالعرض ونزل بشومه وانت بشومه لا قدر الله العواقب مش هتكون سليمة
انا مع انك اول اما نزلت كنت تاخد حقك لكن حوار hit and run مش بحبه ابدا

---

عندك حق ولو كان الطريق وقف كان ممكن تبقي مشكلة كبيرة فعلا ومواجهة الله اعلم بنهايتها بس وقت المشكلة بيصعب عليك نفسك وعربيتك يحصلها كدا بالقصد ويمشي اللي عمل كدا بالساهل
أشكرك علي المشاركة

اقتباس:

---

المشاركة الأصلية كتبت بواسطة koshary

اهىء اهىء انت كده فل الفل بس لو سواق السوزوكى ده شافك تانى مش هيعتقك خصوصا لو هو ماشى وراك وانت مش واخد بالك منه ممكن يحدف عليك طوبه يكسرلك الازاز الخلفى ويجرى وانت مش هتشوفو خد بالك بقا وانا حذرتك

---

ربنا يسترها ان شاء الله ، انا مظلمتش حد الحمد لله لاني كنت رد فعل.

[img3]http://sphotos-b.ak.fbcdn.net/hphotos-ak-snc7/320304_500532556638600_135188755_n.jpg[/img3]

رأيي انك غلطان:
1- غالباً انت فعلاً عملت حاجة غلط هي اللي استفزته من الأول.
2- لو هو طلع بيئة ومعفن وهمجي وحك لك العربية.. تقوم انت تنزل لمستواه وتبدأ بالشتيمة؟؟
3- على فرض انك مش غلطان في أي حاااااااااااجة خالص.. يبقى ايه هو حقك؟؟ حكة بحكة.. مش مرايا بالشيء الفلاني.!!
4- اسلوب العنف والشوم والكلام ده -متزعلش مني- هو بالضبط الأسلوب اللي بيخلي الناس قرفانة من بتوع الميكروباص وبيأيدوك على اللي عملته معاه.. رغم اني شايف ان في الموقف اللي انت حكيته هو كان أقل عنفاً منك بشكل كبير.

أرجوووووك ماتزعلش من كلامي.. انت اللي سألت وطلبت رأينا.. صح؟

طيب افرض في يوم وانت سايق لمح عربيتك و جابك و كسرلك فانوس ولا حاجة هتعمل ايه يا برنس

برنس الليالي :-d

بس خلي بالك عشان اللي أعرفه ان طنطا صغيره أوي و ممكن يجيبك لو حطك ف دماغه

اظن الموضوع ده قديم قوي يا جماعه ولا ده موقف جديد مشابه لحد حصله كده ؟