اسمه الاترا سونيك
و ده مش موجود غير عند ورش قليله قوى قى القاهر
على ما اتذكر كان محمد ممدوح قال ان فيه واحده فى زهراء المعادى ... و فيه واحده قى اول فيصل
عرض للطباعة
انت محتاج تعاير الرشاشات تروح التوكيل او اي حد محترم
العربيه بتتحط على جهاز على السلانسيه وكمان وهي بتتحرك والجهاز متسجل فيه الرشاش بيضخ اد ايه بنزين ويقارن بالفعلي
لو تمام يبقى تروح تغير فلاتر وبوجبهات ويتبص على سير الكاتينه وتحاول تشوف فلتر البنزين طبعا
اعرف ورشه في صقر قريش فيها جهاز الالترا سونيك
وفعلا بيفرق في الاستهلاك
الالترا سونك موجود كتير
مركز الصفا في الحرفيين وورشة تانية في الحرفيين بتاعت واحد صاحبي
بس انا عندي نفس مشكلة استهلاك البنزين ومش لاقي اي حل ليها
لو عرفت ياريت تقولنا
احب أقول ان استهلاك البنزين له عدة عوامل كتيرة جداً
بس قبل ما اتكلم في العوامل عايز اقول فكرة ضخ البنزين بالنسبة للمحركات الأنجيشكن
طبيعي ومعروف ان لو العربية تغذيتها أنجيكشن يبقي فيها كنترول يونت
ودور الكنترول يونت* ينحصر في حساب توقيت فتح وغلق الرشاش بناء علي المعلومات الصادرة من الحساسات المنتشرة في المحرك وبعض أجزاء السيارة
* طبعاً كلامي علي الدور الأهم في الكنترول - وليس معمم علي كل وظائف الكنترول يونت التي اصبحت اليوم تتدخل حتي في تشغيل المساحات والأنوار الخارجية
طب بعد المقدمة دي تعالوا نعرف ازاي ممكن اوفر قدر المستطاع في الأستهلاك
1- الصيانات الدورية
2- طريقة القيادة
3- بعض النصائح العامة
الصيانات الدورية
= من أهم الصيانات الدورية - تنظيف رشاشات الأنجيكشن
وتنظيف الرشاشات ممكن يتم بشكل يدوي او عن طريق منظف الرشاشات وأضافات الوقود او عن طريق جهاز الموجات فوق الصوتية Ultra Sonic
الطريقة اليدوية - تطلب مهارة وخبرة بالفك والتركيب في اجزاء المحرك
طريقة الأضافات - هي الطريقة الشائعة والأقل خبرة ومجهود
طريقة الجهاز - تحتاج متخصص ولكنها ان لم تقدم نفع فلن تضر (غالية بعض الشئ)
= تاني اهم صيانة دورية - تنظيف الحساسات المنتشرة في المحرك والتي يعتمد عليها الكنترول كلياً وجزئياً في احتساب قدر الوقت period لفتح الرشاش وضخ الوقود
وسأذكر أهم الحساسات المؤثرة في الأستهلاك والأكثر شيوعاً بين المصنعيين علي اختلاف اسماءها من مصنع لأخر
1- حساس الشكمان او lambada sensor - دة مش بيتنظف ولكن بيتم الكشف عليه بالكمبيوتر
2- حساس الحرارة - بردو مش بيتنظف ولكن بيتم الكشف عليه ايضاً بالكمبيوتر
3- حساس البوابة او tps - دة بيتنظف الصراحة ودوره قياس القدر المفتوح من البوابة (طبعا فتحة البوابة تعني قدر من الهواء - فلو مفتوحة اوي يبقي هتدخل هواء كتير يبقي محتاج قصاد الهوا بنزين بكمية مناسبة)
4- حساس كتلة الهوا او الأير ماس او الماب او الماف - ودة بيتنظف ودة بيقيس حاجتين كمية الهواء وسرعة تدفقها
5- حساس درجة حرارة الهواء الداخل للبوابة
ويمكن الكشف علي جميع قراءات الحساسات ومقارنتها بالقراءات القياسية - يعني من الأخر هتاخد تقرير بالكشف وتطلع بيه علي القسم عندك تفلوه كويس اوي عشان تعرف انهي حساس بيقرا قراءات خاطئة وبناء عليه بيغذي الكنترول بمعلومات خاطئة او بيزور القراءات للكنترول وبناء عليه خلل في العمليات الحسابية المعقدة جدا تنتج عنها استهلاك غير طبيعي للوقود
= ثالث اهم صيانة - الفلاتر
وطبعا الفلاتر تنحصر في
- فلتر هواء (اوعي يكون فلتر رياضي وعاملك الوش دة كله)
- فلتر البنزين (مهم جدا)
= رابع اهم صيانة - طرمبة البنزين نفسها
حاول تنظفها اما بالفك من قلب التانك (عملية صعبة وتحتاج مهارة)
او عن طريق منظف الدورة بالكمال stp العلبة الفضي ب70 ج
= خامس اهم صيانة - مراجعة الكوليهات وأربطة الأحكام في دورة البنزين بالكامل من اول التانك لحد مسطرة الرشاشات
= خراطيم الفاكيوم الخارجة والداخلة من البوابة
= نوع زيت المحرك والفلتر
= البوجيهات وسلوك البوجيهات واختيار انسب بوجيه للمحرك
تنظيف اطراف سلوك البوجيهات الموصلة بين البوجيه والأسبراتير
= البوابة - تنظيف البوابة مهم جدا
اما يدويا باستخدام مناديل ورقية او بأسبراي تنظيف intake cleaner
طريقة او اسلوب القيادة
نصائح وارشادات عامة
الجزئيتين دوول مذكورين بالشرح الوافي في الموضوع دة
http://www.nilemotors.net/Nile/26712...post3874055768
وان شاء الله في جزء تاني هينزل بعد العيد من الموضوع - اصدار تاني - اكثر تنقيحاً ومعالج فيه بعض الأخطاء بالأضافة لنصائح اكثر ان شاء الله
وان شاء الله لو اتبعت الصيانات المذكورة بجانب الأرشادات في الموضوع السابق هتحس بفرق واضح في استهلاك البنزين
مع اطيب تمنياتي بالتوفيق
وكل عام وانتم بخير
واحب أضيف ان الصيانات الدورية عمرها ما هتضر وياريت نعرف نعملها بأيدينا وعلي فترات متقاربة (مش عايزة مجهود ضخم ولا عدة كتير)
واضيف كمان - ان استهلاك البنزين هو اكبر مؤشر لسلامة اجزاء المحرك وبجرد ملاحظة اي اختلاف في الأستهلاك يجب الكشف فورا علي الأجزاء التي ذكرتها في بند الصيانات الدورية
لأن كما اتفقنا ان كلها منظومة واحدة تمد الكنترول بمعلومات بناء عليها بيقوم بحساب كمية الوقود اللازمة - فلو القراءات خاطئة هتكون النتيجة نتائج خاطئة في المعادلات الرياضية المعقدة ومن ثم استهلاك بشكل غير سليم