الموضوع: المختصر المفيد في دوره التبريد (دوره التبريد وتعديلاتها الهندسيه)

السلام عليكم ورحمه الله وبركاته
ازيكم ياوحوش ارجو ان تكونوا بخير طبعا انا بعتذر جدا عن قله مشاراكاتي الفتره اللي فاتت النهارده جايبلكم موضوع بيهم اي واحد راكب اوبل او نفسه يركب اوبل وده عباره عن الخلاصه في دوره التبريد

الموضوع حصري لأعضاء نايل موتورز فقط وغير مسموح بالنقل او الاقتباس الا بعد الموافقه الشخصيه

الموضوع اللي هتكلم عليه النهارده ده خلاصه تجاربي مع العربيه خلال 4 سنين واكتر من 100000 كم وغيرت فيهم مرتين جوان وش سلندر يعني الحمد لله خلاص بقيت خبره في مواضيع دوره التبريد والكلام ده
الكلام اللي هكتبه في الموضوع النهارده ده عامله في عربيتي ومجربه ليا اكتر من 6 شهور(15000كم ) من شهر 4 الي فات وبلا أي مشاكل تذكر وتمت تجربته تحت اقصي ظروف التشغيل واللي عاوز يشوف الوضع علي الطبيعي يكلمني وانا تحت أمره في اوقت
....ملحوظه :الكلام اللي هقوله كله تم تنفيذه بعد ماعملت الدراسات والحسابات الخاصه بيه ومراجعه المراجع والكتب ودليل الصيانه الخاص بالعربيه للتأكد من انه مش هيسبب أي اضرار سواء علي المدي البعيد او القريب لأي حاجه من مكونات العربيه )

........للناس اللي مايهمهاش تعرف التفاصيل انا عملت ملخص للموضوع في الأخر ممكن يرجعوله بدون الدخول في تفاصيل هندسيه قد تكون غير مفهومه للبعض

نبداء بحته حته في دوره التبريد
اولا طرمبه المياه :-
لازم تتأكد من سلامه طرمبه المياه عندك وانها مش بتطلع اي اصوات غير مستحبه او بتسرب مياه من الميكانيكال سيل بتاعها ولو هتغير طرمبه المياه حاول تجيب الطرمبه اللي القلاب بتاعها معدن مش فيبر ويفضل تغيير الطرمبه مع كل غيارين سير كاتينه (80 الي 90 الف كيلو متر)

ثانيا الردياتير:-
ودي نحط تحتها 1000 خط خلي باللك الردياتير هو روح العربيه في الاوبل ولو الردياتير بتاعك وحش هيكرهك في اليوم اللي اشتريت فيه عربيات من أصله
1-لو بتحط مياه حنفيه يبقي تفك الردياتير من العربيه خالص وتخلي الراجل يفك علبه من الجنب ويسلكهولك وبعدين يقفل كويس
2- تتأكد ان مفيش تسريب من أماكن تركيب الترموستات (القلاووظ بتاعها )لانه دايما بيسرب علي خفيف والمياه تنقص وانت مش بتلاحظ النقصان ده وانت بتركب الترموستات لف عليهم شويه تيفلون (بيتباع علي شكل بكر زي بكر شريط اللحام عند بتوع الأدوات الصحيه ) عشان مايسربش
3-تتأكد ان الردياتير ثابت مكانه كويس في العربيه عشان مايتحركش من مكانه مع المطبات وتيخرم
4-لو فكرت تغير الردياتير هات الردياتير اللي المواسير بتاعته مدوره مش مبططه عشان ده مش بيتسد أبدااااا

ثالثا:شجره الخراطيم :-
شجره الخراطيم لازم تبقي نمره واحد ونصيحه بلاش تجيبها استيراد لانها اغلي من الجديده هاتها جديده تايواني ب350 جنيه وانساها

رابعا:غطاء القربه
غطاء القربه ياريت تجيبه جديد من التوكيل ب50 جنيه تقرياب وتنساه وخلي بالك من البلفين اللي فيه من تحت عشان ساعات الميكانيكي بيشد اي واحد منهم السوسته بتاعته مبتتظبطش ومعرفش ليه بيحبوا يشدوها من غير سبب
ولو جيبته جديد ب25 جنيه هيشتغل معاك برضه (للأمانه انا شغال بابو 25 جنيه وزي الفل)

خامسا :سائل التبريد
قدامك خيارين والاتنين مش مكلفين
1- تحيب كانزايه ابرو مياه خضراء ب10 جنيه و5 قزايز مياه مقطره ب1.5 الواحده وتحطهم في العربيه
2- او تجيب جركن مياه خضراء من موبيل او توتال او حتي من كارفور المهم ماتحطش مياه من الحنفيه عشان الصداء

سادسا:ترموستات المراوح وضفيره المراوح
كل اللي فوق ده كوم والشق ده كوم تاني
لو عاوز تظبط حراره عربيتك وتنسي مشاكل الحراره والسخونه وكل الكلام ده
يبقي تغير الترموستات اللي نازله بيه(العربيه بتنزل بترموستات100-95 \115-110)
وبما أن العداد مأخر 10 درجات عن الترموستات هتلاقي المراوح بتشتغل سرعه اولي علي 90 وتفصل عند 85 والسرعه التانيه عند 105 وتفصل عند 100 وساعات بتبقي السرعه التانيه اقل 5 درجات
المهم بقي انك تشيل الترموستات ده خاااااالص وتركب ترموستات مكتوب عليه (92-87 \102-97)
تمنه بالمناسبه 90 جنيه جديد
والأهم من كل ده انك تروح عند كهربائي يشغلك المراوح علي السرعه التانيه مباشره هعملكم موضوع قريب عن طريقه تشغيل المراوح علي السرعه التانيه


بعد ماتعمل الكلام اللي فوق كله ده هتلاقي الحراره عندك 82 وتهدي توصل تحت ال80 بملي والمراوح تطفي وبعدها بدقيقه ولا حاجه كده تطلع ل 82 تاني وهكذا (يعني حراره الموتور تتراوح من رينج 92 :87 ) وبالمناسبه ده رينج تشغيل المراوح الموجود في معظم العربيات في السوق المصري يعني الدايو والهيونداي والتويوتا
كلهم المراوح بتاعتهم بتشتغل عند 92 وتفصل عند 87
فيه حاجه بقي وانت ماشي علي الوضع ده هتلاقي الحراره في الايام الحر ومع القرص بتعلي وتوصل لغايه 85 او 87 مثلا لكن استحاله تزيد عن كده ابداااااااا وعشان نتغلب علي الموضوع ده يجي دور الجندي المجهول بتاعنا توموستات الكوعه :
سابعا:ترموستات الكوعه
ترموستات الكوعه ده الكلام كتر اوووووووووي عنه الفتره اللي فاتت فيه ناس كتير مش مقتنعه بوظيفته وناس كتير مقتنعه بيه لكن ملخص الكلام في تروموستات الكوعه
الترموستات في العربيات الي مواتيرها مش حاميه (زي الياباني والكوري وكده ) معموله عشان تسخنها (مش بتخلي درجه الحراره تقل عن رينج معين)
وفي العربيات اللي مواتيرها حاميه (زي الاوبل والمرسيدس والالماني عامه ) معموله عشان تبرد العربيه( بتخلي المايه تقعد في الردياتير اكبر فتره ممكنه عشان تلحق تبرد وبعدها بتفتح عشان المياه البارده تخش الموتور تبرده عقبال ماالمياه السخنه اللي كانت في الموتور تبرد في الردياتير )
ده غير ان ترموستات الكوعه بيحافظ علي عمر اطول للموتور (اغلب المواتير اللي بتعد كيلومترات كتيره هتلاقي الترموستات راكب فيها ) عشان بروده الموتور الزياده او سخونته بتسبب تسلخ وتأكل للشمايز والشنابر .
ملحوظه :درجه حراره بدايه فتح ترموستات الكوعه لازم تبقي 87 لا أكثر ولا أقل
بعد ماتركب ترموستات الكوعه هتلاقي مؤشر الحراره عندك عامل زي مؤشر الدايو والنيسان ثابت علي 82 وينل لحد تحت ال80 بملي ويعلي تاني 82 ولو علي الطريق هتلاقيه تحت ال80 بملي يعني بيتحرك في حدود ملي ميترات وتحت أقصي ظروف التشغيل المؤشر هيفضل عندك علي 82 وبيلعب في الرينج ده وهي دي وظيفه ترموستات الكوعه ان الحراره هتفضل ثابته مهما حصل (بتسوق الفجر او حتي اخر الليل حتي ولو سايق الساعه 2 الضهر في عز الحر ومقضيها سبورت مود وكيك داون هيفضل علي 82 )



ملاحظات :
لو عربيتك موتورها 2000 ايكوتيك هات ترموستات الكوعه بالكوعه بتوع الليجانزا هتلاقيهم عند ابو الحسن بتاع قطع غيار الدايو اللي في بين السرايا ب100 جنيه behr وتروح عند خراط يركبلك ليها بزبوز بحرص عشان تركب علي مكان بتاعتك (الفرق بين كوعه الدايو والاوبل البزبوز اللي بيركب فيه الخرطوم اللي راجع من القربه )
واوعي المكيانيكي يقولك افكلك الترموستات من الكوعه بتاعت الدايوواكبهالك في الكوعه بتاعت الاوبل عشان لو عمل كده يبقي مالهاش لزوم لان الكوعه بتبقي مخروطه بشكل يتناسب مع الترموستات عشان ماتعديش المياه ابدا طول ماهي مقفوله وممكن تجرب بنفسك لو نفخت من مكان خرطوم الكوعه هتلاقيها كأنها مسدوده


ملاحظاتي علي العربيه بعد ماعملت الكلام ده
1- صوت العربيه بقي أهدي من الأول بكتير
2-مهما حصل هتفضل الحراره عندك ثابته وفي رينج الامان لدرجه ان جوان الفرن فضل مسرب عندي من 3 هعيون وفضلت ماشي بيه في من غير اي احساس بتغير في درجه الحراره بالزياده او النقص
3- معدل نقص المياه من القربه قل خاااااااالص بل يكاد يكون انعدم بقيت بزود كوبايه كل شهر مثلا او اقل
4-حراره حوض الموتور قلت بشكل ملحوظ للغايه (عمر اطول لكل المكونات الموجوده في الحوض)
5- استهلاك البنزين بقي مظبوط للغايه بل يكاد يكون قرب من ارقام الكتالوج بتاع العربيه
6- زيت الفتيس بقيت ينزل لونه محمر عكس ماكان بينزل لونه بني قبل كده (يعني عمر اطول للفتيس وملحقاته )
7-كانت ساعات احس انه فيه سخونه بتدخل العربيه عند الدواسات بعد اي مشوار طويل وساعات كنت بحس بسخونه عند الكونصول تحت فرامل اليد والفتيس لكن الكلام ده انتهي
8-معدل البخر في زيت الموتور قل عن الاول خالص (كنت بحط شل الاحمر واقعد بيه 3000 كيلو في الشتاء وينزل ناقص ربع لتر ولونه محروق شويه دلوقتي بغير برضه شل الاحمر وعند نفس التاجر وبيعقد 3000 في الصيف وبينزل 4 لتر ولونه طبيعي
9-اداء العربيه بقي ثابت مهما طال المشوار
10-المراوح بقيت بتشتغل وتفصل باستمرار زي العربيات كلها بعكس الاول كانت تفضل شغاله عيلي السرعه الاولي علي طول عشان مكانتش بتلحق تفصل


ملحوظات أخيره :
*من الطبيعي انك هتلاقي حراره العربيه بتعلي وتوصل ل87 وممكن توصل لحد 90 لكن مش هتزيد عن كده مع تشغيل التكيف وان شاء الله اول ماهوصل لحل للموضوع ده هقولكم عنه بس انا مش شايف انها مشكله
....حراره العربيات المانيوال اقل بكتير من حراره العربيات الاوتوماتيك عشان زيت الفتيس الاوتوماتيك بيخش الردياتير يتبرد وبيدخل عند درجه حراره من 90 الي 100 ويخرج عند حراره من 70 الي 80 عشان كده تحت اي ظرف حراره عربيتك الاوتوماتيك مش هتقل عن 75 يعني تحت ال80 ب3 ملي كده


الملخص
............ قبل ماتعمل اي حاجه تتأكد ان عربيتك بلا اي مشاكل جوهريه او سخونه زايده عشان الكلام اللي هتعمله ده عباره عن تعديل للوضع الاساسي بتاع العربيه ولو الوضع الاساسي مش سليم يبقي التعديل مالوش لزوم ويعتبر مصاريف علي الفاضي

1-تتأكد من سلامه طرمبه المياه وتغيرها كل غيارين سير كاتينه للوقايه
2-لو الردياتير بتاعك حالته كويسه تفكه من العربيه وتوديه لبتاع الردياترات يفك علبه من علب الجنب ويسلكه كويس وبعدين تركبه
3-تتأكد من ان القلاووظ اللي بيركب فيه الترموستات سليم ومش متاكل عشان مايسربش مياه
4-تشتري ترموستات مكتوب عليه (92-87: 102-97 ) هتلاقيه ب90 جنيه جديد وبكره تيفلون من بتوع الادوات الصحيه بجنيه (بيبقي شبه شريط اللحام الابيض بالظبط )وتلف قلاووظ الترموستات كويس قبل ماتركبه
5-تشتري ترموستات الكوعه بتاعت عربيتك وتركبها ودي اهم ما في الموضوع
6-تجيب مياه خضراء موبيل او 5 قزازيز مياه مقطره من بتاع البطاريات (القزازه بجينه ونص) وكانزايه مياه خضراء ابرو ب10 جنيه وتحطهم في الردياتير
7-تروح لكهربائي تخليه يشغلك المراوح علي السرعه التانيه دايركت بدل السرعه الاولي
8- تجيب غطاء قربه جديد يفضل من التوكيل


اسف بقي لو كنت طولت عليكم بس انا حبيت اجيبلكم التفاصيل وارجو ان الموضوع يعود بالنفع علي كل ملاك الاوبل وياريت تفتكرونا بدعواتكم

ولو أي حد عنده اي استفسارات او حاجه مش فاهمها ممكن يتفضل يتصل بيا (01204451851)او يسألني في الموضوع هنا وانا تحت امركم في اي وقت