مين طفى النور فى طريق محطة مصر أبو قير الدولى ؟
من فتره كدة حوالى أسبوعين مثلا كنت فى كارفور فى حدود الساعة 10 بالليل و قولت يا بت ما تطلعى على طريق أسمة الدولى على ماأظن لحد أبو قير بدل من طريق البحر أهو أسرع و فى نفس الوقت العربيات فيه أقل
طلعت الأول على محطة مصر و لقيت الدنيا ضلمة لدرجة أننا فكرت أن النور قاطع قولت مفيش مشاكل رغم أن محطة مصر دى فيها ناس بتمشى حوالى 100 ألف إنسان على الأرض
بعد كدة طلعت على الطريق الدولى و فجأة أصبحت الدنيا على أضاءة القمر
طبعا كل شوية العربيات فى الطريق المعاكس مشغلين زينون و أضاءات قوية جدا
و بالتالى أنا بيحصلى زى عمى مؤقت لثوانى معدودة بسبب النور إلى ضارب فى عينى
الصدمه مكانتش فى كدة الصدمه أن كان فيه كذا مطب فى الطريق و كنت باخد المطبات دى على سرعات عاليه جدا لدرجة أننا كنت رابطة حزام الأمان و برضة بنط لفوق كأنى راكبة مراجيح مولد النبى و للأسف مكانش ينفع أفرمل لأن كان ورايا عربيات تانية و بالأخص التريلات و المقطورات و لما كنت ببص فى المرايات كنت بتعمى أكتر بسبب الكشافات إلى هما مشغلينها فى العربيات إلى ورا يعنى الحادثة هناك مش كسر أيد ولا رجل ولا فتحة دماغ دى الحادثة هناك طلعان روح
طيب دلوقتى أنا عايزة أعرف
طريق مهم زى دة فيه عربيات مسافرة و عربيات شحن كبيرة و عربيات ملاكى
أزاى الأهمال وصل لدرجة أن يكون فيه كمية المطبات العشوائية بكل ما تحملة الكلمة من معنى
يعنى أنا أعرف أن المطب الطبيعى بيكون فيه أشارة كدة دى بتتعمل بخامه معينه بتنور بالليل
و بيتقال فيها قلل السرعة أو أحذر مطب أو أعمل أى حاجة تنقذ بيها حياتك
لكن دة ولا أشارات بتدل أن فيه مطبات ولا المطب حتى معمول بأحتراف دا مطب عامل زى مثلث جبنه لافاش كيرى
و الحمد لله وصلت سليمة وان بيس و مكانش فيه أى خسائر
بس السؤال هنا
كام واحد هيمشى من الطريق دة و هيرجع بيته سليم ؟
و ليه الحكومة متبصش شوية لأرواح المواطنين ؟
و الكهربا بتروح فين ؟
و يا ترى الكهربا المستغلة فى الديسكوهات أكبر ولا طرق السفر ؟
