بتوع الاتوبيس

**sanhory** · 18-10-2012 12:40 PM

مره ناس كانوا راكبين اتوبيس
مش عارفين مين يسوق الاتوبيس في كذا واحد قال انا اسوق الاتوبيس و عملوا قرعة و اتبقى اتنين
واحد شوية عايزينه و واحد تاني شوية تانين عايزينه و في شوية كدا قالو بصوا بقى احنا لا عايزين دا ولا دا ومش فارق معانا

المهم الاغلبية اختارت واحد يسوق ام الاتوبيس
قعد عالكرسي و لسه بيظبت في المرايات لقى كله بيزعق احنا حنمشي امتى و اللي بيشتم و اللي بيزق
جه 3 4 فلاحيس و قعدوا جمب السواق و مبحلقين فيه كل ما يجي يظبت الكرسي ولا يعمل حاجة يفضحوه في الاتوبيس الحقوا دا بيظبت الكرسي دا شكله مش عارف يعمل حاجة

المهم الراجل لقى الاتوبيس هلكان و التانك مفيهوش غير ربعه و الاتوبيس مش راضي يدور اصلا
فقالهم يا جماعة زقه معلش عشان نمشي كلنا ليه و ليه يقول كدا , ال 3 4 اللي حواليه الحقوا دا بيقولك زقه دا سواق اتوبيس فاخر دا , دا اخره سواق توك توك و شوية قالوا و مالوا ننزل نزق بس نمشي و نخلص و حبه تانين قالوا نزق ليه احنا دافين فلوس في الاتوبيس دا هما يتصرفوا و شغلنا التكيف عشان حرانين

المهم اللي عاجبهم السواق مسكوا في اللي مش عاجبهم السواق و الاتوبيس عماله تتخلع كراسيه و تتكسر و الازاز يتكسر و هو واقف في مكانه تعدي الساعات و تهدا الاجواء

و يجي الراجل عايز يمشي يلاقى اللي قاعد مبحلقله جمب منه لو هش دبانه بس يلاقى الحااااقووه دا بيهش دبانة بايده ازاي يسيب الدركسيون و يهش الدبانه و يقوموا الناس و يمسكوا في بعض تاني و لو حد قرب من الناس اللي قاعدين جمبه و ماسكينله عالساقطة و اللاقطة يقولك تقيد حريات و حق المعارضة

طب السؤال هنا دلوقتي
لو سواق الاتوبيس دا غار في داهية و جيه سواق تاني
مش برضه حيبقى في ناس مش عاجبها السواق دا ؟ و حيعملوا نفس اللي اتعمل فيهم عشان يفشلوا السواق الجديد و حتفضل في مشاحنات و الخسران في الاخر الاتوبيس اللي معادش فيه كرسي سليم

انا واحد من الناس كنت عايز ابو الفتوح ولما انحصرت في مرسي و شفيق اتخنقت بس اخترت مرسي في الاخر و لو كان جيه شفيق قشطة برضه بس يعني كل واحد و ليه سياسته مش لازم الشعب هو اللي يعمل فيها سياسي و عايز يمشي الرئيس على مزاجه و بعد ما يتنيل يخلص مدته نقول كان وحش ولا كويس لكن بالاسلوب اللي احنا فيه دا حاجة تقرف و زفت والله ولا حنتحرك متر لقدام

**NineVision** · 18-10-2012 02:34 PM

الفكرة ان مافيش تقدم ملحوظ فى المشاكل الاساسية

**w-m-a** · 18-10-2012 02:53 PM

المشكله ان الاغبياء اللى قاعدين له
مش شايفيين ان الاتوبيس وشه فى الحيط وحتاج يتعدل
وبدل ما يصلحوا ويساعدوه ويزقوا
بيلسنوا وبس

**mfarag** · 18-10-2012 03:00 PM

مش مهم

المهم ان عبده مشتاق و اعوانه هما اللى يسوقوا

حتى لو كان التمن ان الاتوبيس يكسر و كل واحد ياخد كرسيه و يروح فى طريق لوحده

**horas3000** · 18-10-2012 03:01 PM

المشاركة الأصلية كتبت بواسطة w-m-a

المشكله ان الاغبياء اللى قاعدين له
مش شايفيين ان الاتوبيس وشه فى الحيط وحتاج يتعدل
وبدل ما يصلحوا ويساعدوه ويزقوا
بيلسنوا وبس

لا يا باشا
المشكله ان في ناس شايفينه وشه للحيطه
و ناس شايفينه في ال high way

و للاسف الناس اللي شايفه الوضع الصحيح مرميه في اخر الاتوبيس
و محدش مديهم فرصه يسوقوا

**dodo2000** · 18-10-2012 04:05 PM

لكى الله يا مصر

**sherif Anton** · 18-10-2012 06:17 PM

انا اقول لك الناس ليه مركزه قوي مع سواق الاتوبيس:

1-لان سواق الاتوبيس "وعائلته" في اول المشوار قالوا ان كرسي السواق مايلزمهومش... وفجأه 2 من عائلة السواق رشحوا نفسهم للكرسي.

2-السواق كان شايف حالة الاتوبيس وعارف انه مليان مشاكل لكن فرد عضلاته وقال بلسانه انه في خلال 100 يوم هيخلي الاتوبيس طيارة تطير بكل ركاب الاتوبيس... والركاب احلامهم اصبح ليس لها حدود وكل واحد حلم انه هيطير من غير مايدفع مليم زياده في تذكرة الاتوبيس "حسب وعود السواق قبل مايقعد على الكرسي" ... لكن كانت صدمة ان السواق عايز يزود سعر التذكرة علشان الاتوبيس يتحرك.

3-الركاب اصابتهم خيبة الامل بعد ماشافوا سواق الاتوبيس مهتم بتظبيط "عائلته" في الكراسي الامامية من الاتوبيس وسايب الركاب يطحنوا في بعض ورا.

عرفت ليه الناس مركزه قوي مع السواق ...

**NineVision** · 18-10-2012 08:22 PM

المشاركة الأصلية كتبت بواسطة sherif Anton

انا اقول لك الناس ليه مركزه قوي مع سواق الاتوبيس:

1-لان سواق الاتوبيس "وعائلته" في اول المشوار قالوا ان كرسي السواق مايلزمهومش... وفجأه 2 من عائلة السواق رشحوا نفسهم للكرسي.

من حق اى مواطن الترشح للرئاسة الكرسى (الاتوبيس)

2-السواق كان شايف حالة الاتوبيس وعارف انه مليان مشاكل لكن فرد عضلاته وقال بلسانه انه في خلال 100 يوم هيخلي الاتوبيس طيارة تطير بكل ركاب الاتوبيس... والركاب احلامهم اصبح ليس لها حدود وكل واحد حلم انه هيطير من غير مايدفع مليم زياده في تذكرة الاتوبيس "حسب وعود السواق قبل مايقعد على الكرسي" ... لكن كانت صدمة ان السواق عايز يزود سعر التذكرة علشان الاتوبيس يتحرك.

قلنا هنبنى وادينا بنينا السد العالى الموضوع محتاج وقت اطول طالما فيه خوازيق
حكاية ال 100 يوم عدت خلاص ومش هنمسكها كل شويا

3-الركاب اصابتهم خيبة الامل بعد ماشافوا سواق الاتوبيس مهتم بتظبيط "عائلته" في الكراسي الامامية من الاتوبيس وسايب الركاب يطحنوا في بعض ورا.

ممكن دليل على الكلام ده

عرفت ليه الناس مركزه قوي مع السواق ...

**chicobon** · 19-10-2012 12:11 AM

انا نفسي اعرف هنوصل لفين مع السواق ده شويه شويه هيقول لينا الي يفتح الشباك يتنفس هواء هيدفع فلوس

الموضوع: بتوع الاتوبيس

LinkBack

أدوات الموضوع

عرض

-

-

-

المواضيع المتشابهه

الايفو و الاتوبيس بعد التعديل

الايفو و الاتوبيس

انا سمعت ان الموساعدين بتوع الانسر 2006 هما هما بتوع الجين 2

عايزين مقابلة من بتوع المقطم بتوع زمان

الكلمات الدلالية لهذا الموضوع

المفضلات

المفضلات

ضوابط المشاركة