عرض للطباعة
ماهى خطورة التوكيل عند شراء المستعمل ؟
إن شاء الله ناوى أشترى عربية مستعملة 127 فيورا وفيها 3 توكيلات
ياترى هل فى خطورة فى الموضوع ده ( التوكيلات الكتيرة ) ولا لأ ؟
وأيه الحاجات اللى أخلى بالى منها وأركز عليها وأنا ببص على العربية 127
سواء من الناحية الفنية أو من ناحية أوراقها
ماينفعش العربية يكون عليها 3 توكيلات ... أقصى حاجة توكيلين و فى حالة البيع مرة أخرى لازم نقل ملكية ... خطورة التوكيل بتبقى فى الغالب على البائع مش المشترى ... المشترى بيبقى محمى لأن البائع مش من حقه يلغى التوكيل (و دة اللى سمعته بودانى من موظف الشهر العقارى) ... أما البائع فلو مأخدش تعهد من المشترى انه استلم العربية و صار مسئولاً عنها ابتداءً من يوم كذا الساعة كذا و بعدين المشترى عمل جريمة بالسيارة ممكن البائع يلبسها.
كثرة التوكيلات فى العربية تدل على دخول تجار فيها واكيد هتلاقى سعرها مبالغ فية.......والله اعلم...
لو اشتريت من واحد معاه توكيل يبقى مش هتعرف ترخص ولازم تسجل الأول
انا كنت شاري عربيه فيها 3 توكيلات متقلقش بس انا سجلت على طول
علي ما اعتقد العربيه ليها خمس توكيلات بس زي ما قال الدكتور احمد علشان ترخص العربيه لازم تسجل حتي لو توكيل واحد بس بس بتاخد الرخصه و التوكيلات طبعا و تروح الشهر العقاري تبيع العربيه لنفسك و تاخد الورق و تطلع علي المرور التابع له و تفحص العربيه و تسلم اللوحات حتي لو من نفس المرور و تستلم لوحات جديده
الخطوره ان ممكن لا قدر الله الموكل لو توفى بيتلغى التوكيل بوفاته وده لان التصرف من الوكيل بيبقى منسوب للموكل ولو الاخير توفى مش حتعرف تتصرف فى العربيه باى وضع وممكن تدخل فى نزاع مع الورثه وحتبقى العربيه معاك لكن مش حتعرف تعمل فيها حاجه ولا تسجلها ولا تبيعها لانك لو اسستخدمت التوكيل بعد وفاه الموكل حتبقى مرتكب لجريمه تزوير فى محرر رسمى
ده غير خطوره كون التوكيل نفسه مزور وده بيحصل مع العربيات المسروقه بينضرب لها توكيل وتتباع بيه
حاجه تانيه نسيت اقولها وهى برضه متعلقه بتزوير التوكيل وهى ان التوكيلات المزوره بتستخدم فى بيع وضرب شلسيهات العربيات المهربه من الجمارك عن طريق ليبيا والتربتك مما لا يتسع المقام لذكره هنا فيبقى أحسن حاجه انك تشترى من المالك نفسه ويعمل لك توكيل قدامك فى الشهر العقارى ويستحسن انك تسجل على طول
خالص الشكر على ردودكم جميعاً ،
وعلى الروح الجميلة بين الأعضاء ، وصدقونى أنا أستفدت جداً جداً
والله أنا حاسس أنى بتكلم وباخد رأى أخواتى بالظبط
ربنا يبارك فيكم ، ويزيدكم من نعيمه ويحافظ عليكم ًجميعاً