حرامي كسر شراعة العربية بس معرفش يسرق العربية

**romar** · 19-10-2012 11:21 AM

السلام عليكم...

إمبارح كنت في النادي الأهلي (مدينة نصر) وخرجت لقيت الشراعة الخلفية للعربية مكسورة وفيه حرامي $$$$ و @@@ و ##### دخل العربية ودعبس فيها.. بس الحمد لله ربنا عماه عن نضارة شمس كنت حاططها في درج الـ Console.. ولله الحمد مخدش أي حاجة من العربية.... واضح إن الإنذار لما اشتغل خلاه يبقى مرتبك شوية.. طبعا ما ننساش نمسي على السيد الرئيس محمد مرسي ونشكره على تحقق الأمن بنسبة 70%... وأحب أقوله إن أنا زي ما طلعت في ال 40% اللي المرور متصلحش عندهم طلعت برضه في ال30% اللي لسة عندهم انفلات أمني... وبفكره برضه بكلمة سيدنا عمر بن الخطاب: لو عثرت بغلة في العراق لخشيت أن يسألني الله عنها يوم القيامة لم لم تمهد لها الطريق... طبعا سيدنا عمر بيتكلم عن سفلتة الشوارع... لكن إحنا طبعا بنتكلم في حقوق أبسط من كدة بكتير... يا ترى يا ريس حتقول إيه لله يوم القيامة عندما يسألك عن حرقة أعصابي وضياع وقتي ومالي وانت سايب الداخلية زي ما هي مش شايفة شغلها؟ طهر الداخلية يا ريس لو سمحت.

المهم يا جدعان عشان مطولش عليكوا أنا كلمت العالمية وسألت على الشراعة الخلفية يمين (مازدا 3 2011) بس ملقيتهاش عنده... حد عنده فكرة ممكن ألاقيها فين؟ الوكيل قال لي حيرد علي بس لسة مردش.

**Ahmed Nasr** · 19-10-2012 11:36 AM

نقول الحمد لله

وربنا يعينك

**romar** · 19-10-2012 12:10 PM

المشاركة الأصلية كتبت بواسطة ah51180

نقول الحمد لله

صدقت

**tutankhamoun** · 19-10-2012 12:17 PM

على فكرة هو صحيح الأمن مرجعش 100 % و لا عمره هايكون 100 % أبدا لأنه أيام مبارك مكنش 100 %
و حوادث سرقة العربيات موجودة من أيام مبارك و عيني عينك برضه في عز الظهر أمام مستشفى دار الفؤاد و جامعة مصر ناس كانت بتتسرق (دي مجرد مثال صغير )

الحمد لله أنه حرامي محتويات مش حرامي عربيات ...... يعني كاسرها علشان يدور على حاجة جوة للسرقة مش قاصد العربية كلها .

طبعا أنا معاك أن الداخلية لازم تقوى شوية .
و لازم القوانين تكون أقوى من كدا كمان .....
أنا بس صعبان عليا مرسي اللي الناس محملاه كل حاجة بتحصل في البلد .
مع أني ما أنتخبتوش ... بس الحق يتقال ..... الراجل شايل شيلة كبيرة قوي .

**tutankhamoun** · 19-10-2012 12:44 PM

يارب تلاقي الشراعة بتاعتك كمان ... و يارب ما يحصلكش كدا تاني و لا لاي حد تاني
تحياتي

**Kareem Fawzy** · 19-10-2012 12:48 PM

ربنا يعوض عليك
انا منتخبتش مرسى بس شايف ان انك لما تاخد عربية مقلوبة 30 مرة ووشها فى افاها
وطالب منك انك تصلحها فى 100 يوم تغيرلها سقف ونصين وتسقط موتور وعفشة كاملة ابقى بفترى عليك

ملحوظة اخيرة انا مش اخوان
بخصوص الزجاج روح مصنع دكتور جريش فى العاشر هتلاقيها عنده ولو ما لاقتهاش هيعملهالك
بالتوفيق وربنا يعوض عليك

**yalahwy2010** · 19-10-2012 03:03 PM

المشاركة الأصلية كتبت بواسطة tutankhamoun

على فكرة هو صحيح الأمن مرجعش 100 % و لا عمره هايكون 100 % أبدا لأنه أيام مبارك مكنش 100 %
و حوادث سرقة العربيات موجودة من أيام مبارك و عيني عينك برضه في عز الظهر أمام مستشفى دار الفؤاد و جامعة مصر ناس كانت بتتسرق (دي مجرد مثال صغير )

الحمد لله أنه حرامي محتويات مش حرامي عربيات ...... يعني كاسرها علشان يدور على حاجة جوة للسرقة مش قاصد العربية كلها .

طبعا أنا معاك أن الداخلية لازم تقوى شوية .
و لازم القوانين تكون أقوى من كدا كمان .....
أنا بس صعبان عليا مرسي اللي الناس محملاه كل حاجة بتحصل في البلد .
مع أني ما أنتخبتوش ... بس الحق يتقال ..... الراجل شايل شيلة كبيرة قوي .

الله ينور
وهو دا الكلام المظبوط
هو ياخد فرصته.....وبعد 4 سنوات.....وبناءا على مستوى تحسن البلد....الشعب يقيمه.....هل عمل اصلاحات ولا لأ......
وحتى لو عمل إصلاحات....والبلد اتحسنت....واترشح حد قصاده أحسن منه....ايه المانع ان الناس تنتخبه......
أنا بصراحة معرفش البلد دى كان ممكن يحصلها ايه لو ما كانتش قامت فيها ثورة
الواحد ما كانش يعرف وزير الخارجيه اسمه ايه....من اليأس والملل اللى كانوا زارعينه جوه الناس
لكن دلوقتى والحمد لله.....الناس بتحاسب رئيس جمهوريتها على مراسلاته اللى بيبعتها للدول التانية......وكمان الرئاسة بترد وبتدافع عن نفسها لما تلاقى الناس زعلانة
انا متفائل جدا جدا جدا....لأن خلاص....فعلا البلد ما ينفعش تبقى أسوأ من قبل الثورة
وبقول لصاحب الموضوع....معلش طبعا ربنا يعوض عليك فى الهواية اللى اتكسرت......لكن وعسى أن تكرهوا شيئا وهو خير لكم.....ممكن كان الحرامى ده بيحاول يسرق العربية ولقى دورية شرطة معدية.....فا ما لحقش وجرى بسرعة.....ومالحقش ياخد النضارة......الله أعلم
بس قول الحمد لله على كل شىء
وربنا يبعد عننا الحرامية والبلطجية

**romar** · 19-10-2012 03:09 PM

شكرا على الردود يا أصدقائي... أول مرة أعرف إن جريش ممكن يفصل إزاز عمولة.. دي معلومة مفيدة جدا

بخصوص مرسي.. أنا أصلا انتخبت مرسي ومش نادم لغاية دلوقتي إني انتخبته... ومعظم الوقت بدافع عنه... وعارف إن حمله تقيل جدا... ومش قصدي برضه أحمله ما لا يطيق...و ماقولتش إن مبارك أحسن منه أو إن مصر كانت أحسن أيام مبارك... إطلاقا... أنا بس مستغرب من شجاعة مرسي ومقدرته على إعادة الأمور لنصابها الصحيح فيما يخص المؤسسة العسكرية، وعدم مقدرته على (أو تقاعسه عن) (أو عدم اهتمامه بـ ) إجراء إصلاحات على نفس القدر من الثورية والجدية فيما يخص الداخلية... الأمر بالنسبة لي مريب وغير مطمئن... الجيش من جوة ممكن تكون مشاكله زي ما هي لغاية دلوقتي بس هو عمل اللي يقدر عليه في المرحلة الحالية... لو عمل اللي عليه برضه فيما يخص الداخلية... مش حتوقع إن الأمن حيرجع تاني يوم ولا حاجة... بس ساعتها لو عربيتي كلها اتسرقت لا قدر الله مش حقدر ألوم مرسي، لأنه حيبقى ساعتها أخد خطوة البداية السليمة اللي ممكن يتبعها إصلاح داخلي لمدة قد تصل إلى سنين لغاية ما نشوف داخلية زي اللي بنشوفها برة مصر

**romar** · 20-10-2012 10:04 AM

الشراعة موجودة عند غبور بـ 870 جنيه بعد الضريبة ومن غير مصنعية.. مش قادر أترجم اللي أنا حاسس بيه لحاجة ممكن تتكتب

الموضوع: حرامي كسر شراعة العربية بس معرفش يسرق العربية

LinkBack

أدوات الموضوع

عرض

-

-

-

-

المواضيع المتشابهه

هستخدام دينمو العربية فى توليد كهرباء من الرياح ؟ وفى كام سؤال عن دينامو العربية؟؟

إنا لله، حرامي قلب العربية وكسرلي زجاج السائق

حرامي حاول يسرق الام 11 بتاعتي

لما بدور العربية وهيه بردة بلاقى العربية بترج فترة

تغيير موتور العربية لأن به عيب والتوكيل معرفش فيه ايه

الكلمات الدلالية لهذا الموضوع

المفضلات

المفضلات

ضوابط المشاركة