new Accent 2008

**CarLover** · 07-07-2008 07:00 PM

السلام عليكم
ياجماعة أنا محتاج مساعدتكو
ناوي إن شاء الله اشتري سيارة جديدة وبفكر في النيو أكسنت بس مش لاقي تقييم حيادي ليها أرجو حد يفيدني بخبرته

**limo** · 07-07-2008 09:51 PM

انا واحد صحبى لسه شارى العربيه ده من اسبوع وانا وسوقتها منه
انا هحاول اقولك رأى فيها بحياد تام
اولا الصالون
الصالون كمساحه معقول لاسره متوسطه
يعنى الصالون مش واسع تقريبا اد صالون الفرنا
الطابلوه شكله جميل جدا متناسق مع بعضه منطقه العدادات شكلها تحفه بالذات وهيه منوره باليل
العربيه مفيهاش عداد للحراره بس ليه لمبتين للحراره واحده لونها زرقاء وده لو العربيه لسه برده وواحده حمراء لو العربيه شخنت عن الحد المسموح بيه
عندك الكاسيت cd اصلى صوته نقى جدا وحلو اوى
خامات التأفيل الداخلى معقوله احسن من الفرنا بكتير
فرش الكراسى حسيت انه عادى زى الفرنا كده
العربيه فيها مسند يد للسواق فقط والكنبه الخلفيه من غير مسند
لمبتين للقراءه واحده للسائق والتانيه للراكب الامامى كل واحده شغاله بزرار منفصل وممكن بزرار تانى تشغل الاثنين مع بعض بشرط ان باب العربيه يكون مفتوح كل ده بالا ضافه الى لمبه اضائه فى منتصف السقف
-فيها مدخلين لولاعه سجاير واحده فيها الولاعه والتانيه لو عايز تحط فيها شاحن الموبيل
-فيها كل الكماليات معادا المرايات الكهرباء بالنسبه للعربيه المانوال
تانيا التسارع والسحب
العربيه كانت 1600 مانوال
السحب جميل جدا متورها سلس جدا فى التسارع والطلعه بتاعها قويه
عندك المتور صوته ناعم جدا مختلف عن الفرنا اهدى كتير جدا منها
ثالثا غرفه المحرك وصندوق الامتعه
صدر العربيه فبر بالكامل
المحرك مغطى بفبره كبيره مش مبينه اى حاجه من المتور ولا اسلاك ولا اى حاجه
صندوق الامتعه واسع جدا يمكن هوه ده الى مصغر حجم الكنبه الخلفيه
كمان الشنطه من جوه تقفيلها ممتاز
رابعا مواصفات الامان
للاسف العربيه مفيهاش ولا فرامل abs ولا اير باج واحده
لما شوفت اخبار الامان بتاعها لقيت المقدمه من الوع الى بيمتص الصدمه وميدخلش على الكابينه
الفرامل قويه جدا
خامسا العفشه والباور
العفشه بتاعتها مش ناعمه اوى ومش خشنه اوى يعنى معقوله مش مزعجه
يعنى تقدر تقول انها انعم من الانسر بحاجه بسيطه جدا

الباور بتاعها كهرباء تحس انه ناعم جدا لو العربيه واقفه ولو العربيه ماشيه تحس انه زيه زى الباور العادى
بس الصراحه العربيه الى انا جربتها كان فيها حاجه غريبه وهى انى لما الف الدكسيون ناحيه الشمال العربيه من ادام بتنزل لتحت شويه مش عارف ده عادى ولا فيه مشكله

دهان العربيه خفيه شويه والعربيه من بره شكلها صغير بس ظريقه
بصراحه انا شايف انها عربيه ممتازه جدا لو بتقارنها بالانوس والافيو والنوبيرا والفرنا والوجان

بس اعتقد انك لو تقدر على الصنى هتكون احسن منها

**semihuman** · 08-07-2008 12:50 AM

طيب يا ليمو تعتقد انها تستاهل 6000جنيه الفرق بينها و بين اللوجان لو كنت سوقت اللوجان و ياريت تقولنا ليه؟
وايه اخبار سواقه اللوجان

**CarLover** · 08-07-2008 01:14 AM

شكرا جدا ليمو على الاجابة الوافية ديه

**semihuman** · 08-07-2008 11:07 AM

علي فكره يا ليمو في حاجه واحده بس ناقصه
مقلتش ايه اخبار استهلاكها للبنزين داخل المدينه وبالتكيف ومن غيره
ياريت تفدينا
متشكرين جدا

**tamohsen** · 08-07-2008 11:15 AM

لو بتدور في الرينج ده اعتقد ان الريو هاتكون افضل منها
علي الاقل التوكيل هايكون احسن

**semihuman** · 08-07-2008 11:19 AM

لا طبعا
لان الريو اغلي و قطع غياراها اغلي
واصلا الاكسنت مش رخيصه

**limo** · 08-07-2008 11:38 AM

المشاركة الأصلية كتبت بواسطة semihuman

علي فكره يا ليمو في حاجه واحده بس ناقصه
مقلتش ايه اخبار استهلاكها للبنزين داخل المدينه وبالتكيف ومن غيره
ياريت تفدينا
متشكرين جدا

والله انا مش عارف لان العربيه الى انا سوقتها كانت عامله 230 كم فقط يعنى لسه بتلين
بس اعتقد ان استهلاكها هيكون كويس جدا لان متورها من نوع cvvt والنوع ده بيوفر فى استهلاك البنزين

كمان العربيه الدبرياج بتاعها ناعم جدا

**limo** · 08-07-2008 11:49 AM

المشاركة الأصلية كتبت بواسطة semihuman

طيب يا ليمو تعتقد انها تستاهل 6000جنيه الفرق بينها و بين اللوجان لو كنت سوقت اللوجان و ياريت تقولنا ليه؟
وايه اخبار سواقه اللوجان

اه الفرق6 الاف جنيه يستاهل
عندك النيو اكسنت تصميم حديث سواء فى الشكل الخارجى او الداخلى او المتور
والنيو اكسنت بياعه اكثر
اللوجان تنفع واحد اولا مش معترض على شكلها الخارجى -مشاويره كلها هلاك للعربيه +العربيه هتعمر معاه كتير
فى الحاله ده ممكن تكون اللوجان افضله عن النيو اكسنت
لاكن واحد استخدامه للعربيه عادى ليه ميجبش النيو اكسنت ويركب عربيه احدث فى كل حاجه

**Hassan Khalil** · 08-07-2008 12:21 PM

المشاركة الأصلية كتبت بواسطة limo

-فيها كل الكماليات معادا المرايات الكهرباء بالنسبه للعربيه المانوال

الاوتوماتيك برضه المرايات بتاعتها مش كهرباء ..
العربية في السحب ممتازة .. ووزنها خفيف .. و بصراحة المانيوال بتاعها للناس اللي بتجري يخوف جدا ..الاتوماتيك ممكن يكون افضل

* الموتور بتاعها هو هو الموجود علي السيراتو .. تخيل فرق الحجم و الوزن ..
* النيو اكسنت هيا هيا الكيا ريو بكل تفاصيلها و قطع غيارها حتي التابلوه هوا هوا ..بيفرق بس في حامل الكروت الموجود في الريو.. و لغاية 2007 كانت الريو بتنزل بنفس المحرك .. لغاية ما نصير نزل السيراتو فتم تغيير موتور الريو الي الاقل ( 1400 cc )