لوجان مانوال كاملة ولا ساجا اوتوماتيك والميزانيه 72000

السلام عليكم

دي اول مشاركة ليا هنا و فيها باسرد ملخص اول مشوار اعمله في رحلة شراء اول عربية في حياتي و انا لا افقه شئ عن القيادة سوى ما تعلمته في مدرسة السواقة و الكام المرة اللي سقت فيهم عربية والدي البولونيز (( شايفك ياللي بتضحك )) ..

انا اولا ميزانيتي اوائل السبعينات و كنت مستقر عاللوجان و مقتنع بيها جدا و متوكل على الله و قلت انزل اشوفها عالطبيعة فتوكلت على الله و نزلت على المصرية فرع جرين بلازا (( أيون انا اسكندراني )) و سألته عاللوجان مانوال كاملة ، قاللي مش متوفرة دلوقتي ، طب امتي يا عم ؟ قاللي ممكن بعد العيد ، طب سعرها كام ؟ قاللي في حدود 73 او 73 و نص ، المهم خدت منه الكلام المخيب للامال ده و رحت عالطارق اللي في مصطفى كامل و لقيته قافل :019f3b~14:

فاتمشيت شوية لحد ما لقيت معرض اسمه (( نيو عربية )) في كليوباترا شارع ابو قير ، سالته هناك عن اللوجان الكاملة المانوال ، فاتصل بصاحب المعرض اللواء بحري فلان الفلاني و سأله و كانت الاجوبة كالتالي ، اه موجودة ، بكام ؟ ب 72 طب الالوان ؟ كل الالوان موجودة ، طب الاستلام ؟ بعد يوم ! !
حسيت اني واقف في مصنع رينو الام في فرنسا و بانقي العربية اللي على مزاجي
رغم ان العرض مشجع بس ما ارتحتش برضه . . .

مشيت شوية و عديت على اباظة في سبورتنج ، سالته عاللوجان قاللي مش موجودة خالص و لو موجودة عليها اوفر برايس على السعر الرسمي 4 الاف جنيه (( أهلا بيك يا حبيبي ))

المهم لقيت عنده بروتون ساجا اوتوماتيك ، سالته عليها قاللي ب 75 بسعر الوكيل من غير اوفر ، فتحهالي و عاينتها و قعدت فيها ، و يا ريتني ما قعدت :019f3b~14:

رجعت احتار تاني بين اللوجان المانوال و الساجا الاوتوماتيك ، و مالقتش غير منتداكم لاتوجه اليه بعد الله للاسترشاد و طلب النصح ..

يا ريت محدش يقوللي لوجان اوتو عشان ميزانيتي للاسف لا تسمح و شكرا مقدما

أخوكم المحتار : د. أحمد رضوان ، طبيب امتياز طالع عينه في جامعة اسكندرية

اهلا بحضرتك في منتدانا يا دكتور
ومنور الاسكندرانيه كلهم كمان
الموضوع اتنقل لقسم المقارنات علشان تاخد راي من كل اعضاء المنتدي بحياديه
لان اكيد حضرتك لما حتعمل مقارنه في قسم رينو بين رينو واي ماركه تانيه حيكون التصويت لصالح رينو

الساجا 1300 سي سي واللي ركبوها مبسوطين منها بس سوقها واقع جدا والريسيل بتاعها وحش ... لو بيفرق معاك الاوتوماتيك والمانيوال ومش فارق موضوع السحب والريسيل هات ساجا .. وعموما الساجا دايما كانت بتدخل مقارنة لناس كتير من اللي جابت لوجان ... انا لو مكانك هجيب لوجان

شكرا عالاهتمام ، بس انا كنت عايز راي اللوجانوية في السعر اللي قالهولي معرض نيو عربية ؟
ده اقل من التوكيل في حين ان كل المعارض بتحط اوفر برايس من 1000 ل 4000 و يمكن اكتر

بص يا دكتور انا احترت نفس الحيرة ديه, فيه على اليو تيوب مقارنات مابينهم , المقارنات وضحت ان الساجا عربية خرافة بالنسبة لللوجان وحتى الأوتوماتيك بيسحب احسن من اللوجان المانيوال والفيديو كمان بيوضح عيوب سيئة في اللوجان مش موجودة في الساجا بس الساجا مش هتلاقيلها قطع غيار الا في التوكيل طبعا وهيقولك استنى لما تتوفر وتيجي تبيع طبعا عينك هتدمع على الفلوس اللي بتروح منك بسبب الريسيل وكمان ممكن تستنى معاك كتير قوي عبال ماترضى تتباع . رأيي خليك في اللوجان احسن طالما انك مصري لازم تتبع اعراف البلد والا هتخسر والله الموفق

سيدى الفاضل ..... انا كنت فى نفس الحيرة اللى حضرتك فيها دى من شهر بالظبط وعملت مقارانات كتيرة بين العربيتين واستقريت فى الأخر على اللوجان ومش ندمان خالص بصراحة ......... الفرق زى ما قال السادة الأعضاء بالظبط الساجا عربية رياضية ومحترمة وسحبها عالى وثباتها ممتاز وماسكة نفسها بس فيها عيب قاتل وهو قطع غيارها الغير موجودة اصلاً ولو وجدت هتسمع اسعار فلكية وتوكيل سيىء جداً فى كل حاجة + سعر إعادة البيع فى الحضيض ....... اللوجان عربية عائلية تماماً ثابتة ما شاء الله رغم إرتفاعها سحبها كويس وإرتفاعها عن الأرض ممتاز مهما حملت عليها وطلعت مطب عالى متحكش فى الأرض ابداَ بالإضافة لإنها مصفحة من الأسفل ...... كمان اللوجان إنتشرت جداً واصبح منها عربيات شرطة كمان وده هيؤدى حتماً لإنخفاض اسعار قطع غيارها خلال السنين القادمة وبالتالى إرتفاع سعر إعادة البيع ... انصحك باللوجان وانصحك أولاً وأخيراً بالإستخارة .

الساجأ عربيه حلوه بس اﻷوجأن من وجه نظرى احلى و ركوبه بمعنى الكلمه

نصيحة من اسكندراني لاسكندراني

ابعد عن بروتون .توكيل عزب العرب في اسكندريه في مشاكل و لو عندك مشكلة كبيرة في العربية لازم تروح توكيل القاهرة

بروتون عربيات محترمة بس مشكلتها في توكيلها

الف شكر يا رجالة عالردود الرائعة دي و الاهتمام
مبدأيا ابتديت ارجع استقر تاني على اللوجان بعد نوبة هوس بالساجا حصلتلي امبارح و راحت لحالها
دلوقتي بقا الاقي اللوجان فين في اسكندرية و بكام ؟؟
و هل كلام الراجل بتاع نيو عربية ده موثوق منه ولا اي كلام و عايز يربط معايا و خلاص ، خاصة زي ما قلت اني لقيتها في اباظة باوفر برايس 4000 جنيه

انا ضد
مبدا الاوفر برايس و استغلال التجار روح التوكيل و احجز بالسعر الرسمي

برضه خلي بالك لوجان ٢ نزلت بره و ظهرت في معرض باريس و صورها ماليه النت

أنا سقت الأثنين .
فيه شوية نقاط لصالح اللوجان ........ و شوية لصالح الساجا .
اللوجان أنتشار أكتر يعني توافر قطع غيار و سعر أعادة بيع أفضل وأسرع .
الساجا أوتوماتيك ......... شكلا أفضل (بالنسبة لي )
يعيبها
أنتشار أقل (بس الجين 2 مكنتش منتشرة ساعة ما أشتريتها في 2007 و سمعت نفس الكلام بتاع قطع الغيار و اعادة البيع و الوضع أتغير تماما دلوقتي )

في الوقت الراهن لو بتفكر تبيع خلال فترة قصيرة يعني من سنة إلى سنتين .... ممكن تخسر في اعادة البيع أكتر من اللوجان

و بما أن الأستاذ تامر عثمان أشار لموضوع التوكيل في أسكندرية
يبقى أنت محتاج تسأل واحد معاه ساجا من أسكندرية و تشوف ايه الأخبار معاه ... بيجيب قطع غيار منين و الدنيا عامله معاه أيه .
أنا بصراحة الساجا عاجباني أكتر من اللوجان .

بس اللوجان حلوة و جميلة و موتورها كويس و عالية عن الأرض و الساجا زيها ..... الفرق في قطع الغيار و الانتشار و اعادة البيع ... و كمان أنت بتقارن مانوال بأوتوماتيك ... و الأوتوماتيك أفضل و أريح .

اقتباس:

---

المشاركة الأصلية كتبت بواسطة vaquero

الف شكر يا رجالة عالردود الرائعة دي و الاهتمام
مبدأيا ابتديت ارجع استقر تاني على اللوجان بعد نوبة هوس بالساجا حصلتلي امبارح و راحت لحالها
دلوقتي بقا الاقي اللوجان فين في اسكندرية و بكام ؟؟
و هل كلام الراجل بتاع نيو عربية ده موثوق منه ولا اي كلام و عايز يربط معايا و خلاص ، خاصة زي ما قلت اني لقيتها في اباظة باوفر برايس 4000 جنيه

---

طيب لو رسيت على اللوجان .
بلاش تشجع جشع التجار ............ حرام 4 الاف جنيه زيادة على ثمنها ؟؟؟؟؟؟؟؟؟؟؟؟

اقتباس:

---

المشاركة الأصلية كتبت بواسطة tutankhamoun

طيب لو رسيت على اللوجان .
بلاش تشجع جشع التجار ............ حرام 4 الاف جنيه زيادة على ثمنها ؟؟؟؟؟؟؟؟؟؟؟؟

---

لا انا استحالة اخدها بالسعر ده ، انا لسة باسأل عليها و لسة حتي ما سألتش في الطارق ، في نفس الوقت مضطر ارضى بحكم التجار عشان صعب استنى تلات اربع شهور او اكتر على ما استلم كل ده عشان التوكيل بيستهبل يا فوزية و هو اللي مسلم المستهلك للتجار المستغلين تسليم اهالي يعملو فيه اللي هما عايزينه .

برضه محدش فادني في معرض نيو عربية ده اللي قاللي على اللوجان ب 72000 كل الالوان و التسليم في اي وقت احبه ؟؟!! هو فيه كدة فعلا ولا اشتغالة ؟؟