هيونداي وكيا تتحديان أزمة السيارات الأوروبية وتتفوقان عليها

**محمد بدر** · 20-10-2012 10:30 AM

عايز أعرف انطباع الأعضاء على هذا الخبر المنقول علشان الناس تعرف بعد كده تتعامل مع السيارات الكورى وتعطيها حجمها الطبيعى الذى وصلت إليه وتستحق على ذلك كل أحترام وتقدير

هيونداي وكيا تتحديان أزمة السيارات الأوروبية وتتفوقان عليها - كلمتي

بروكسل - أ ش أ:

بلغت مبيعات مصانع السيارات الكورية هيونداي خلال التسع شهور الأولى من عام 2012 حوالي 317 ألف سيارة أي بزيادة 9.3% سيارة عن العام الماضي .

وتراجعت مبيعات السوق بنسبة 7.6%، كما ارتفعت مبيعات كيا بنسبة 20% لتصل إلى 250 ألف سيارة، هذا ما جاء في تقرير جمعية صانعي السيارات الأوروبية.

وذكر التقرير أن هيونداي وكيا يمتلكان 6.1% من سوق السيارات في أوروبا مقابل 3.4% في عام 2006 وبداية من هذا العام وحتى 2015 سوف ترتفع النسبة إلى 8% وتبلغ مبيعات شركة هونداي 850 ألف سيارة.

من ناحية أخرى، فإن المجموعة الكورية سوف تبيع حوالي 7.2 مليون سيارة في العالم مقابل 6.6 مليون سيارة في عام 2011 خاصة بعد غزوها لكل من آسيا والولايات المتحدة الامريكية والتي أصبحت تمتلك 9% من السوق.

الجدير بالذكر أن معظم السيارات الكورية التي تباع في أوروبا تم انتاجها في جمهورية التشيك وتركيا وقد باعت الشركة 2200 سيارة في فرنسا وأن 60% من مبيعاتها لفرنسا تأتي من مصنعها في سلوفاكيا كما تمتلك مراكز للبحث والتنمية في ألمانيا.

ويرجع السبب وراء هذه الزيادة إلى أن سعر سيارة هيونداي أقل من 1500 إلى 2000 يورو في كل سيارة مع وجود ضمان 5 سنوات على سيارة هيونداي و7 على سيارة كيا وهما يتقاسمان 80% من سوق السيارات.

**SAMEH_FOUAD** · 20-10-2012 10:40 AM

وهى المبيعات دلوقتى بقت مقياس لجودة وكفاءة العربية ؟؟؟؟؟؟؟؟؟؟؟!!!!!!!!!!!!!!!!!!!!

انت عندك الكورى رخيص ومش غالى عشان كدة مبيعاتهم عالية ( دة كفاية مصر لوحدها مستعمرة الكورى والصينى )

معلش ياباشا والخبر فى الاخر بيرد على نفسة

"ويرجع السبب وراء هذه الزيادة إلى أن سعر سيارة هيونداي أقل من 1500 إلى 2000 يورو في كل سيارة مع وجود ضمان 5 سنوات على سيارة هيونداي و7 على سيارة كيا وهما يتقاسمان 80% من سوق السيارات"

اعتقد الكلام دة مالوش علاقة نهائى بحجم العربية كل واحد عارف الكورى رايح فين وجاى منين واخرة اية

**محمد بدر** · 20-10-2012 12:02 PM

المشاركة الأصلية كتبت بواسطة semsem kane

وهى المبيعات دلوقتى بقت مقياس لجودة وكفاءة العربية ؟؟؟؟؟؟؟؟؟؟؟!!!!!!!!!!!!!!!!!!!!

انت عندك الكورى رخيص ومش غالى عشان كدة مبيعاتهم عالية ( دة كفاية مصر لوحدها مستعمرة الكورى والصينى )

معلش ياباشا والخبر فى الاخر بيرد على نفسة

"ويرجع السبب وراء هذه الزيادة إلى أن سعر سيارة هيونداي أقل من 1500 إلى 2000 يورو في كل سيارة مع وجود ضمان 5 سنوات على سيارة هيونداي و7 على سيارة كيا وهما يتقاسمان 80% من سوق السيارات"

اعتقد الكلام دة مالوش علاقة نهائى بحجم العربية كل واحد عارف الكورى رايح فين وجاى منين واخرة اية

طبعا كلنا نعلم جيدا ان الأوربيون يتحرون الدقة فى جوده الصناعة وعوامل الآمان وليست السعر فقد هو العنصر المؤثر فكلها منظومه مكملة لبعض
ياريت حضرتك توضح العبارة الآخيرة يعنى إيه الكورى رايح فين وجاى منين ............

**SAMEH_FOUAD** · 20-10-2012 01:18 PM

المشاركة الأصلية كتبت بواسطة ashturbo

طبعاً المبيعات المرتفعة ليها علاقة بالجودة ولا بردوا المستهلك الأوروبي مبيفهمش زي ما بتقول على المستهلك المصري أنه بيجري ورا الشكل ... لا معلش خليك موضوعي شوية هيونداي كيا بالذات في أوروبا ( جودة - ضمان كبير - أمكانيات كتير - سعر قليل مقارنة مع المنافسين ) متبيعش ليه ؟

لأ معلش مش شرط المبيعات المرتفعة انها تحدد مدى كفاءة وجودة السيارة , والا كان بقى الفيرنا افضل سيارة على مستوى الجمهورية

وانا والله ماركبتش الفئات الاوروبية عشان اقدر اقول انطباعى عنها , كل اللى اعرفة ان فيها اوبشن زيادة عن اى مكان تانى

والاوروبين بشر زى بقيت الناس فيهم اللى بيفهم وفيهم اللى مابيفهمش , عادى يعنى هما ملايكة مثلا

هما بس الاوروبين فيهم ميزة عن اى حد تانى انهم عمليين جداااااااااا فى كل حاجة

المشاركة الأصلية كتبت بواسطة mmbadroo

طبعا كلنا نعلم جيدا ان الأوربيون يتحرون الدقة فى جوده الصناعة وعوامل الآمان وليست السعر فقد هو العنصر المؤثر فكلها منظومه مكملة لبعض
ياريت حضرتك توضح العبارة الآخيرة يعنى إيه الكورى رايح فين وجاى منين ............

مش اوى كدة يعنى هما بس عندهم معايير السلامة والامان فوق كل شىء , عشان كدة السيارات بتنزلهم مليانة اوبشن وتجهيزات , وعلى فكرة دية مش ثقافة شعب اكتر ماهية ثقافة دولة

دة غير ان الطرق نظيفة جدا + السرعات القانونية هناك محددة عند 70 كيلو داخل المدينة وعلى معظم الطرق السريعة محددة عند 120 كم واللى عايز بيجرى بيطلع على طرق مخصصة لذلك وبتبقى على مستوى عالى

عشان كدة معلش رأيهم فى السيارة لا يعنينى فى شىء لان اللى عندهم مش عندى سواء ( محركات - بنزين - اوبشن - انظمة - قطع غيار ) كل دة مختلف تماما عن اللى هنا فلما احب اقارن ماقارنش بعربية من الخارج وزى ماقولت قبل كدة

لو الناس دية جت ركبت الكورى اللى هنا فى مصر ومشيت بية فى شوارعنا هتلاقى التقييم ( نجمتين بالكتير اوى )

ومعنى جملة عارفين اخرة منين واولة فين ( يعنى عارفين كل حاجة عنة بالتفصيل الممل من مميزات لعيوب , يعنى مش محتاجين حد يقولنا مثلا ان الكورى جاااااااااااااااااامد واحنا عارفين انة على لسة على قدة فى حاجات كتير اوى

**محمد بدر** · 20-10-2012 01:44 PM

هو سعر إعادة البيع وقوة التحمل وتوفر قطع الغيار وسهولة الصيانة الكلام ده كله المفروض بيكون فى صالح العربية واعتقد من غير الدخول فى تفاصيل أكثر من كده خاصتا ان حضرتك متحامل جدا على الكورى وده واضح جدا من اسلوبك
ديما بنقول ان نجاح السيارة لايتوقف على حجم المبيعات او انتشارها - ونقول الإنتشار ده فى دول العالم الثالث أصل مبيفهموش _ أو نقول الأوربيون ليهم تقييمات ثانية وأخير اصل العربية فى أوربا بتمشى فى شوارع معرفش ملها علشان كده بتنجح عندهم - رغم الواقع عكس ذلك تماما
يا صديقى العزيز لازم يكون فى نظرة محايده ونشوف بأعيوننا ولاأحد ينكر التطور المذهل للسيارات الكورية مع أحترامنا طبعا وكل احترام للسيارات الأوربيه
وأخيرا - العربية الكورية تشتريها وتهنها وتبهدل فيها فى شوارعنا تفضل مستحملاك وشيلاك وتصينها عند أى حد وبأقل التكاليف والمفجآة لم تحب تبيع تلقيها أحترمتك وجابت السعر إللى حضرتك بتحلم بيه مش كده ولا إيه

**Youssef.Awad** · 20-10-2012 04:57 PM

اتفق تماما ان ارتفاع المبيعات ليس بالضرورة على جودة السيارات
والا كانت جنرال موتورز وتويوتا افضل عربيات فى العالم وبالمناسبة استدعاءات الماركتين دول تحديدا كبير جدااااااااااا فى كافة الاسواق العالمية تماشيا مع حجم المبيعات

**moha4tec** · 20-10-2012 11:15 PM

السلام عليكم
عشان بس اكون محايد .
العربيات الكورى بتتقدم سنه عن سنه .و لكن طبعا الاوروبى عندهم خبره اكبر و افضل و كذلك سعر اعلى .
مش هتكلم عن مميزات و عيوب و غيره من اللى الزملاء قالوه
هقول نقطه واحده فقط .بس يا ريت تفهمونى صح .
اسال اى حد عايش فى اوروبا .يقسملك طبقات المجتمع هناك عامله ازاى .
هتلاقى مثلا الطبقه بتجيب عربيات فارهه للمنظره .و مبتخرجش كتير .
و الطبقه المتوسطه .بتجيب عربيه وحده المانى مثلا .و بيجيبو عربيه كورى رخيصه للمرمطه و تكون موفره فى البنزين.
الطبقه مش هقول الفقيره و لكن الاقل من المتوسطه بتجيب عربيه وحده فقط زى مثلا ال جولف .
و عشان كده بتلاقى الكورى بيبيع فى اوروبا بنسبه محدوده .بس بتزيد ......
ليه بقى عشان جودتها افضل من اللى بتنزل مصر طبعا .و لكن ممكن تكون اقل من الاوروبى بس كمان ارخص و موفره فى البنزين .فالتبقى مليانه اوبشن بالعبيط و شكل يشد جامد .فبتلاقى طبقه الاقل من المتوسطه ابتدت تتجه ليها هى كمان .عشان كده بتزيد شويه سنه عن سنه بس بنسبه بسيطه طبعا
و اى حد فى اوروبا بيشترى الالمانى طبعا و كذا عربيه كمان .لانهم فاهمين يعنى اه متعة عربيه و جرى و شد .بس طبعا الامكانيه دى الماديه مش متاحه لكل الناس ,فطبعا العربيه هنا ليها سوقها و فى اوروبا اقل طبعا بكتير .(ازمة التجاره العالميه خربت بيوت ناس كتير فى اوروبا ) فالفكر فى الشراء اتغير شويه غصب عنهم .

هنا المعادله مختلفه طبعا .خصوصا لان اغلب شعب مصر نصه غلابه .و اكتر من التلت طبقه متوسطه و قليل جدا غنى فاحش .(اكيد فهمت قصدى )
غير الجمارك و الغلب اللى احنا فيه . فاغلب الناس بتركب الرخيص عشان مش معاه .و خايف من التكاليف .و عاوز يروح مشواره و يرجع باقل تكاليف و بكرامته ميتبهدلش فى المواصلات
انما اللى عاوز يسابق و شد و جرى و ثبات و امان .المانى فقط لا غير .بدون مبالغه .و لو عاوز عربيه رخيصه و شكلها جميل شبه الالمانى فى الشكل فقط و شيك و كده .هيروح و يجي من الشغل فقط .يبقى كورى و اسيوى .
عاوز عربيه غول و الكل يخاف منك و خصوصا سواقين الميكروباص .بس مش بريستيج خالص .و سفاحة بنزين .عليك بالامريكى .دودج رام مثلا .
و الله اعلم

**ابو ليلى** · 21-10-2012 12:17 AM

امال ايه هو معيار الناجح من وجه نظركم ؟ !!! اى شركة فى
العالم طالما بتبيع تبقى ناجحة امال فاتحة ليه ...
طيب الشركات الكبيرة اللى عمالة تندمج مع بعضها تفتكرو السبب ايه غير قلة البيع
كمان الاوربيون مش بيفهمو ياريت ننسى بقى الماضى شوية ونخلينا عايشين فى الحاضر
والارقام بتقول الكورى بيقرب ...بيقرب مقلناش بيساوى ولا بيعدى