الموضوع: درج ذكرياتي

ظرف مكتوب عليه إسمي بالانجليزي و بخد اليد.. طبعا افتكرته على طول.. الظرف ده عمره 10 سنين.. كانت أول مكافأة آخدها في شغل.. و كان مفاجأة.. مش عايزة أقول الأرقام عشان بس ما تضحكوش.. لما بافتكرها دلوقتي بالاقيها أرقام عبيطة بمقاييس دلوقتي، انما ساعتها كانت تسوى كتير.. المهم بأه مناسبة المكافأة دي هي الشغل الجامد اللي عملناه أيام ما كنا بنعين الستاف بتاع مصر فون.. اللي هي بعد كده بأت كليك جي اس ام و دلوقتي معروفة بفودافون :)

لو احكي لكم عن مدى سعادتي بالمكافأة دي هاستغربوا.. و لما تعرفوا انها كانت عبارة عن 250 جنيه هاتضحكوا.. بس فعلا كنت طايرة بيها طيران.

أيامها كانت الفرحة الواحد بيحس بيها بتشيله من ع الأرض شيل.. دلوقتي باخد مكافآت بمبالغ محترمة انما مافيش سعادة زمان

طيب ما تيجوا نرجع للدرج احسن؟ :)

ظرف أزرق و الراسل من الكويت.. بالتدقيق في الختم اللي ع الظرف طلع تاريخه 17/71993.. أيووووووووووووه انا من أيام الجوابات و قبل ما يخترعوا الإيميلات.. دي انتيمتي من أيام الكلية و ما زالت.. كنت باستنى جواباتها كل شهر.. أيوووووووووووه شهر عشان الجواب اللي كنت بابعته كان بياخد اسبوعين على ما يوصلها و هي بتكتب الرد في ساعتها على طول و بياخد له اسبوعين كمان على ما يوصلني.. يااااااااااه ده انا شكلي كده من أيام فحت البحر

لسه محتفظة بالجوابات دي لحد دلوقتي.. اتخرجنا و اشتغلنا و هي اتجوزت و خلفت بنتين و بلاد تشيلنا و بلاد تحطنا و انا لسه شايلة الجوابات في الظرف :)

ظرف تاني لونه أبيض و مبعوت من تركيا - الظاهر ان الدرج كله أظرف و لا ايه :)

في أوائل التسعينات كنت باراسل واحدة من تركيا.. مسلمة و محجبة كان اسمها أسماء.. مرة بعتت لي جواب بالانجليزي و قالت لي فيه انها بتحب تكتب عربي اكتر من الانجليزي فمن هنا و رايح جواباتها لية هاتكون بالعربي.. قلت مش مشكلة.. انما بعد كده اتضح انها مشكلة. الجواب عبارة عن كلام عربي مرصوص جنب بعضه بس مالهوش أي صلة ببعض.. انا كنت عمالة اقرا الجواب و اللي هو إيه؟ مين؟ فين؟

فترة كده و توقفنا عن المراسلة مش فاكرة ليه :)

لأ مش ناوية أرمي الجوابات دي مش عارفة ليه :)

اسلوب رائع في سرد الاحداث ,استمري في فحص محتويات الدرج:)