الموضوع: درج ذكرياتي

المشاركة الأصلية كتبت بواسطة Chicco

شيكو لسه متابع ......معاكي لحد ما تفضي الدرج كله و إن شا الله حتفضي المكتب كله كمان ....(الساعة ٧ بتوقيت تورونتو :))
علي فكرة ..أوعي ترمي حاجة ......هاتي علبة المناديل ديه تاني :D

امال انا باروق الدرج ليييييييييييه؟ ماهو عشان أرمي اللي مالوش لازمة
بس في النهاية ما رمتش غير حاجتين بس :)
الله أعلم هاقدر ارمي باقي الحاجات اللي عدى عليها سنين دي امتى.

المشاركة الأصلية كتبت بواسطة walidadel

مش عارف اسلوبك في سرد الاحداث بيشد ان الواحد يكملي قراءه
صراحه طريقه جميله جداً و بتعجبني كمان

جزاك الله خيرا على المتابعة :)
على فكرة الموضوع ده مش متحضر له خالص و الفكرة فعلا طرقعت في دماغي في لحظتها

المشاركة الأصلية كتبت بواسطة Ramy_Tantawi

السلام عليكم.

الأول احيي حضرتك على مواضيعك اللي بجد مبهجه جداً ومريحه نفسياً وده يرجع لطريقة سرد الموضوع وصلب الموضوع نفسه كمان من الحاجات اللي بتشدني هي انك ماشاء الله مابتسيبيش حاجه تعدي من غير كلمه كده بين السطور تخلي الواحد يفكر ويسرح زي مثلاً


عموماً انا متابع مع الجماعه هنا اخبار الدرج واسراره ولو اني هاسهر كده انهارده واحتمال اتأخر الصبح لكن مش مشكله.:)

يا رب ما أكونش أخرتك.. أصلي كنت سهرانة براحتي عشان واخدة النهاردة أجازة :)

شكرا جزيلا على المتابعة

المشاركة الأصلية كتبت بواسطة Noha-M

يلهويييي يا علاااا!!!

انا لو سيبت مامتى على الدرج بتاعك دة بس هترميه هو شخصيااااااا !!!!!!!!!

بالنسبة لماما اى حاجة توقف استعمالها لمدة لا تزيد عن يومين يبقي تترمي على طوووووووول



طيب انا اقولك موقف .. مرة واحدة صاحبتي كانت بايتة عندي و كانت جايبة لبس تنام فيه المهم وحنا النادى تانى يوم و روحت بعد كدة .. البنت كلمتنى بعدها بكام يوم بتقولي هعدي عليكي اخد هدومى و الشاحن و حاجات كدة .. تخيلي ايه باة !! ماما رمت الهدوم !!

ليه يا ست الحبايب رميتي الهدوووم !! قالتلى شكلها قديم و وحش !!

طبعا منظرى كان زي الزفت!

والله يا علا ببقي جايبة لبس و لسه جديد و بلاقي بنت البواب لابساه !

يلاا الحمد لله انها مرمتنيش انا شخصيا

انا برضه ماما بتقول لي انتي شايلة الحاجات دي لحد دلوقتي لييييييييه؟ هاتفتحي بيها متخف بعد المتحف المصري ما يتشال من التحرير؟
قلت لها تصدقي انها فكرة

المشاركة الأصلية كتبت بواسطة mohamed2002

اسلوب رائع في سرد الاحداث ,استمري في فحص محتويات الدرج:)

جزاك الله خيرى على الإطراء :)
انا شوية كده و هانقل على الدرج التاني.. فتحته امبارح سريعا لقيته مليان ورق.. حد يحط ورق في الدرج كده؟ و يا ترى بتاع ايه الورق ده كله؟.. عموما هانشوف :)

المشاركة الأصلية كتبت بواسطة Chicco

قولنا ما فيش حاجة تترمي ...تحذير أخير :)

على فكرة أنا كنت مشترك في البريتش كاونسل برضه في ١٩٩٦ ....كنت بحضر ماجستير و طبعا الواحد لازم يروح مكتبات عشان المراجع .....ربنا يخلي لينا الانترنت

آه يا شيكو.. ده احنا اتفحتنا في مكتبة الكلية بحث في كتب عشان نعمل بحث مطلوب مننا و لا نلاقي كلمة هنا و لا كلمة هنا.. دلوقتي الانترنت حلت المشاكل دي كلها. بس بيني و بينك، البحث في الكتب مباشرة كده ليها متعة تانية خالص :)

المشاركة الأصلية كتبت بواسطة ehab08

بجد مواضيعك لذيذه جدا أحسن حاجه نطلب من الأداراه تفتح منتدى خاص لمواضيعك المبتكره علشان نعرف نتابعك

ربنا يكرمك يا رب و يفتح عليك :)

المشاركة الأصلية كتبت بواسطة hamedo0

بصراحه يا استاذه اسلوبيك رائع في سرد الاحداث وانا ندمان ان لسه شايف الموضوع دلوقت عشان مواضيك فعلا" جميله
بس ايه ده لسه فيه درج تاني

أيييييييييييوه في درج تاني و هانفتحه مع بعض حاااااااااالا و على رأي معتز الدمرداش.. اوعوا تروحوا في أي حتة :)

أول حاجة قابلتني هي كارت دعوة لحضور حفلة ختام النشاط بزدني لسنة 2005 :)

تتشرف جمعية رابعة العدوية بدعوة سيادتكم لحضور المحاضرة الختامية لدورة التنمية البشرية لعام 2005 و ذلك في قاعة مؤتمرات الأزهر شارع الطيران، مدينة نصر و ذلك يوم الخميس المواقف 15/9. يبدأ الحفل في تمام الساعة الثامنة مساء.
مع تحيات فريق زدني.

رجعت ورا مع الكارت ده 3 سنين ورا.. كانت تاني حفلة ختام نشاط و أياما انا كنت باشتغل مع زدني بس من بعيد لبعيد، يعني مش عضو رسمي في الفريق.. زي ما بيقولوا كده متطوعة بس per task و رحت عشان أشتري تذكرة للحفلة و لسه بادفع الفلوس قام د. محمد عمر لمحني باطلع فلوس في أقل من الثانية لقيته عندي بيقول لي رجعي فلوسك في محفظتك يا علا و شوفي عايزة كام دعوة.. طبعا انا من قوة لهجته ما تنتهالوش كلمة و سكت :)

الكارت دلوقتي باتفرج عليه.. التصميم على أده اوي و كواليتي الطباعة على أدها برضه.. سبحان الله أيامها كانت الإمكانيات ع الأد و كنا فعلا بنحاول نعمل حاجة كويسة اوي من إمكانيات شبه منعدمة.. افتكرت البدايات الصعبة لزدني اللي شرفت بإني حضرتها لما كنا في الميتنج الأخير و د. محمد عمر بيكلمنا عن زدني حققت ايه خلال السنة اللي فاتت.. كل سنة نقلة جديدة و إنجازات جديدة.. آخرها لما الرئيس اليمني وجه دعوة لمحمد عمر عشان يزور اليمن و يقابله و يقعد مع الوزرا المختصين عشان يشوفوا ازاي يقدروا يعملوا هناك حاجة زي زدني :)
ساعتها عينية دمعت من التأثر لما افتكرت لما كنا بنشتغل من لا شئ و لو كلمتكوا على ازاي كنا بنسوق لإسم زدني و برامجها هاتضحكوا على الطريقة البدائية جدا اللي كنا بنحاول نعرف الناس بيها مين همه زدني. الحمد لله الذي بنعمته تتم الصالحات :)

معلش المشاركة دي كلها عن زدني.. باحبها بأه اعمل ايه؟ :)

موضوع جميل كالعادة

نفسي تكتبي موضوع بايخ بقي

و ما زلنا في انتظار آخر تطورات الوضع الراهن في المكاتب المحتلة