توافر قطع الغيار في التوكيل
السلام عليكم يا إخواني الكرام
أتوجه بموضوعي هذا إلى الأخوة الافاضل البروتوناوية المتعاملين مع عز العرب من زمان، ولهم خبرة وقدم راسخة في التعامل معاه.
لاحظت أن كثير من ملاك بروتون على اختلاف فئاتها وطرازاتها، يشتكون من قلة توافر قطع الغيار في التوكيل بصفة مستمرة، وأنك لازم تحجز قطعة الغيار المطلوبة، وتنتظر شهور لغاية ما تيجي، ويتصلوا بك حتى تذهب وتستلمها.
يعني على سبيل المثال، الباشمهندس فيلكس منتظر لمدة تزيد عن ستة أشهر عشان يحصل على فرش السقف تقريبًا.، والله أعلم حصل عليه، أم لسه على قائمة الانتظار. وغيره كثير من المواضيع في هذا الشأن.
أقرب موضوع، بتاع الأخ صاحب البرسونا إللي جابت مانيفولد، وسأل عنه في التوكيل، ولم يجده، وحجزه، ولسه في انتظار وصوله، وربنا يعلم، أمتى هيجي. وممكن تكون العربية عطلانة ومركونة، واقفة علي استبدال هذه القطعة خصوصًا أنها غير متوفرة في محلات قطع الغيار خارج التوكيل.
فسؤالي الآن، هل موضوع عدم توافر قطع الغيار في التوكيل ده طارئ ع عز العرب لظروف ما بعد الثورة مثلاً، أم هو ده نظامه، ودأبه وديدنه منذ حصوله على توكيل بروتون، أنك لازم تحجز الاول، وبعدين التوكيل يبعت لبروتون ماليزيا عشان يستوردها، والعميل ينتظر حتى يمل الانتظار؟
هو مش المفروض يكون لديه مخزون من قطع الغيار بكافة أنواعها يكفي لمدة ستة أشهر أو سنة مثلا، والقطعة أو القطع التي تنفد، ويجي بدلاً منها، دونما أن يطلبها عميل، تكون دائمًا في وضع Standby؟
هو الواحد ممكن يستحمل مشاكل التقفيل البسيطة وغلاء قطع الغيار وارتفاع قيمة المصنعيات...إنما تبقى قطع الغيار غالية ومش موجودة أصلاً، وبتدور عليها بالحلاوة مش لاقيها...فكده كتير كتيير صراحة!
وآسف على الإطالة.