الموضوع: تقرير عن استلامى جائزة أوتو ايجيبت و تقييم بعد السفر و صيانة الألف

أحب أن أتقدم بجزيل الشكر الى Ahmed.TV العمدة بتاعنا لما يبذله من مجهود جبار من أجل القسم

و أيضا منسقى القسم Youssef.Awad و PeaceMan

وجميع الأعضاء الكبار باضافتهم المميزة للقسم FBIAhmed و SonaSteel و mollaELolla وصديقى المحترم saint2011

وجميع من قاموا بعمل تقرير تقييم للصنى الجديدة لانهم من أقنعنى بشرائها و هؤلاء جميعا من قاموا بنشر المواضيع التى استخدمتها فى الرد على أسئلة المسابقة

و أشكر أيضا إدارة نايل موتورز لدعمها لأعضاء المنتدى فى كيفية حل المشاكل و الحصول على تخفيضات و مسابقات وجوائز وأهم شئ معرفة الناس الجميلة اللى هنا و للأمام دائما يا نايل موتورز أكبر وأشهر منتدى للسيارات فى مصر و الشرق الأوسط

أما شركة أوتو ايجيبت فلا يكفيها الكلام لما تقدمه من خدمات لعملائها لتعمل على راحتهم و حل مشاكلهم بأسلوب آراه راقى و متقدم

وأشكر المهندس ابراهيم شافعى مدير خدمات ما بعد البيع على مقابلته الجميلة واستضافته لنا و ما قدمه لنا من معلومات عن نيسان الامارات وأكبر مركز لصيانة نيسان فى العالم بأبوظبى فهو رجل ينتمى لعالم نيسان منذ أكثر من 18 عام

وأيضا موظفى اوتو ايجيبت ممثلين فى م/ ايمان واهتمامها من وقت فوزى بالجائزة و م/ محمد و م/ أمنية

و مهندس الصيانة الرائع م/ محمد رفاعى و معاملته الممتازة لتوضيحه الصيانة و ما يجرى بها من تغيير زيت و فلتر و مراجعة على الحساسات و الزيوت و مياه الريادتير و المساحات و تربيط العفشة و خلافه و اذا كان يوجد مشاكل تتطلب حلها

وملحوظة لاحظتها أن المعاملة ممتازة على مستوى جميع العملاء هتلاقى نفسك كأنك دخلت بنك المفروض تروح لموظفى الاستقبال علشان تاخد رقم ( تكت ) و أمامك شاشة عندما تجد رقمك ظهر عليها وأمامه رقم المهندس تذهب اليه

أنا وصلت 11:15 صباحا وبعد المقابلة الجميلة من أحمد و م/ ابراهيم شافعى جلست مع مهندس الصيانة
لتوضيح الصيانة سألنى عن ما إذا تواجهنى مشكلة بالعربية فالحمد لله لا يوجد لكن طلبت منه التأكد من حساسات الايرباج و صواميل الكراسى لانى ركبت فرش و الكراسى اتخلعت و كان فى مسمار تعب الراجل جدا و أنا سألت هل فى دلايات للعربية لاننا داخلين على شتا و المطر و الذى منه لكن للأسف لا يوجد

و سألته سؤال مهم جدا بالنسبة لى على موضوع الكاوتش وان الماكسس سئ و انى هأعرض بالمرة قالى ان ما ينفعش تغير مقاس الكاوتش لانه هيأثر على ضمان العفشة خاصة و ان كده العربية هتوطى و أحمد كان فاكر ان المقاس 15/60/195 ده مكتوب فى الكتالوج بتاعها زى التيدا عنده لكن المقاس العريض ده مش موجود فى الكتالوج عندنا ولا فى كتالوج امريكا اللى نازل فى موضوع هنا
المهم المهندس أوصى بعدم تغيير المقاس ولكن من الممكن تغيير نوع الكاوتش بنوع آخر و فوجئت ان موجود عندهم كونتنتال فرنساوى الفردة بعد الضريبة و خصم نايل موتورز تعمل 545 جنيه بس الموجود طبعا نفس المقاس الأصلى 15 / 65 / 185
أنا بأفكر نراسل نيسان الأم بخصوص موضوع تعريض الكاوتش و كمان تركيب وحدات الرفع

المهندس خرج معايا لاستلام العربية منى الساعة 11:45 و علم فى التقرير على مكان الخدوش و أخد المفتاح وأبلغنى انها هتنتهى الساعة 2 و فى شاشة تانية بتابع منها مراحل العمل على العربية إذا كانت فى الصيانة و لا فى انتظار الغسيل لغاية الآخر

ودى صور الورشة من مكان انتظار العملاء












و فى مكان للأطفال بس صغير 2 * 3 متر غير مغلق و فيه بلاى استيشن طبعا اللى بيلعب شباب مش أطفال

صورة منطقة الاطفال بالبلاى ستيشن و فى آخر الممر يظهر مكان استقبال العملاء و الكافيه على اليسار





وبتستلم 2 كوبون مشروب ساخن و كوبون كرواسون



ودى منطقة انتظار العملاء لانتهاء الصيانة





وبالمقابل مساحة مشابهة للانتظار أيضا و غرفة للمدخنين



و انت فى منطقة انتظار العملاء طبعا شايف ورشة الصيانة و العربيات و هى مرفوعة وشفتهم بيشيكوا على العربية و هى مرفوعة و بيسقطوا الزيت و العامل فك 3 علب زيت 1 لتر توتال كوارتز وربطوا العفشة و بصوا على الكاوتش و الدنيا وزود مية المساحات وحط عليها سائل موجود فى الصورة هنا فى النص مع شوية انواع اسبراى آخرى





وأثناء ذلك تم استلام الجائزة و اتصورنا

العربية خلصت على 2:15 تقريبا وجلست مع المهندس لاستلام التقرير الخاص بها و تعليق المهندس الوحيد كان على فلتر التكييف وانه لسه غير متوافر و خرجنا استلم العربية من مهندس الصيانة بعد الغسيل تمام زى الفل الحمد لله


طبعا كان كله مجانا بما فيه زيت توتال الـ 10 آلاف

شكرا اوتو ايجيبت و قسم نيسان نايل موتورز




مدخل المركز ومنطقة انتظار السيارات و أبواب الاستقبال على اليسار




الورش على اليمين و فى النهاية منطقة غسيل السيارات




حاولت ادخل القاهرة على أساس كان يوم سبت و الدنيا هادية وكنت متابع مع ا/ حاتم (saint2011) على التليفون بقالى كام يوم علشان أستقر أبدل الكاوتش بايه لغاية لما استقريت على نفس الراجل اللى غير هو عنده
بس بصراحة مهندس الاستقبال قلقنى بسبب ضمان العفشة و انا أساسا كنت قلقان انى هأوطى العربية
فلما دخلت مصر و لقيت شارع التحرير مقفول عربيات وكانت الساعة بقت 3:30 قلت ألحق أروح فى النهار أحسن

نسيت أقلكم أنا الصبح كان الصحراوى فاضى و كله بيجرى لقيت نفسى جبت 150 من غير ما أحس و العربية تمام و زودت لغاية 170 بس ما حسيتش انى أقدر أعدى السرعة دى

وأنا راجع بأة صوت الموتور كان أهدى لقيتها بتسحب عادى جدا لغاية 165 برضه من غير ما أحس ايه سكينة فى الزبدة هى اللى غوتنى مش أنا

و طبعا كله بيجرى هوندا و بى ام و c180 و سيراتو فرحت كابس لـ 180 و العربية كانت كويسة كأداء

لكن التحكم بسبب الكاوتش صعب شوية يعنى لما تنقل من حارة لحارة على سرعة عالية تحس العربية ريشة فى هوا لازم تمسكها كويس علشان ممكن تعدى معاك مش للحارة التانية لأ ترمى كمان على التالتة

وكمان طبعا لما تعدى جنب تريلا كبيرة أو السوبر جيت تاخد بالك انك قبل ما تعديها علطول هتلاقى نفسك بتتحدف و بعض الاحيان بترد لوحدها و احيانا لأ فلازم توازن بالطارة هى حاجة بسيطة يعنى لو التريلا يمينك الساعة 3 هتلاقى نفسك بتتحدف فى اتجاه الساعة 11 سنة بسيطة و لما سألت المهندس قالى ده فى كل العربيات والكلام ده حتى و انا فاتح كل الشبابيك

بس موضوع انها ساعات بترد لوحدها ده كان بيحصل الصبح لكن و أنا راجع ماحصلش فأنا أعتقد ان ليه علاقة باتجاه الهواء

طبعا أنا عارف انى هأتشتم و أضرب على السرعة اللى كنت ماشى عليها

بس مش هتكرر تانى ان شاء الله أنا أساسا سواقتى هادية وعمرى ما عملت الكلام ده

وكان أداء التكييف معايا على سرعة 2 جيد شغلته قبل ما أوصل بشوية علشان أطمن عليه
وطبعا لما بتجرى بسرعة عالية هتلاقى الكاوتش بينطر الزلط بره و بيخبط فى العربية فى الأول

وبالنسبة للبنزين أنا متوسط الاستهلاك قبل ما أسافر طبقا لكمبيوتر العربية كان 12.3 ففولت العربية الصبح و صفرت المتوسط و عدادات الرحلات ولما وصلت اسكندرية كان لمبة التانك يدوب لسه بتنور فدخلت فولت من نفس البنزينة و أخدت القراءات وكانت كالتالى


المسافة الكلية قبل السفر و التفويل أول مرة 779
مسافة الرحلة 443
متوسط الاستهلاك طبقا للكمبيوتر 7.8 لتر لكل 100 كيلو
المسافة المتبقية الممكن قطعها قبل تانى تفويلة 57 كيلو
المسافة الكلية بعد الرجوع من السفر و التفويل تانى مرة 1222
عدد اللترات المضافة للخزان فى التفويلة الثانية 35.5 لتر
التفويل فى المرتان بالزور من بنزينة الامارات

المتوسط الفعلى للاستهلاك 8 لتر لكل 100 كيلو

السير كان بمتوسط سرعة من 140 الى 160 لمسافة 400 كيلو فيهم نصف ساعة بالتكييف و 43 كيلو على المحور وداخل القاهرة

نصيحة محدش يفول والطرمبة مش ناحية التانك و بلاش موضوع تفويل الزور كتير لانى عملت كده و زور التانك ضيق و المسدس العامل محطوش كويس ففلت من مكانه و بهدلى جنب العربية و الكاوتش بنزين طبعا خليته يغسلى المكان ده كويس بميه و صابون وأنا شلت نص لتر من الحساب فوق قصاد البنزين اللى وقع لان شاشة الطرمبة كانت 36 لتر



والسلام ختام



.