استشارة فى شراء أوبترا ب ABS و Airbag
الأول السلام قبل الكلام :vctry:, السلام عليكم جميعا.
دلوقتى انا مالك سابق لبورا و عملت بيها حادثة توتال لوس و الايرباج كانت سبب من عند ربنا لنجاتى, و بعدين ركبت النترا 2005 فترة و كنت حابب العربية و خصوصا فى وسعها و الراحة الداخلية و قلة مشاكلها لكن مكنتش ثابتة اوى فى نظرى و فراملها مش حلوة.
المهم بعتها بعد سنة (و ده المعدل الطبيعى لأى عربية معايا فى حدود سنة), و جبت بورا تانى نظرا ان الأولانية بتاعت الحادثة مقعدتش معايا غير 4 شهور, المهم العربية كانت من افضل حالات البورا الموجودة فى السوق و رغم استمتاعى بالعربية لفترة من الزمن و خصوصا الثبات و الأمان, لكن فى شوية عيوب فى نظرى تتمثل فى الأصوات الداخلية من التابلوه و احيانا من الأبواب, العفشة الخلفية ناشفة و بدبدب و حتى بعد تغيير الدنجل باخر استيراد كان لسه بردو فيه نسبة دبدبة, صوت الماتور و عدد لفاته على السرعات, يعنى على 100 ال RPM بيكون 3200 لفة, على 160 بيكون 5000 لفة, 180 بيكون 5500 لفة تقريبا. و طبعا صوت الماتور مسموع الى حد يسبب ازعاج لو مش مشاغل كاسيت و قافل الزجاج.
طيب العربية جتلها بيعة جيدة رغم انى مكنتش عارضها و ربنا يبارك لصاحبها, دلوقتى جه وقت الشراء و مزنوق شوية فى الوقت لأن بعت عربية مراتى من شهرين و دلوقتى ماشى بعربية الوالد.
كان عينى على سيفيك 2007, و ملقتش لسه حالة كويسة (الحمد لله اخر ثلاث عربيات كانوا فابريقة بالكامل و فى البيع محدش طلع فيهم غلطة) فى حدود السعر الأنا محدده (100,000ج), و اوكتافيا a5 او جيتا كان لازم ادور من اول موديلات 2008 لأن قبل كده فى اشاعة شبه مؤكده ان كان فى عيب فى عقل الفتيس بيظهر حتى مع تغيير الزيت و العيب اتعدل من موديلات 2008 طبعا صعب اوى فى حدود المبلغ المعايا,
طيب ظروف شغلى مش مستقرة الفترة الجاية فمحتاج عربية اعرف اخرج منها لو اتزنقت, فرغم حبى للكروز بس كان لازم استثنيها عشان ضعف حركة بيعها و اشاعة تغيير الماتور, طب الالنترا 2010 عربية مش ثابتة و و خفيفة, طب السيراتو (كنت على وشك اخلص فى واحدة بجنط 16) بس عفشة كلو خوفنى منها و قالولى هتقرفك و بردو مش ثابتة اوى,
و اخيرا دماغى ودتنى للاوبترا خصوصا ان 2010 مع صديق ليا و 2006 مع نسيبى, الاثنين بيأكدة على قوة ثبات العربية لغاية سرعة 180, و بصراحة صديقى كان طالع ورايا الاسكندرية بعربيتو و انا بالبورا و كان سادد معايا جرى و ثبات بس عربيتو بتقف على 180 و انا كانت بتكمل ل 190. طيب معاه فى السفرية جوه العربية واحد صاحبنا ركيب بى ام من زمان 318 م 2000 و 316 م 2007.
فسألتو قولتلو يا مارو بما انك ركيب بى ام فكان ايه رأيك فى الأوبترا كثبات و الأهم العزل الداخلى, يعنى فى صوت هوا او صوت الماتور, فقالى بصراحة انا شايف ثابتها كويس جدا و العربية متحسش بالطريق و انتا جواها.
لغاية دلوقتى كلام جميل, طيب فاضل اخر مشكلو بالنسبة ليا و هى عوامل الأمان, طب لو قلنا انى لقيت اوبترا 2009 فابريقة بره و جوه, عداد 35 ل 37 الف كيلو, فرامل ABS و 2 ايرباج امامى و طارة مالتى و جنوط بس معرفش اصلى ولا لأ, و كاوتشات جديدة بريلى و الفرامل الخلفى ديسكات زى الأمامى, و المعرض العارض العربية بيقول العربية ده وكيل مش خليجى , الصالون حالة شبه ممتازة و الشنطة, العربية فعلا حالة شبه جديدة, و مفاضلش الا انى امشى بالعربية عشان اشوف اخبار العفشة ايه و طبعا لو فى نصيب هكشف على العربية.
و اخيرا بعد الفصال معاهم اخرهم 85000 ج, و ماظنش انها هتتزحزح على كده, مع العلم ان 2010 بحالة مماثلة من غير الزيادات ممكن تخلص على 80000 ج.
ايه رأيكن بأه يا جماعة, انا متهيألى و انا بكتب اقنعت نفسى اساسن.
و هل فى فروقات فى قطع الغيار ما بينها و بين الأوبترا العادية و خصوصا فى تيل الفرامل؟؟؟؟
منتظر ارائكم يا رجالة, لازم اخد قرار بسرعة.
