كيا كارينز ولا بريليانس v5 ايهما افضل دلوني يا خبراء المنتدي

السلام عليكم ورحمة الله وبركاته
اولا انا لا افهم في السيارات والمواتير الا القليل جدا وناوي إن شاء الله اشتري عربية mpv او suv وكانت شروطي انها تكون عائلية وواسعة لزوم السفر وتكون ذات قوة و تحمل و ثباااات و اماااااااااااااان وقطع غيار اسعارها معقولة بالنسبة للعمر الافتراضي وتكون اتوماتك
وثمنها فيها واكثر
بمعني عربية تعيش وتستحمل شوارعنا ومطباتنا الغير طبيعية يعني ماتور معمر وعفشة قوية واعتماديه ومصاريفها اقل من حيث مدة الاستخدام وتوكيل محترم وانا من النوع الي ما ببعش عربيتي بسرعة
وجزاكم الله خير الجزاء لمساعدتي

مقارنة بسيطة v5 تكسب ....كالعادة كل الشركات الكبيرة زي كيا بتبقي بخيلة في وسائل الأمان والكماليات

متشكر جدا اخي علي الرد بس المشكلة ان فية ناس كتير بتخوفني من الصيني وانها عربية هتتفكك وسعرها هيبقي في الارض لوجيت ابيعها اية رايكوا بققققققققققه في الكلام دة
منتظر رد حضراتكم

مفكرتش ليه فى الفانتازيا عربيه عائليه و اماااااااااااااااان و كماليات و الكل بيشكر فيها جدا

الكارينز بلا شك
البريليانس في 5 لسه جديدة وقطع غيارها ما انتشرتش وبتعتمد في جاذبيتها على شبهها مع البي ام اكس 1
ميزتها اعلى شوية عن الارض في المطبات
بس ده مايستاهلش المخاطرة
الكارينز فيها كل الامكانيات لو هاي لين
تقفلها كويس
صالونها واسع وعائلي
قطع غيارها متوفرة
وكيلها محترم
عيبها سحبها مش اوي لكن طالما عربية عائلية يبقى مش علشان جري وفرك
فيها عيب تاني لبعض الناس
الشكل الجديد هينزل السنة الي جاية

بس برضه هاقول كارينز طبعا
والله اعلم
ليه
ارجو قراءة رأيي المتواضع من البداية مرة اخرى
ههه
اتمسى بالخير

الكارينز طبعا و ابتعد عن الصيني

اقتباس:

---

المشاركة الأصلية كتبت بواسطة abogharib

مفكرتش ليه فى الفانتازيا عربيه عائليه و اماااااااااااااااان و كماليات و الكل بيشكر فيها جدا

---

فى جاب كبيرة بين سعر الفانتازيا و (الكارينز أو v5)
وبعدين الرجال تقريبا مبيفكرش فى سيارة سيدان
طبعا الكارينز اعتمادية اكثر ومجربة وعل فكرة هذه السيارة يطلق عليها السيارة العائلية الأولى فى مصر
واحب اضيف نقطة هامة الكارينز اوسع من v5
ولاكن v5 أعلى من الأرض وممكن تكون اشيك بس فيها مجازفة
والعربيتين مش بتوع فرك
v5 كماليات اكثر
يعنى انا لو مكانك اختار الكارينز علشان مضمونة وبياعة

الكارينز هينزل موديل جديد منها آخر السنة
استنى لما تشوفه على الطبيعه عشان تقدر تختار

بس انا اخاف ادفع المبلغ ده في صيني .......... أهم سبب مش انها صيني قد ما ان الماركات الصيني بتظهر فجأة و تختفي فجأة

اقتباس:

---

المشاركة الأصلية كتبت بواسطة mazagangee

الكارينز هينزل موديل جديد منها آخر السنة
استنى لما تشوفه على الطبيعه عشان تقدر تختار

بس انا اخاف ادفع المبلغ ده في صيني .......... أهم سبب مش انها صيني قد ما ان الماركات الصيني بتظهر فجأة و تختفي فجأة

---

+1
بس دي مش أي صيني , بريليانس أثبتت نفسها من أول ما نزلت و عربية محترمة بصراحة

Renault duster :) بس مانيول

داستر وتوكل على الله

الكارينز واسعه و عائليه و منتشره و سعر اعاده البيع بتاعها حلو و قطع غيارها متوافرة. المشكله فيها هى أنها تقيله على الموتور و بالتالى فى السحب بتبقى ضعيفه و خاصه لو محمله و مشغل التكييف و طالع مطلع مثلا و تانى حاجه حكايه الجيل الجديد اللى نازل ٢٠١٤ . البريليانس لسه نازله جديد فمش هتلاقى آراء بناء على تجربه لكن البريليانس بصفه عامه بتعمل عربيات كويسه مش مضروبه . لو حضرتك ناوى تبيع العربيه قريب يعنى سنه و لا سنه و نصف يبقى خليك فى الكارينز علشان ما تخسرش فيها لان سعر اعاده البيع بتاعها حلو و سهله فى البيع أما لو مش ناوى تبيع قريب فخليك فى البريليانس هتلاقيها عربيه محترمه و مليانه اوبشنز

حتي الان الفضليه للكارينز من حيث انها متجربه وناجحه وماسكه سعر...بعد ما البريليانس تتجرب يااما هاتنجح وساعتها ينفع نقارن ..يا اما هاتفشل ويبقي الوضع كما هوا عليه

الأخوة الأفاضل نحن نقارن بين موتور يابانى متسوبيشى للفى 5 وموتور كورى الصنع للكارينز ..يعنى الحاجة الصينى فى العربية البادى لمن يخشى الصينى ..إضافة ان التوكيل هو توكيل بى ام دبليو وموديلات بريليانس السابقة لم يشتكى منها أحد ...وده يحسم المقارنة لصالح فى 5 ...رجاء نراجعة رابط مواصفات السيارة للتأكد من المعلومة
Brilliance Car Details-V5 MT Comfort

المقارنة بكل جوانبها ستكون فى صالح الكيا كارينز ؟؟ فانت ما دمت اخترت تلك الفئة العالية فاول شئ سنقارن على اساسه هو وسع السيارة داخليا وراحة الجلوس فى الفترات الطويلة والسفر ومساحة التحميل .. وده فى صالح الكارينز الصالون اوسع .. السقف اعلى ومساحة شنطة الكارينز أوسع ... نيجى بقى للموتور والسحب واستهلاك البنزين .. انا افيدك فى الكارينز كويس قوى وهو ان فعلا وحسب كل التعليقات السابقة ففعلا العربية تقيلة جدا على الموتور ويعتبر ده العيب الوحيد للكارينز وهتحس بيه بمجرد تحركك بالعربية وبالذات مع تشغيل التكيف وياسلام لو معاك 2 او 3 فى العربية يبقى قول على السحب يالله السلام .. وطبعا ده بيأثر على استهلاك البنزين بشدة واللى بيوصل فى الظروف اللى قلتلك عليها دى لـ 160 كم فى الصفيحة .. البريلانس لم اجربها وبصراحة لم اسمع عنها شئ علشان افيدك فى النقطة دى ... نيجى بقى لقطع الغيار من حيث توفرها خارج التوكيل فى السوق عادى واسعارها فى صالح الكارينز وبلا نقاش وخد بالك البفارية قطع غيارها غالية جدا وتوكيل فى تعامله بصراحة ليس بالجيد نهائيا وحراق قوى قوى قوى .. تحس بعد ما تجيب من عنده عربية انك فريسة انت ومالك غنيمة لهم .. نيجى بقى لاعادة البيع وسعر اعادة البيع , برضه فى صالح الكارينز ميه فى الميه ولما بتحب تبيع بتلاقى سعر مناسب وسرعة فى البيع انا كان معايا كارينز خليجى هاى لاين قررت البيع ااتباعت بعديها بيومين بالظبط والله.. الصينى ولو بريلاينس ومع احترامى بيخسر كثير قوى قوى .. حرام ترمى فلوسك فى الارض .. حتى لو فكرت انك مش هاتبيع وها تعيش معاها والكلام ده .. انت مش ضامن بكره فيه ايه لاى ظرف اضطريت تبيع هتخسر فى الصينى لان مهما قالوا على البريلانس برضه صينى حضرتك الجليانا كانت بـ 155 الف موديل 2007 اتباعت ادامى فى 2088 بـ 75 الف وثابتة على السعر ده تقريبا من ساعتها تفرق حاجات بسيطة .. اخيرا توكيل على الله فى الكارنز ولم تندم بفضل الله انا كانت معايا وعربية ممتازة فى كل الجوانب ماعدا السحب واستهلاك البنزين كما وسبق قلنا .. لكنها عربية فخمة وكبيرة وناعمة وكمالياتها ممتازة على فئتها وعلى فكرة هى العربية الوحيدة فى الكيا عفشة خلفية ملتى لينك فثابتها مع السرعات برضه ما شاء الله .. استخر الله وربنا يهديك الى ما فيه الخير لك

ابعد عن الصينى و غني له

رينو داستر الدفع الرباعي
واسعة
مصفحة
ثابتة
وسائد هوائية
abs
ebd
عفشة و مساعدين ناعمين و اقوياء جدا جدا
توكيل تمام
تسارع تمام

اقتباس:

---

المشاركة الأصلية كتبت بواسطة ateeby

رينو داستر الدفع الرباعي
واسعة
مصفحة
ثابتة
وسائد هوائية
abs
ebd
عفشة و مساعدين ناعمين و اقوياء جدا جدا
توكيل تمام
تسارع تمام

---

كلام مظبوط ميه فى الميه

الكارينز ثباتها كويس جدا عن تجربة .. لكن سحبها أسوأ سحب ممكن تتخيله من عربية في فئتها السعرية
قطع غيارها متوفرة خارج التوكيل و صيانتها سهلة .. واسعة من جوه جدا
واطية و قريبة من الأرض ( سيبك من الشكل - اللي جرب العربية فعلا عارف الكلام ده كويس ) خصوصا لو محمل الشنطة شوية هتحك معاك في أي حاجة و عزمها بيبقى في الضياع مع التحميل ..
تقفيلها كويس نسبيا لكن مش وهمي و بيظهر فيها عيوب تقفيل مع الوقت ( زي مشكلة التانك اللي مش بيرضى يتفتح اللي ظهرت مع أكتر من واحد أعرفه و معايا كمان )

البرليانس مش عربية وحشه ولا برضه عربية وهمية .. أنا بتكلم عموما عن كل إصداراتها
الماركة صيني لكن مافيش فيها ولا مسمار صيني .. تقفيلها مصري مع موتور ياباني و شاسيه أوروبي
الإصدارات اللي جربتها قبل كده من برليانس تخليني أقول عليها عربية محترمة جدا و أثق في إصداراتها
كان فيه عيوب تقفيل في الـ frv و الجالينا .. لكن اختفت تماما في الإصدارات الأخيرة من الـ fsv .. بالتالي أتوقع إن مع الطفرة دي هيكون التقفيل كويس في باقي الإصدارات الجديدة ..
أنا ماجربتش الـ v5 لكن برضه شيء طبيعي جدا على 1400 كيلو بموتور 1600 mpi يكون السحب في الطلعة ضعيف لكن على الميد رينج و السرعات العالية أتوقع إنه كويس لإن الموتور ده كلنا عارفينه و الفيتيس غالبا مش هيكون أقل من فيتيس الـ fsv أبدا بالتالي هش هتحس إن سحبها ضعيف غير في الطلعة بس و عزمها 155 نيوتن كويس .. لكن المشكلة إن صالونها اضيق من صالون الكارينز ..
طبعا قطع غيارها كلها مش هتلاقيها غير في التوكيل .. لكن التوكيل سمعته كويسه و قطع الغيار البرليانس في التوكيل عادية على فكره مش غالية .. لكن إعادة البيع أكيد في الضياع ...
كماليات البرليانس أكتر بفرق كبير و الصالون شكله أحلى كمان ..

* لو مش فارق معاك التسارع .. و مش بتحمل العربية كتير و انت بتجري .. و موضوع الأوبشنز ده بالنسبة لك رفاهيات ... خليك في الكارينز .. واسعه جدا من جوه و قعدتها مريحة و قطع غيار و إعادة بيع في مصلحتك ..
* لو عايز تكون مميز و تقدر على أسعار التوكيل و مش هتبيع قريب و عايز كماليات عالية و موتور أحسن نسبيا .. خليك في البرليانس