من بلية دبرياج غيرت موتور كامل
مش أقدر أقول غير حسبي الله ونعم الوكيل في اللي كان السبب
بعد ما إشتريت إسكورت 1600 زيتك وربنا وفقني في شراها بحالتها وسعرها وكانت ماشيه معايا لمدة شهر زي الفل قطعت دبرياج قلت مش مش مشكله ممكن كبل او حاجه بسيطه كده
المهم رحت لميكانيكي المفروض انه بتاع فورد بس ويا ريتني ما رحتله قالي سيبلي العربيه وسيبتهاله تاني يوم رحتله قالي دي بلية الدبرياج كان فيها كسر المهم غيرها وكشف على الديسك والإسطوانه قالي تمام مفهمش اي حاجه
رحت إستلمت العربيه وقالي تمام حسابك كام يا عم الحاج قالي بلية الدبرياج 250 وحل وتركيب الجيربوكس 250 وغيرت سير التقسيمه وجوان غطا التيكيهات المهم الحساب كله 750 جنيه قلت كويس وإستلمت والمفروض انه جرب العربيه وقالي كله ميه ميه
مشيت حوالي 20 كيلو بعدها لقيت العربيه بتكركر كاني حاطتلها بنزين 80 قلت ما علينا يمكن يكون طلع بيها مشوار وإستخصر يحط بنزين ليها وحطلها 80 مع انها انجكشن
مشيت لمدة خمس دقايق كمان لقيت صوت الكركره بيزيد جامد لدرجة ان الأمبليهات من غير غيارات برده بقت بتكركر وما فيش ثواني لقيت العربيه بتطلع دخان من كل حته في الكبوت وبطلت ركنتها على جنب ونزلت افتح الكبوت ما كنتش شايف الموتور من كتر الدخان وحرارة الكبوت كانت مولعه لدرجة اني مكنتش قادر استحمل حرارته على ايدي لحد ما احط السخ اللي بيرفع الكبوت
إتصلت بالميكانيكي وحكيتله على اللي حصل قالي طب إستنى لما تبرد وجيبهالي
فضلت مستني حوالي ساعتين جنب العربيه فاتح الكبوت لحد ما بردت وبدات بقه ادور على الأسباب وايه اللي حصل وإكتشفت الأتي
1-سعادة الباشا الميكانيكي مكنش مقفل كام مسمار كده في الجيربوكس
2-إكتشفت إن الباشا مش رابط مسامير العجل بعد التركيب والصواميل بربطها بإيدي
3-المصيبه بقه اللي خلا الموتور باظ الباشا وهوا بيقفل الجيربوكس قرص على خرطومين السخن بتوع التكيف وقفل عليهم بالجيربوكس وقرط على المسامير لحد ما اتقطعوا وهوا في الطراوه ولا واخد باله
النتائج
مية الريداتير بالكامل نزلت اثناء المشوار اللي مشيته وطبعا زي ما الجماعه الفورداويه عارفين حساس الحراره راكب في الفيبره( كوعة الميه) وطبعا طالما مافيش ميه يبقى أمبير الحراره عمره ما هيعلم ان الموتور سخن
طبعا سخن الموتور لحد ما قفش من كتر السخونيه ودا اللي خلاها تبطل وما دارتش في ساعتها تاني
ربط مسامير العجل كويس
وحاولت اربط المسامير اللي طلتها بتاعة الجيربوكس اللي كانت مهويه
وبعد ما بردت العربيه وبدأت اتعامل مع الخراطيم المقطوعه ديه كان معايا حتة خرطوم قديمه فضلت افك واركب لحد ما طببت الخرطومين بتوع السخن بتوع التكيف وزودت مية الريداتير واحده واحده وقلت بسم الله ودورت العربيه راحت دايره حمدت ربنا وقلت ربنا ستر وعدت بسلام وواحده واحده لحد ما رجعت للميكانيكي كنا بقينا الساعه 12 باليل قالي سيبهالي وانا هظبطهالك
رحتله بعد الشغل تاني يوم بعد الشغل على الساعه 4 لقيته سايبها وشغال في حاجات تانيه قلت في عقل بالي كويس المهم اني ابقى واقف على ايده المرادي عشان ما يحصلش حاجه تاني
وقفت جنب عربيتي اشيك عليها وبصيت على زيت الماكنه لقيته ناقص جدا تحت الحد الأدنى رحت جيبت كيلو زيت وزودت لحد ما يدوب عدى الحد الأدنى بحاجه بسيطه
المهم الباشا بدأ يشتغل فيها واحده واحده على ايده كل حاجه بعملها معاه لدرجة اني بقيت عامل زي صبيه وهدومي كلها شحم وايديا قلت فدى اني اعمل عربيتي وابقى متأكد انها تمام
المهم بعد ما خلصنا ووصلنا لمرحلة اننا نملى الريداتير ميه وندور العربيه فدارت الحمد لله وقلت كده العربيه نفدت من الحراره اللي اتعرضلها الموتور قلتله انا مش همشي الا لما المروحه تشتغل وتفصل وفضلنا سابنها دايره حوالي نص ساعه وفي لحظه سمعت صوت فرقعه جامده ومية الريداتير طايره مترين فوق وغرقت الدنيا والحمد لله انو ما كنش حد واقف قدام العربيه لأنها كانت تقريبا بتغلي رحنا مبطلين العربيه وسيبناها تبرد شويه وبالبحث عن السبب كاوتش شجرة الميه فرقع من ضغط الميه السخنه كانت الساعه بقت 12 تقريبا قالي سيبهالي ونغيرها بكره
رحتله تاني يومبعد الشغل لقيته جايب معاه واحد تاني وتقريبا قفلوا العربيه ودورناها دارت والمروحه اشتغلت وفصلت وكله تمام المهم حسابك كام يا معلم قالي الشجره وشوية الخراطيم والمصنعيه كله كله 700 جنيه ومن هنا ومن هناك أخد 600 جنيه بالعافيه
قعدت أراجع على العربيه تاني لاقيت حلة الجير بوكس مفارقه حوالي 2مليمتر عن جسم الموتور قلتله يا يا باشا هوا انت شيلت حتة الخرطوم اللي انت كنت قارص عليها في الجيربوكس قالي لا لا ما فيش خرطوم ولا حاجه بيتهيقلك إتوكل على الله بس وما تشغلش بالك كده كل حاجه عندك بقت زي الفل وميه ميه
مشيت وانا مش مقتنع وقلت يا واد جرب العربيه ولو حسيت بأي حاجه إبقى ارجعله وإثبتله ان كده مش صح ويبقى يشيل حتة الخرطوم ديه
روحت البيت واحده واحده وتاني يوم وانا مروح من الشغل لقيت العربيه بقت بترعش في الطلعه على كل الغيارات وانت ماشي ولما تفصل على الصلانصيه الاقي دواسة الدبرياج بترعش جامد ومش هاديه ولازم ادوس عليها نص دوسه عشان الرعشه اللي في الدواسه ديه تخف شويه
رجعتله طلع جرب العربيه ورجع قالي يا باشمهندس أنا حاولت اوفرلك وقلتلك الإسطوانه والديسك دول يشتغلوا بس كده دي حاجه غصب عني العربيه جايبه دسك وأكيد الإسطوانه باظط برده بسبب الديسك
قلت لا حول ولا قوة الا بالله طب والعمل قالي سيبهالي نحل وأقولك
المهم تاني يوم اتصلت بيه قالي إسطوانه وديسك يا باشا ولما تيجي اوريهملك الديسك سوسته مكسوره قلتله طب غيرهم
رحتله أخر اليوم لاقيته مقفل وكله تمام ووراني الديسك المكسور والإسطوانه باظط برده بسبب الديسك
المهم حسابنا ايه يا برنس قالي الإسطوانه والديسك 700 جنيه ومش هاخد مصنعيه كامله على حل وتركيب الجيربوكس هاخد 150 جنيه بس المهم من هنا من هناك دفعت 800 جنيه
إتوكلت على الله ومشيت وقلت يا رب تكون أخر الأحزان رحت زودت زيت الموتور عشان كان ناقص من أول مره لحد ما مقاس الزيت بقى قاري مظبوط ومشيت للبيت وقلت الحمد لله على اللي حصل ونزلت الشغل تاني يوم زي الفل واليوم دا كان عندي مشاوير كتير شويه خلصتهم كلهم وانا مروح بالليل لقيت العربيه بدوسلها بنزين والعربيه عماله تتقل تحت رجلي مش عارف السبب فصلت دبرياج وسيبتها على السلانسيه راحت مبطله إدتها التالت ووصلت دبرياج دارت ومشيت شويه بس بتتقل أكتروأكتر تحت رجلي فصلت تاني وركنت على جنب راحت مبطله قلت ما تحاولش تدور وإنزل بص الأول نزلت افتح الكبوت برده دخان على خفيف شويه كده من حوالين الموتور وأمبير الحراره ماكنش معلم انها سخنه وحاولت ألمس غطا التيكيهات بأيدي كنت هتلسع منه مقدرتش استحمل حرارته ولو للمسه بس
فضلت أدور على ايه اللي حصل لقيت أول حاجه قربة الميه مفهاش ولا نقطة ميه وتحت العربيه ما فيش اي أثر ميه المهم بعد ما هديت العربيه شويه نزلت أبص تحت العربيه على الموتور من تحت لقيت بطن العربيه من تحت الجنب اليمين كله غرقان زيت والمقص اليمين غرقان زيت برده طلعت مقاس الزيت لاقيته ناشف تماما والعربيه زي الفل ما فهاش ولا نقطة زيت كمان
عرفت اني في اللحظه ديه طار الموتور بتاع العربيه نهائيا خصوصا بعد ما زودت كيلو زيت وجيت ادور لاقيت العربيه صوت الدواره بتاعتاها مختلف خالص وسريع عرفت انها جابت صبابات كمان إتصلت بواحد ميكانيكي تاني صاحبي بس بتاع عربيات قديمه قالي خلي بالك العربيه ديه كده غالبا أويل سيل الكرنك هرب زيت ولو الزيت جيه على سير التقسيمه مليون في الميه يكون فوت سنتين تلاته فتجيب صبابات كمان حتى لو كان السير لسه راكب
وفعلا حاولت ابص على سير التقسيمه لاقيته لسه راكب بقيت مش عارف أعمل ايه وفضلت واقف حوالي 3 ساعات لحد ما لاقيت حد يقطرني يوديني لحد البيت
حسبي الله ونعم الوكيل في اللي كان السبب
سيبت العربيه لحد ما دورت على حد بيفهم أساله قالولي ممكن تجيب موتور تاني بس يكون فاضي وخد حاجاتك من الموتور بتاعك وركبها عليه زي المانفو والمارش والدينامو وطرمبة الباور والميه والإنجكشن المهم لقيته بكام ب3000جنيه قلت أتصل بالباشا اللي مفروض انه ميكانيكي قالي هعمل معاك واجب واحسبهولك ب2500جنيه قلت في عقل بالي يغور الموتور أبو2500جنيه بوشك بصنعتك الزباله ديه
العربيه بقالها 3أيام عند الميكانيكي التاني وفك الموتور القديم لاقينا وش السلندر مقفع 1.2مليمتر وجوان وش السلندر ضارب والشمايز كلها مسلخه والجيربوكس مشروخ فبقى مطلوب من إني اغير موتور بالجيربوكس
المهم قلتله إشتغل ونبقى نتحاسب بعد ما تخلص وإن شاء الله رايح أستلمها بعد بكره ربنا يسهل وتتظبط لحسن بجد أنا مش عارف أعمل ايه
أنا من إسكندريه وحابب أقول كل الفورداويه اللي في إسكندريه عشان يخدو بالهم
الصنايعي اللي بوظلي العربيه دا إسمه السيد فورد أخو الأستاذ شريف بتاع قطع الغيار اللي في صلاح الدين محل عبده فورد الأستاذ شريف صراحه مالوش ذنب هوا راجل محترم جدا في بيع قطع الغيار وأسعاره كويسه ومعاملته محترمه جدا بس أخوه السيد ربنا يسامحه بقه هوا اللي بصراحه ما يستاهلش غير اني اقوله حسبي الله ونعم الوكيل فيك (ما انت لو مش عارف وسيبت غيرك يشتغل كنا قلنالك الله ينور بس انت فعلا مش صنايعي ولا ميكانيكي)
الميكانيكي اللي شغال فيها دلوقتي وجيبت منه الموتور الجديد إسمه إسلام فورد في الحرفين اللي بعد الموقف مكانه في دخلة شارع بي إم دبليو أول ورشه على اليمين
راجل محترم واللي يرحله يعرف انه إنسان فاهم من اللي شغالين عنده وكلامه وصنعته وكمية الفورد اللي عنده من كل الأنواع ربنا يجعل الخير على إيديه واستلم عربيتي وتبقى كويسه
اللي يروحله يبقى يسأله عن الفورد الإسكورت الإستيشن لأنها تقريبا الوحيده في إسكندريه
سؤالي ليكو يا جماعه المفروض أعمل ايه مع الميكانيكي الأولاني ده ايه الصح اللي يتعمل معاه
مستني أرائكم ومقترحاتكم
أسف للإطاله يا جماعه بس اللي قرا الموضوع يعرف انا محروق دمي قد ايه ربنا ما يوقع حد منكم في صنايعي مش فاهم تاني ابدا