ايه التهريج ؟؟ الماروتي لا تزيد عن 40 الف و الالتو 49 الف بتكييف
اكيد حضرتك سألت في معارض عادية اسأل في التوكيل او موزعيين معتمديين او شوف معارض غيرهم
عرض للطباعة
يا ملاك التو قلقان من موضوع الانجيكشن هل اعطالة كتير وعمرة الافتراضى قد اية وهل تغيرة صعب او غالى
يا باشا مانا رديت عليك في كل حاجة عن العربية في الموضوع التاني
عامة الانجيشكن مفيهوش اي مشاكل لكن يتطلب الاهتمام بتنظيفته و ديه طريقتين اما فكهم و تنظيهم ع جهاز الالتراسونك بتكلفة حوالي 100 ج اما تغييره و اعتقده السعر هيعدي 250 ج و الفك و التركيب بسيط بس طالما محافظ عليه مش هتحتاج تغيره ان شاء الله
و لكن فيه اجراء وقائي أفضل يمنع السدد او اي مشاكل و ان شاء الله متحتجش تغيرهم و هو استخدام منظف انجيكشن زي stp او ليكوي مولي بشكل دوري كل 20-30 الف مثلا مع مراعاة تغيير فلتر البنزين في مواعيده و الحفاظ ع الصيانات الدورية سواء في التوكيل او برة و بنزين 92 و لأن هو اللي ينصح باستخدامه و ساعتها ان شاء الله هنبقي نشرحلك طريقة استخدام منظف الانجيشكن صح عشان متواجهش اي مشاكل
قطع الغيار متوافرة سعرها اعلي من الماروتي طبعا لكن متوافرة عن الأول بكتيير و انا ارجحلك اكرم حمدي في ش دمشق بالرغم انه غالي شوية لكن حاجته نضيفة تاخدها و انت مطمن و معاك فاتورة أصلية مش بيان و ختم و زي الفل
فيه سوزوكي سنتر في التوفيقية فوق اسماك ابو غالي لكن مجربتوش غير في حاجات خفيفة زي البوجهيات و الحاجات الخفيفة ديه و ملقتش مشاكل بصراحة و اسعاره تعتبر كويسة
او ليدرز في الدقي ش ايران أ\ محمد فوزي الناس بتشكر في القطع عندهم
شكرا جزيلاا لمنسق قسم السوزوكى a m r لاستجابة السريعة وكلامة الواضح والمفيد وسامحنى لانى مش مركز علشان حيرتى فى الاختيار و علشان اول مرة اشترى سيارة
ممكن يا اصدقائى اعرف عناوين او تلفونات وكلاء او موزعين السوزوكى علشان المعارض عندنا فى السويس طالعين فى العالى مش عارف لية السويس تبعد عن القاهرة 130 ك فقط او اقرب يعنى احنا مش فى اخر الدنيا علشان يزودو المبالغ دية
الصراحه كدا الالتو احلى في الشكل والتكيف واوسع سنه لكن الماروتي ماروتي اصيله كدا وبتحتوي الواحد .. اتكل على الله وجيب ماروتي
د-الماروتى سيارة رائعة لكنها عملية الى ابعد الحدود يعنى مش بتاعة منظرة او حد بيحب الاكسسوار ، انا دايماً بحب اسميها عربية راجل بجد :satelite:
استخير ربنا و حضرتك بتستشير و ربنا يلهمك الصواب .
السلام عليكم يا اصدقائى مش عارف لية بحس بدفئ غريب وانا فى قسم السوزوكى علشان كدة نفسى تبقى عربيتى واحدة من موديلات السوزوكى علشان اكون واحد منكم طبعا مع احترامى وتقديرا لباقى الاقسام المهم انا وجدت موزع معتمد لتوكيل السوزوكى عندنا فى السويس واسعارة حلوة مش فرقة كتير عن التوكيل وذهبت وشاهدت سوزوكى الالتو شكلها خرافى ووجدت بجوارها الماروتى جميلة ايضا المهم نوينا ان شاء الله نشترى الالتو لونها نبيتى المشكلة انى وجدت بجوارها سيارة اسبرانزا a113 بصراحة خطفت عينى وخصوصا لما ركبتها و علمت ان سعرها 58 الف والالتو 250 ،49 يعنى الفرق بسيط بصراحة زادت حيرتى بعد ما كنت محتار بين الماروتى والالتو اصبح بين التو و a113 ممكن حد يساعدنى واسف على الاطالة
بخصوص السبرانزا هي عربية كويسة في فئتها يعني 1300 سي سي و السعر و الامكانيات بغض النظر عن انها صيني
من جوة السبرانزا قاعدتها مريحة و تتوافر فيها كماليات مش موجودة في حاجات اعلي منها سعرا
استهلاك البنزين كويس و التكييف ما شاء الله كويس
قطع الغيار اعتقد بقت ارخص لكن اسمع ان فيه قطع غير متوافرة برة اوي و الاسعار قريبة من الالتو
و العربية بالنسبة ليا لما سوقتها شايف انها عايزة شخص سواقته عادية يعني لو غرز يبقي ع خفيف اووي وسط البلد و سرعات طوالي ثبات متوسط لكن مش برفكت يعني محدش برده يفتكرها بي ام و يعمل مناورات بيها :)
العيوب اللي لاحظتها في العربية العفشة خاصة المساعدين و ده حلهم انهم يتغيروا ياما تستحمل الصوت و الدبدبة و النشوفية
التقفيل مش اد كده بس لو جبنا السعر مع الامكانيات و الكماليات يبقي كويس
الشنطة ضيقة شويتين
ده من تجربتي لها
الالتو طبعا اتكلمنا عنها و الفرق انك مش هتلاقي فيها اي مشكلة زي المساعدين او اي حاجة لكن هتاخد موتور اقل في السي سي و مفيش الكماليات اللي في السبرانزا غير تكييف بس
طبعا بالنسبة ليا شخصيا انا افضل الياباني عن الصيني حتي لو مفيش كماليات نهائي و عامة جرب الاتنين و شوف اللي هترتاح ليها اكتر و خد وقتك في التفكير و توكل ع الله و اشتري