الموضوع: بقولها من كل قلبي كل عام وانتم بخير ودايما متجمعين في الخير (شويه فضفضه)

بقالي قرابه 5 سنين عضو معاكم هنا من 21-1-2008
مليش اصحاب غيركم
مليش معارف غيركم
مليش اهل غيركم
ليا طبعا معارف واصحاب واهل كتير من بره المنتدي
بس انتم اقرب الي قلبي
حتي والدتي بتعتبركم اخواتي فعليا
ودايما تقول محمد ملهوش اخوات ودول اخواته
عرفت منكم احسن الناس
ومعرفتش حد من المنتدي وخيب ظني فيه ابدا
اكلنا عيش وملح
مشورنا بعض وزعلنا وفرحنا
فقدنا ناس اعزاء الي قلوبنا
وكسبنا ناس ومعزتهم زادت في قلوبنا
حضرنا مواليد ووفيات مع بعض
عرفنا طابخين ايه ولابسين ايه ونفسنا في ايه
اول ناس بلاقيهم جنبي بيكونوا انتم
واكتر ناس اتمني مفارقهمش هو انتم
لما كانت بتجيلي فرصه لتغيير مجالي او فرصه سفر
من التضحيات اللي كانت بتيجي علي بالي هو اني حسيب امي لوحدها
مش حشوفكم تاني
مش حعرف ادخل علي المنتدي باستمرار
وحاجات تانيه ماديه ومعنويه
وكانت الكفه اللي من ضمنها وجودي معاكم بترجح
عندي كلام كتير اوي عاوز اقوله ومش عارف اترجمه لحروف
عاوز اشكر كل واحد عرفته او تابعته او شكرني وميعرفنيش ولا اعرفه
حشكر واحد بس بالاسم هو كريم منير ان ربنا جعله سبب في وجود المكان ده علشان يجمعنا فيه
وبشكركم واحد واحد سواء ذكر او انثي جمعتني بيه صفحات المنتدي
بشكركم من كل قلبي
كلكم
كل فرد فيكم بيقري الكلام ده وكل فرد ليه معزه في قلبي ومشافش الموضوع
وبقولكم كلكم
كل عام وانتم بخير
كل عام واحنا متجمعين مع بعض
كل عام واحنا اخوات واصحاب ومتجمعين في الخير ولخير بعض
بقالي كتير اوي عندي اكتئاب بس حاسس ان النهارده يوم جميل يمكن علشان بيوافق ذكري جميله عندي بقالها سنين
ودايما بفتكرها في اليوم ده
فمحبيتش ان يومي يكون جميل لوحدي وقولت لازم اشارككم فيه
تحياتي ليكم جميعا
ولو كنت زعلت حد بدون قصد فحقه عليا ولو حد فيكم زعل حد يصالحه ولو زعلان من حد يعاتبه
ولو زعلت حد بقصد فاكيد لو جالي حزعله تاني هههههه
وعيد اضحي سعيد عليكم وايامكم دايما احلي

اخوكم
محمد الشنوري