مواقف وطرائف ولطائف من عيد الاضحى المبارك

من كام سنة في سوق الوايلية بالعباسية
عجل على عربية نقل ورايحين بيه عند الجزار علشان يبيت ويندبح الصبح في العيد
وطبعا زحمة والعيال بيهيصو وبمب ولعب وانوار
هوب العجل فلت من الواد اللي كان ماسكه .... ويا فكيييك .... جري في السوق
وطبعا الموقف اتكهرب والناس خافت والعيال تجري والستات تصوت والرجاله تحاول تمسك العجل ..... أبدا
لغاية ما العجل اتجه برأسه مباشرة الى داخل شباك عربية ملاكي كانت واقفة
وكان صاحب العربية وزوجته المساكين راكبين العربية وواقفين منتظرين قدرهم :36_2_55[1]:
العجل دخل رأسه من شباك العربية اليمين الي داخل السيارة
وطبعا ده كان الكرسي اللي قاعدة فيه المدام ..... :oops2:
المدام لقت العجل في حضنها ..... وطبعا انتو متخيلين بقى اللي حصل
والمصيبة ان العجل بيحاول يخرج راسه من الشباك مش عارف وعمال ينعر وهو في حضن المدام المسكينة
بقى العجل عملي يرج السيارة كلها ومش عارف يخرج راسه
وكل ده وهو في حضن المدام اللي طبعا اغمى عليها 20 مرة وفاقت من صوت العجل وهكذا
لغاية ما الجزار جه وربط العجل وسلك راسه من الشباك وحل المشكلة بعد فاصل رعب هستيري
بس المشكلة الاكبر طبعا كانت افاقة المدام من الغيبوبة اللي حصلت لها
كان موقف عجيييييب
بس بصراحة الست صعبت عليا جدا
انا لو مكانها كنت قطعت الخلف

يا حاج احمد احنا بقى فى السيده
يعنى قريبين من المدبح
بينا وبينه حوالى 3 محطات
طول السنه كانت عجول وثيران وجمال
تهرب وتوصل لحد عندنا
وفى الغالب كانوا بيدبحوها فى الشارع ويشيلوها على عربيه
مرة زمان قوى جمل هرب ودخل لغايه الناصريه وكان مسبب رعب حقيقى
مبرطع على كل حاجه
وهوب قام واحد مسطول كان على القهوة وراح واكله كرسى من الكراسى القش بتاعه زمان فى ركبه راح مكومه
وراح غزه كان الجزار وراه راح مخلصه
كانت ايام

عندنا الجزار كان بعديه بكام محل سوبر ماركت و الجزار كان بينزل العجل من العربية و بمجرد ما لمس الارض طلع يجرى لحد ما وصل للسوبر ماركت و راح داخل براحة كل الناس الى كانت بتجرى وراه سابته علشان خافو يخشو يمسكوه جوة علشان الرفوف و التلاجات متتكسرش اقل من دقيقة و العجل راح لافف و طالع واتمسك ساعتها

انا كنت واقف فى البلكونة بتفرج على الموقف و ميت على نفسى من الضحك و مش قادر اتخيل منظر الناس الى كانت موجودة جوة السوبر ماركت شعورها كان ايه و هم شايفين العجل داخل عليهم

حصل الموقف ده مرة وانا واقف امام مطعم سرحان فى بورسعيد يوم الوقفة بالليل
المنظر بالضبط زى اسبانيا واللى بيحصل فيها
العجل اخد شارع النصر جرى وراح داخل فى باكية ضيقة تحت العمارات اللى بجانب المطعم والناس بتجرى ادامه وهو طاير اخد اللمف بتاع السوبر ماركت وداخل على المطعم وهههههههههه انا خلعت لغاية كده لروح فى الرجلين

هههههههههه اما شوية مواقف صحيح
انا من سنتين كنا بندبح خروووف عند ابن عمتى جه دبح معانا العجل وروحنا عندهم ندبح الخروف اول ما فكيناه ولسه هنمسكه جرى على ابن عمتى خبطه فى رجله طبعاً اتجبست وكلام من ده والخروف انتحر نط من على السطووح هههههههههه بس نزلنا لئينا الروح لسه فيه ولحقو يدبحوووووه

انهارده قبل المغرب عديت اشاره لاقيت العربيات واقفه والطريق فاضي

ركزت شويه لاقيت عجل هايج عمال يجري منهم

ركنت ويدوب بطلت وفتحت الكاميرا لاقيته طلع جري وعمال يخبط في العربيات واللي بيحاول يمسكه بيشيله علي قرونه يرميه

انا خوفت علي العربيه الصراحه وكنت ماشي بس يدوب لحقت صورته بعد ما طير تلاته رجاله علي الجزيره وجت عربيه جنبي قطعت الرؤيه

علي ما طلعت بالعربيه كان هو دخل شارع جابني والناس وراه

واحد واقفه بالسيف علي اليمين واتنين علي الشمال مش باينين ..

بس مين شكلهم مسخره شويه بيجرو منه وشويه بيجرو وراه هههههههه

‫مش هندبح يعني مش هندبح‬‎ - YouTube

حرام والله الرعب اللي بيتعمل للحيوانات دي ربنا هيحاسبنا عليه "مر رسول الله صلى الله عليه وسلم على رجل واضع رجله على صفحة شاة وهو يحد شفرته وهي تلحظ إليه ببصرها ، فقال : " أفلا قبل هذا تريد أن تميتها موتتين.

مواقف طريفه فعلا واحيانا بتبقى كارثيه

كل عام وانتم بخير وبصحه

لسه من شوية كنت راكن العربية ولسه بفتحها و اركب الاقى عجل اسود كبير جاي يجري عليا و في رقبته حبل مقطوع , انا اول ماشوفت المنظر ده ركبت جرى و قمت مأمرك وطلعت اجرى بالعربية و شايف في المرايا العجل بيجري وواحد بيجري وراه عشان يلحقه